भगवानेन छाचला बुल
2 कुरींथी 2
हेरेसी मे मारा मन मां नक्खी कर लेदलु छे की, मे तुहुंक लड़ीन वेला पाड़ने करीन अळी पछु तुंद्रेन्चां हय नी आवो। काहाकी कदी मे तुहुंक नीरास करो, ती मेसेक खुसी आपणे वाळु कुण रवसे, सीरप चु तीनाक मे नीरास कर्यु। ने मे जी वात तुहुं काजे हेरेसी लिख र्यु, की काही असो नी हवे, की मारा आवणे पर हींद्रे सी मेसे खुसी जड़नु चाहजे, मे हींद्रे सी नीरास हय जाम; काहाकी मेसे आखा काजे हीनी वातेन भुरसु छे, की जु मारी खुसी छे, ची तुंद्रे आखा मां बी छे। मटी आफोत, ने मनेन थकान सी मे बेसकु आसळा पाड़ी पाड़ीन तुहुंक लिखलो हतलो हेरेसी नी, की तुहुं नीरास हवु, बाकुन हेरेसी की तुहुं हीना मटला परम काजे जाणी लेवु, ज मेसे तुंद्रे सी छे।
गुनु करलाक माफी आपु
ने जु बी पाप करीन मेसेक वेला पाड़लु छे, चु मेसेक अतरात वेला नी पाड़्यु, बाकुन एक कहींयाम तुहुं आखाक वेला पाल्ला छे। तेबी हय मे ईनी वात काजे लीन तुहुंक जादा वेला पाड़ने नी हय र्या।1 काहाकी पाप करला काजे तुंद्रे मायन बेसका जणा मेळीन डंड आप्या। अतरोत घणो। हय ते चु सुदरी गुयु।2 हेरेसी ज्य वारु छे की हेरा गुना काजे माफ करु; ने सांती आपु, असा नी हवे की असा माणसे बेसका नीरास मां डुबी जाय। हेरे वजे सी मे तुंद्रे सी लीलघायो, की हीना काजे आपणा परमेन सबुत आप देवु। काहाकी मे हेरेसी बी लिखलु, की तुहुंक पारखी लम की तुहुं मारी आखी वाते काजे मान्ने वाटे तीयार हवु, की नी। जेरो तुहुं काय माफ करता रवु हीनाक मे बी माफ3 करीस, काहाकी मे बी जो काय माफ कर्यु, कदी कर्या ती, तुंद्रे वजे सी मसीन जागा मां हयन माफ कर्या। की भुतड़ान दावु हामरे पर नी चाले, काहाकी हामु हेरी सुच सी अनजाण्या नी हय।
तरवास मां पोलुसेन दुख
जत्यार मे ईसु मसीन खुस-खबर सामळावणे करीन तरोआस मां आयु, ने मालीक मारे वाटे एक बारनो उगाड़ देदु। ती मारा मन मां सांती नी जड़े, हेरेसी की मे आपणा भायस तीतुस काजे नी हेर्यु; हेरेसी हींद्रे सी आवजु ने आवसी करीन मे मकीदुनीया जीला मां जात र्यु।
मसी मां जीतणेन खुसी
बाकुन भगवान काजे तु बेसकु वारु छे करीन कह्वो, जु मसी मां जलम हामुक जीतेन खुसी मां लीन फीरे, ने आपणे अकलेन खुसबु हामरे साहरे आखी दुर फेलावे। काहाकी हामु भगवान धड़े छुटकारु4 जड़ने वाळा, ने खत्तम हवणे वाळा, दुयु वाटे मसीन खुसबु छे। कतरा वाटे ते मरनेन वजे मरनेन गन्द, ने कतरा वाटे जीवनेन वजे खुसबु, वारु ईनी वातेन लायक कुण छे? काहाकी हामु हीनु बेसकान तसा नी, जे भगवानेन बुल मां भेसकु करे; बाकुन मनेन छाचाय सी, ने भगवान भीणी सी भगवान काजे मारे साते छे करीन जाणीन ईसु मसी मां बुलो।
Source notes (4)
- Cross-reference गलाती 4:12
- Cross-reference ईफीसी 4:32
- Footnote माफ क्षमा
- Footnote छुटकारु उद्धार
भगवानेन छाचला बुल. Copyright © 2024 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.