भगवानेन छाचला बुल
1 तीमुथी 2
आखा माणसेन छुटकारा वाटे वीन्ती करनु जरुड़ी छे
अतरे ए तीमुथी, मे जी वात कहीन पेहली अगवाय करो, जत्यार बी ईसुक मान्या, भगवानेन भक्ती करने करीन भेळा हया, तीने टेमे आपसान करता अतरात नी, बाकुन आखा माणसेन करता भगवान धड़े रवण्या, वीन्ती ने दुवा करनु चाहजे, ने आखान करता भगवान काजे बेसकु वारु कहणु चाहजे। राजा ने सरकारी आफसर वाटे बी भगवान धड़े दुवा करनु चाहजे तेरेमां की आपणु भक्तीन जीवाय ने ईज्जत भेळा सांती मां मेळीन रवणेन मुखु जड़से। जु भगवान आपणु काजे पापेम सी छुड़ावे तीना काजे बी जी वात वारु लागे। भगवानेन मरजी जी छे की आखा माणसेन भलो हवणु चाहजे ने चे छाचाय काजे वारु रीते जाण लेणु चाहजे।1 काहाकी भगवान एकुत छे, ने भगवानेन ने माणसेन ईचमां बी मेळ करावण्यु बी एकुत छे, ने जु मेळ कराड़न्यु ते, ईसु मसी छे, जु माणसेक बचावणे करीन माणुस बणीन आवलु। ईसु आपसा काजे आखा माणसेन पापेम सी छुड़ावने करीन आपसा काजे भगवान अगळ बादान तसु चड़ाय देदु ने हेरी गवाय सय टेम पर देदलु। ने भगवान मेसेक हीनी छाचाय्न बारामां हय ईसुन गवा देणे करीन ईसुन नेवताळु ने परचार करन्यु बणावलु छे खास करीन आड़जात्या नी-यहुदी माणसेक ईनी छाचाय्न अनसारे भुरसु करनेन बारामां सीकाड़न्यु बणावलु छे। तेबी थुड़ाक माणसे मेसेक ईसुन नेवताळु नी मान्ता। बाकुन मे जी वात कहलु छे ची वात सय छे।
तेरेमां मे चाहो की जागे-जागे ईसुन आखी मां बीना झगड़ा मां चुखला हात काजे उचा करीन दुवा करता रहणु चाहजे। असात बायरा बी समळीन रहणु चाहजे, ने जचे असा पुथल्या पेहरीन जीवणु चाहजे ने कान्या भाती-भातीन नी गुथणु चाहजे ने सनान गावणो, नीते मोती नी पेहरनु चाहजे, ने बेसका मंहगला पुथल्या नी पेहरनु चाहजे, बाकुन भला काम सी काहाकी भगवान भक्ती करने वाळा बायरा काजे ज सय छे। बायरा काजे मां सीकाड़न्या काजे हुगा रय्न पुरो मन लागाड़ीन2 सीकणु चाहजे। मे कहो की बायरा नी अदमी काजे सीकाड़नु चाहजे ने नी अदमी पर हक जमाड़नु चाहजे बाकुन हुगा हय रवणु चाहजे। काहाकी भगवान आदम अदमी काजे पेहेल घड़्यु ने पछेन हव्वा बायर काजे घड़्यु।3 ने आदम अदमी नी ठगायु, बाकुन हव्वा बायर भुतड़ान आहे लागीन ठगाय गुय, ने भगवानेन हुकुम काजे पेहेल तुड़ी।4 तेबी बायरी पुर्या-पारीक पयदा करी ने तीनुक वारु भुरसा मां परम मां ने चुखा काम मां सीकाड़ती जाय्न भगवानेन काम मां साजेली बणसे ने चे छुटकारु हात करसे।
Source notes (4)
- Cross-reference यहेजकेल 18:23
- Footnote पुरो मन लागाड़ीन अधीनता
- Cross-reference 1 कुरींथी 11:8
- Cross-reference उबजाणनी किताप 3:6
भगवानेन छाचला बुल. Copyright © 2024 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.