भगवानेन छाचला बुल
1 तीमुथी 1
पोलुस भीणी सी जु आपणुक छुड़ावणे वाळु भगवान ने हामरी आसेन साहरु मसी ईसुन हुकुम सी ईसु मसीन नेवतावाळु छे।
तीमुथीन नाव जु भुरसा मां मारु छाचलु पुर्यु छे:
बास भगवान ने हामरु मालीक ईसु मसीन दया ने गीण-दया ने सुक सांती तुसेक जड़ती रहणु चाहजे।
पोलुस तीमुथी काजे झुटी वात सीकाड़न्याक रुकणेन हुकुम आपे
जसु मे मकीदुनीया जीला मां जाणेन टेमे तुसेक समजाड़लु, की ईफीसुस सहर मां रवीन थुड़ाक माणसे काजे हुकुम आप की तुहुं भाती-भातीन झुटी वात मां सीकाड़ु। ने तीनु मनघड़्या काहाण्यान बारामां, ने गीणाये नी असला खानदानीन बारामां सीकाड़ी-सीकाड़ीन माणसेक खुटी मां करु। असली मनघड़ाय वात ते भगवानेन चुखला माणसेक, भुरसान साहरे भगवानेन कह्याम जीवणे नी सीकाड़े, बाकुन लड़ाय कराड़े; झुटी वात सीकाड़न्याक रुकणेन बारामां, जु हुकुम मे तुसेक आपलु, चु हुकुम पुरु करजी। हुकुमेन सार जु छे की चुखला मन ने वारलु समज ने खरला भुरसा सी परम उबजणु। झुटी वात सीकाड़न्या थुड़ाक माणसे ते हीना वारलु गुनाक छुड़ीन भटकी गुया ने फालतु वात मां जखड़ी पड़ने बाजी गुया। ने चे मटला भगवानेन नीयमेन मास्तर्या ते बन्ने ते हींडे पर जी वात कवे चे जी वात हिम्मत सी कवे तीनी वातेक चे आपसात नी समजे।
पर आपणु जाणजे की कदी कुय मुसान लिखलु कायदु ते वारलु छे बाकुन जसु भगवान गवा तेरेत अनसारे तीनु कायदाक समजीन सीकाड़ने सीत चे नफावाळा छे। ज जाणीन की भगवान जे कायदा मुसा वाटे आपलु चे धरमी माणसेक डंड आपणु करीन नी पर कायदान बीगुर जीवण्या पापी माणसेक तींद्रा पापेन बारामां ने डंडेन बारामां समजाड़ने करीन आपलु जे माणसे भगवानेन भक्ती नी करे, जे आस्या-बासेन ने डाहलान वात नी माने, माणसेन ईज्जत नी करे; जे कुहराय ने पाप करे जे आयस ने बासेक लग मार नाखे, जे छीनाळो करे, जे अदमी। अदमी साते सोवसार करे1, ने जे बायरा, बायरा साते सोवसार करे, जे माणसेक कब्जाम करीन दीसराक वेचे, जे सगुन खाणेन टेमे लुच्चाय मेले, तीनु आखा वाटे तींद्रा पापेन बारामां ने डंडेन बारामां समजाड़ने करीन ठेहरावलु छे। जुत आखा सी वारु भगवानेन सेक-सींगार तीना खुस-खबरेन अनसारे छे च मेसेक आपलु छे।
गीण-दया वाटे भगवान काजे बेसकु वारु छे कह्वे
मे आपणा मालीक मसी ईसुन चु मेसेक ताकत आपलु छे, वारु छे कह्वो की चु मेसेक ईमानदार समजीन आपसान सेवान काम वाटे नेवाड़ लेदलु छे। मे ते पेहेल ईसु पर भुरसु करन्यान नाव-बद्दी करतेलु तीनुक वेला पाड़तेलु ने तींद्रे पर दया नी कर तेलु तेबी मार पर ईसु दया कर्यु काहाकी मे पेहेल ईसु पर भुरसु नी करतेलु ने तीने टेमे बीना समजे जे काम करलु छे। ने आपणु भगवान मालीक मार पर बेसकु गीण-दया देखाड़्यु ने मारा हीया मन मां भुरसु ने परम ईसु मसीन साहरे भर देदलु छे। जी वात संय छे ने आखी भातीन भुरसु करे असी छे की मसी ईसु पापी माणसेक छुड़ावणे करीन ईनी कळी मां आवलु छे, ने मे असु मानो की तीनु आखा सी मटु पापी मे छे। बाकुन मारे पर तेरेमां दया हवी की आखा सी मटु पापी मेत छे तेबी ईसु मारा आखा पाप झेलतु जाय्न मेसेक माफ कर्यु की जे पापी माणसे अमर जीवाय हात करने करीन ईसु मसी पर भुरसु करसे तींद्रे वाटे मे ईसु पछळ चालनेन एक सहलाणी ने जपाप बण जाम। ने असु करीन एकुत खरला भगवानेन ईज्जत ने बड़ाय पीड़ीडीट जलम हवती रवे जु नी देख्यु अमरकाय, ने जलमेन राजु छे! आमीन।
ए पुर्या तीमुथीयुस भगवानेन अघी सी आवणे वाळी वात बताड़न्या माणसे जे बुल तारा बारामां पेहेल सीत तुसेक कवला मे तुसेक जु हुकुम आपो की तु तींद्रे अनसारे वारलु लड़ाय काजे लड़तु रव, ने भुरसान वात पर ने समजदार रवीन जी लड़ायन काम पुरो कर तीनाक छेटे करने वाटे कतरा जणा भुरसा सी छेटे हय गुया। हींद्रे मां सी हुमन्युस ने सीकन्दर छे तीनुक मे भुतड़ाक आप देदलु छे की चे भगवानेन नाव-बद्दी2 करनु नी सीके।
Source notes (2)
- Footnote अदमी साते सोवसार करे पुरुषगामियों
- Footnote नाव-बद्दी निन्दा
भगवानेन छाचला बुल. Copyright © 2024 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.