भगवानेन छाचला बुल
1 कुरींथी 9
नेवताळान हकेन काम
काय मे गुलाम1 मां सी नी छुट्यु काय? काय मे नेवताळु नी हय? काय मे ईसु काजे जु आपणु मालीक छे, नी देख्या? काय तुहुं मालीक मां मारा भणावला नी? कदी मे दीसरा वाटे नेवताळु नी हय, ती बी तुंद्रे वाटे ते छे; काहाकी तुहुं मालीक मां मारा नेवताळान कामेन छाप छे।
जे मेसे पारखे, हींद्रे वाटे ज्य मारु जपाप छे। काय हामुक खाणे-पीणेन हक नी हय काय? काय हामुक ज्य हक नी हय, की काहालीक मसी बहणीस साते ईयाव करीन हीनीक लीन फीरे, जसों दीसरा नेवताळा ने मालीकेन भायस ने केफा करे? नीते सीरप मेसे ने बरनाबास काजे हक नी हय की कमाय करनु छुड़े? कुण कदी आपणी कमाय मां सी खाय्न सीपायड़ान काम करे? कुण अंगुरेन वाड़ी लागाड़ीन हेरो फळ नी खातु हय? कुण गाडरान2 राखवाळी करीन हींद्रो दुत नी पीये? काय मे जी वात माणसेन रीत पर बुलो? काय मुसान लिखला सास्तुर मां बी ज्य नी कह्वे? काहाकी मुसान साहरे लिखला कायदा मां छे, “दावण गेरनेन टेम मां चालतेला बेलेन मुंहडो घुण बांदे।” काय भगवान बेलेन ने फीकुर करे? नीते हेरेसी हामरे वाटे कह्वे। हव, हामरे वाटे लिखी गुयलो छे, काहाकी सय छे की जुपणे वाळु आस सी जुपे ने दावण गेरनेवाळा साजल्या हवणेन आस सी दावणी गेरेन वाळु हवणु चाहजे। अळतेन जत्यार की हामु तुंद्रे वाटे आत्मा मां भरायला चीजे एर्या, ती काय जी मटी वात छे की तुंद्री डीलेन चीजेन फसल काटे। जत्यार दीसरान तुंद्रे पर ज्य हक छे, ती काय हेरेसी अदुस नी हवे? बाकुन हामु ज्य हकेन काम मां नी लाया बाकुन आखो काय सेण करजे की हामरे साहरे मसीन खुस-खबर मां थुड़ीक रुकावट नी हवे। काय तुहुं नी जाणु की जे मंदीर मां चाकरी करे, चे मंदीर मां सी खाय; ने जे वेदीन चाकरी करे, चे वेदी साते साजल्या हवे?3 हीनीत रीत सी मालीक बी ठेरायु की जे माणसे खुस-खबर सामळावे, हींद्रो जीवणेन सादन खुस-खबर सी हवे।
बाकुन मे हींद्रेम सी कायबी वात काम मां नी लायु, ने मे जी वात हेरेसी नी लिख्यु की मारे वाटे असो करे, काहाकी हेरसी ते मारो मरनुत वारु छे की कुय मारी मटाय काजे फालतु नी ठेरावे। कदी मे खुस-खबर सामळावो, ती मारे वाटे काय बी मटायन वात नी; काहाकी जो ते मारे वाटे जरुड़ी छे। कदी मे खुस-खबर नी सामळो, ती मारे पर हाय। काहाकी कदी आपणी मरजी सी ज्य करो ती दाहड़की मेसे जड़ती, ने कदी आपणी मरजी सी नी करो ती बी हीसाब-किताप करन्यु मेसे सुपी देदला छे। ती मारी काहली दाहड़की छे? ज्य की खुस-खबर सामळाणे मां मे मसीन खुस-खबर4 मुफत मां कर दम, जां लग की खुस-खबर मां जु मारु हक छे हीनाक बी मे पुरी रीत सी काम मां नी लावो।
काहाकी आखा सी आजाद हवणे पर बी मे आपणे आप काजे आखान गुलाम बणाय देदु की जादास माणसे काजे खेचीन लावो। मे यहुदीया वाटे यहुदी बण्यु की यहुदीया काजे खेचीन लावो जे माणसे मुसान लिखला कायदान हक मां नी रवणे सी बी मुसान लिखला कायदान हक मां बण्यु की हीनुक जे मुसान कायदान हक मां छे, खेचीन लावो। मुसान कायदाक नी जाणे हींद्रे वाटे मे जे भगवानेन कायदा सी दुर नी बाकुन मसीन कायदान हक मां छे मुसान साहरे लिखला कायदा नी माने हींद्रेन तसु बण्यु की मुसान कायदाक नी माने तीनु काजे खेची लावो। मे लुला वाटे लुलान तसु बण्यु की लुला काजे खेची लावो। मे आखा माणसे वाटे आखो काय बण्यु काहाला ने काहाली रीत सी काय एकेन छुटकारु कराड़ो।
मे ज्य आखो काय खुस-खबर वाटे करो की दीसरा साते हेरु साजल्यु बणी जाम।
मसी मां दवड़नु
काय तुहुं नी जाणु की दवड़णे मां ते आखा दवड़े, बाकुन ईनाम एकुत लीन जाय? तुहुं असात दवड़ु ने की जीतु। एक ताकतवाळु आखो काय खुद करे; चे ते एक खत्तम हवणे वाळा मुकुट काजे हात करने वाटे ज्य आखो करे बाकुन हामु ते हीना मुकुट करीन करजे जु जलम रवे। हेरेसी मे हीनी रीत सी दवड़ो, बाकुन रवलो काम करने वाळु नी, मे बी हीनीत रीत सी धुमा सी लड़ायो, बाकुन हेरेन तसु नी जे वाहळा मां ठुक्ता जाय्न लड़ायो बाकुन मे आपणा डील काजे धुमाटीन मारा हक मां लावो, असो नी हवे की दीसरा काजे परचार करीन मे खुद काहालीक रीत सी पापी ठेहरो।
Source notes (4)
- Footnote गुलाम स्वतंत्र नहीं
- Footnote गाडरान भेड़ों
- Cross-reference लेवयवेवस्था 6:16,26
- Footnote खुस-खबर सुसमाचार
भगवानेन छाचला बुल. Copyright © 2024 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.