1 कुरींथी 5

मंडळी मां छीनाळो

1जां लग सामळने मां आवे की तुंद्‌रे मां छीनाळो1 हवे, बाकुन असो छीनाळो की ज्‌य नी-यहुदी मां बी नी हवे की एक माणुस आपणा बासेन बायरी काजे राखे। 2ने तुहुं दुख2 ते नी करु, जेरेसी असा काम करने वाळा तुंद्‌रे ईचमां मां सी नीकळी जाय, बाकुन तुहुं मटाय करु। 3मे ते डीलेन भाव सी छेटु हतलु, बाकुन आत्‌मान भाव सी तुंद्‌रे साते हयन मानु की जागे हुबु हवणेन टेम मां असा काम करने वाळान बारामां ज्‌य फेसलु आप देदु, 4की जत्‌यार तुहुं ने मारी आत्‌मा, हामरा मालीक ईसुन ताकत साते भेळा हवु, ती असा माणसे हामरा मालीक ईसुन नाव सी, 5डीलेन नासेन वाटे भुतड़ा काजे आप देय, काहाकी हेरी आत्‌मा मालीक ईसुन दाहड़ा मां छुटकारु3 जड़े।

6तुंद्‌रो मटाय करनु वारु नी हय; काय तुहुं नी जाणु की ईतरोक खाण्‌यु-सुडु आखा गुंदला पीठा काजे आथुड़ कर देय। 7जुन्‌डला आथुड़ काजे नीकाळीन आपणे खुद काजे चुखा करु की नवलु गुंदलु पीठु बणी जावु; काहाकी तुहुं आथुड़ वाळा नी हय। काहाकी हामरु बी तीहवार, जु मसी छे, बादान रुप मां चड़ गुयु। 8हेरेसी आवु, हामु खुसी मां खुसी मनावजे, नीते जुन्‌डला आथुड़ सी ने नी कुहराय ने भुंड्‌ला आथुड़ सी, बाकुन सय ने छाचाय्‌न आथुड़ पाकुर बन्‌नला रुटा सी।

9मे मारी चिट्‌ठी मां तुहुंक लिखलु छे की छीनाळ्‌यान संगत घुण करे। 10ज्‌य नी की तुहुं सय मां हीनी कळीन छीनाळ्‌यान, नीते लालच्‌यान, नीते आंदारलो करने वाळान, नीते मुरती पुजणे वाळान संगत नी करनु चाहजे; काहाकी हीनी टेम मां ते तुहुं काजे कळी मां सी नीकळीन जाणु पड़तो। 11बाकुन मारो कह्‌वणु ज्‌य छे की कदी कुय भायस कह्‌वाय, ने छीनाळ्‌यु, नीते लालच्‌यु, नीते मुरती पुजण्‌यु, नीते गाळी देण्‌यु, नीते दारु पीण्‌यु, नीते आंदारलो करने वाळु, ती तेरी संगत घुण करे; बाकुन असा माणुस साते रुटा बी घुण खाय।

12काहाकी मेसे बाहार वाळान नीयाव करने सी काय काम? काय तुहुं माहें वाळान नीयाव नी करु? 13बाकुन बाहार वाळान नीयाव भगवान करे। हेरेसी हीना पापी काजे आपणे ईचमां सी नीकाळ देवु।