1 कुरींथी 8

मुरती पर चड़ावलो परसात

1हय मुरती अगळ बादा देदली चीजेन बारामां हामु जाणजे की हामु आखा काजे अक्‌कल छे। अक्‌कल मटाय काजे पयदा करे, बाकुन परम सी अगा बड़े। 2कदी कुय समजे की मे काय जाणो, ती जसों जाननु चाहजे असो हय लग नी जाणता। 3बाकुन कदी कुय भगवान सी परम करे ती भगवान तीनाक उळखे।

4अळतेन मुरती लग बादा करली चीजेन खाणेन बारामां हामु जाणजे की मुरती कळी मां कुय चीज नी हय, ने एक काजे छुड़ीन ने कुय भगवान नी हय। 5तेबी सरगे मां ने कळी मां बेसका भगवान कह्‌वाये जसों की बेसका भगवान ने बेसका मालीक छे। 6तेबी हामरे वाटे ते एकुत भगवान छे; मतलब बास जेरे भीणी सी आखी चीजे छे, ने हामु हेरेत वाटे छे। ने एकुत मालीक छे, मतलब ईसु मसी जेरे साहरे आखी चीजे हवी, ने हामु बी हेरेत साहरे छे।12

7बाकुन आखा काजे गुयु अक्‌कल नी हय, बाकुन ईतराक ते हय लग मुरती काजे काय समजणेन वजे सी मुरतीन अगळ बादा चड़ावली चीज काजे काय समजीन खाय, ने हींद्‌रो मन लुलो हवणेन वजे सी वीटळी3 जाय। 8खाणो हामुक भगवान धड़े नी पुगाड़े। कदी हामु नी खाजे ती आपणो काय नुकसाण4 नी हय, ने कदी खाय ती काय फायदु नी।

9बाकुन हुस्‌यार असो नी हवे की तुंद्‌री जी गुलाम मां सी छुटणेन काय लुला वाटे ठुकरेन वजे हय जाय। 10काहाकी कदी कुय तुसे अक्‌कल वाळा काजे मुरतीन मंदीर मां खाणो खात्‌ला देखे ने चु भुरसा मां लुलु माणुस हयती, काय हेरे जीव काजे मुरती अगळ बादा चड़ावली चीज खाणेन हिम्‌मत नी हय जाय? 11हीनी रीत सी तारा अकलेन वजे सी चु भुरसा मां लुलु भायस जेरे वाटे मसी मर्‌यु, खत्‌तम हय जासे। 12हीनी रीत सी भायस्‌यान वीरुद पाप करने सी ने हींद्‌रे लुलु मन काजे घाव पुगाड़ने सी, तुहुं मसीन वीरुद पाप करु। 13हीनी वजे सी कदी खाणो, मारा भायस काजे ठुकर खावाड़े, ती मे कदी बी कसु बी सीकार5 नी खाम। असो नी हवे की मे आपणा भायस वाटे ठुकरेन वजे बणो।