भगवानेन छाचला बुल
2 कुरींथी 1
आव-भाव
ए कुरींथीस सहर मां रहण्या भगवानेन मंडळीन माणसे, मे पोलुस, ईसु मसी पर भुरसु करन्या भाय भेटा तीमुथीयुस भेळे जी चिट्ठी तुहुंक लिखो। भगवान आपसी मरजीन अनसारे, मेसेक नेवाड़ीन ईसु मसीन नेवताळु बणावलु छे।
जी चिट्ठी अखाया जीला मां आखे दुर रहण्या भगवानेन आखा चुखला माणसे वाटे बी लिखलु छे, जे ईसु मसी काजे माने।
आपणा भगवान बासेन ने मालीक ईसु मसीन गीण-दया ने सुक सांती तुहुं आखा काजे जड़ती रहणु चाहजे।
पोलुस भगवान काजे तु बेसकु वारु करीन कवे
आपणा मालीक ईसु मसीन भगवान, ने बासेन तु बेसकु वारु छे करीन कहो, जु दयान बास, ने आखी भातीन मां सांतीन भगवान छे। चु हामरे आखी आफोत मां सांती आपे, काहाकी हामु हीनी सांतीन वजे सी जु भगवान हामुक आपे, हीनुक बी सांती आप सके, काहाकी जे आखी आफोत मां पड़ र्या। काहाकी जसा मसीन दुखे मां हामु जादास साजल्या हवजे, असात हामु सांती मां बी मसीन साहरे जादास साजल्या रवजे। कदी हामु दुख झेलजे, ती जी तींद्री सांती ने छुटकारा वाटे छे, ने कदी सांती जड़े, जे तुंद्री सांती वाटे छे; जेरे ताकत सी तुहुं सेण करता जाय्न हीनु दुखे काजे सेण कर लेय, जीनुक हामु बी सेण करजे। ने हामरी आस तुंद्रे बारामां काठी छे, काहाकी हामु जाणजे, की तुहुं जसा हामरा दुखे मां साजल्या छे असात सांती मां बी साजल्या छे।
ए भायसे, हामु नी चाहता की तुहुं हामरे पर आवला हीना दुख सी अनजाण्या रवु। ज्य आसीया जीलाम हामरे उपर बेसकी आफोत आय पल्ली, ने ची वेला सेण नी हवे हामरी ताकत सी बाहार हतली अतरी जबर हतली की हामु जीवन सी बी मरने-मरने हय गुयला। बाकुन हामु हामरा मन मां समजी लेदला, छे की हामरे पर मुतेन डंड जड़ीत गुय। की हामु आपणे पर भुरसु नी राखजे, बाकुन भगवान पर भुरसु राखजे। जु मरलाम सी जीवाड़े। हव जुत भगवान हामुक मुतेम सी बचाड़्यु, ने अगु बी मुतेम सी बचाड़से, ने हामरी जी आस छे की चु अगु बी बचाड़तु रवसे। तुहुं बी मेळीन दुवान साहरे हामरी मदत करसु, की जु भगवानेन वाटु बेसका माणसेन साहरे हामुक जड़लो छे, हेरे वजे बेसका माणसे हामरे भीणी सी तु बेसकु वारु छे कवे।
पोलुस आपसान युजना बदले
काहाकी हामु आपणा मन हीनी गवाय पर मटाय करजे, की कळी मां ने खास करीन तुंद्रे ईचमां हामरु एहवार भगवान वाटे असो चुखलो ने छाचाय साते हतलु, जे डीलेन अक्कल सी नी, बाकुन भगवानेन गीण-दया साते हतला। हामु तुहुंक काय नी लिखजे, सीरप ज तुहुं भणु ने मानु बी, ने मेसे आस छे, की आकरी लग बी मान्ता रवसु। जसा तुंद्रे मां सी कतरा मानी लेदला छे, की हामु तुंद्रे मटायन वजे छे; असात तुहुं बी मालीक ईसुन दाहड़े हामरे वाटे मटायन वजे ठेरसु।
ने हीना भुरसा सी मे चाहतेलु की पेहेल तुंद्रे धड़े आवो, की तुहुंक दुय कावा संयबरकत जड़नु चाहजे। ने तुंद्रेन्चां मायन मकीदुनीया हय्न जायस, ने अळतेन पछु मकीदुनीया सी हय्न तुंद्रेन्चां आवीस ने तुहुं मेसेक यहुदीया जीला भीणी थुड़ीक वार लग पुगाड़ देजु। हेरेसी मे जी मरजी करलु हतलु ती काय मे हींडणे फीरने वाळु देखाड़्यु काय? नीते ज करने चाह काय डीलेन अनसारे करने चाह, की मे वात मां “हव, हव” बी कहं; ने “नी, नी” बी कहं? भगवान भुरसा वाळु गवा छे, की हामरे हीना बुल मां ज तुंद्रे सी कह्यु “हव” ने “नी” दुयु नी जड़े। काहाकी भगवानेन पुर्यु ईसु मसी जेरो हामरे साहरे मतलब मारे ने सीलवानुस ने तीमुथीयुसेन साहरे तुंद्रे ईचमां मे परचार हयु; तेरेमां “हव” ने “नी” दुयु नी हतला; बाकुन, हेरे मां “हव” की “हव” हवे। काहाकी भगवानेन वायदा छे, चे आखा हेरेमां “हव” हय्न साते छे हेरे सी हेरे साहरे असोत बी हवतो रवे बी हवे, की हामरे साहरे भगवानेन सेक-सींगार1 हवे। ने ज हामु तुंद्रे साते मसी मां काठा करे, ने जु हामुक नेवाड़्लु छे चु भगवान छे चु हामरे पर छाप बी कर देदु, ने बचाड़ने मां आत्मा काजे हामरे मनेम आप्यु।
मे भगवान काजे आपणी आत्मा सी गवा करीन कहं, की मे हय लग कुरींथीस मां हेरेसी नी आयु, की मेसे तुंद्रे पर दया आवतेली ज नी, की हामु भुरसान बारामां तुंद्रे पर राज करीन हक जमाड़ने हींडजे; बाकुन तुंद्रे खुसी मां साजेदारी छे काहाकी तुहुं भुरसात मां पाक्का छे।
Source notes (1)
- Footnote सेक-सींगार महिमा
भगवानेन छाचला बुल. Copyright © 2024 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.