Bhadrawahi Bible
जकर्याह 10
यहूदा ते इस्राएल दुबारां आबाद भोने
बरसांतरे आखरी मां यहोवा करां झ़ड़ी मग्गा, यहोवा करां ज़ै बिजली चमकाते, ते तै तैन्न झ़ड़ी देलो, ते हर केन्चेरे उडारे मां हरियाली उगालो। किजोकि कुल देबते अनर्थ गल्लां ज़ोतन ते एजने बाले वक्तेरे बारे मां ज़ोनेबाले झूठां दर्शन हेरतन ते झूठां सुपना शुनातन, ते बेफैइदी शान्ति देतन। एल्हेरेलेइ लोक गब्बां केरे ज़ेरे भेटकी जे; ते पुहाल न भोनेरे वजाई सेइं बुरे हाले मां पेवरेन।1
यहोवा ज़ोते, “मेरो क्रोध पुहालन पुड़ भड़कोरोए, ते अवं तैन थाव्वन सज़ाह देइलो; किजोकि सेना केरो यहोवा परमेशर अपने झुण्डे मतलब यहूदारे घरानेरो हाल हेरनेरे लेई एज्जेलो, ते लड़ैई मां तैन्न अपने निगर घोड़ेरो ज़ेरो बनालो। तैस्से मरां कूनेरो घोड़, तैस्से मरां खुन्डो, तैस्से मरां धनुष, तैस्से मरां सेभी केरो प्रधान बांदो भोल्हो। तैना एरे बहादर सिपाही केरे ज़ेरे भोल्हे ज़ैना जंगी मां अपने दुश्मन्न च़िकरारे ज़ेरे ढ्लेन्च़तां छ़डतन, तैना लड़ेले, किजोकि यहोवा तैन सेइं साथी रालो, एल्हेरेलेइ तैना बहादर भोइतां लड़ेले ते सुवारां केरि उमीद ट्लुटेली।
“अवं यहूदारे घराने मज़बूत केरेलो, ते यूसुफेरे घरानेरो छुटकारो केरेलो। मीं तैन पुड़ दया एवरीए, एल्हेरेलेइ अवं तैन्न वापस एन्हतां तैन्न तैन केरे मुल्खे मां वापस बसालो; ते तैना एरे भोल्हे, ज़ेन्च़रे तैना मने मरां नईं कढोरे; अवं तैन केरो परमेशर यहोवा आईं, एल्हेरेलेइ तैन केरि प्राथना शुनेलो। एप्रैमी लोक बहादर सिपेहेरे ज़ेरे भोल्हे, ते तैन केरो मन एत्रो खुशी भोल्हो ज़ेत्रो दाछ़रे रस्से सेइं भोते। एन हेरतां तैन केरे बच्चे खुशी भोल्हे ते तैन केरो दिल यहोवारे वजाई सेइं खुशी भोल्हो।
“अवं सीटी बज़ेइतां अपने लोकन अकोट्ठे केरेलो, किजोकि अवं तैन केरो छुटाने बालोईं, ते तैना एरे बधेलो ज़ेरे पेइले बधोरे थिये। चाहे अवं तैन्न कौमन मां तितर-बितर केरि, फिरी भी तैना दूर-दूर मुल्खन मां मीं याद केरेले, ते अपने बच्चन समेत ज़ींते वापस एज्जेले। अवं तैन्न मिस्र मुल्खेरां वापस आनेलो, ते अश्शूर मुल्खे मरां अकोट्ठे केरेलो, ते गिलाद ते लबानोन प्रादेशन मां एन्हतां एत्रे बधेइलो कि तैड़ी लेग्गी न बटेले। तै तैस समुन्दरे मरां भोइतां तैसेरी छ़ेलहन दुबातो गालो ते नील दरियाएरू सब डुग्घू पानी शुक्की गालू। अश्शूरेरू घमण्ड ट्लोड़ू गालू, ते मिस्रेरी शक्ति च़ली गाली। अवं यहोवा तैन्न मज़बूत केरेलो, ते तैना तैसेरे नंव्वे सेइं च़लेले फिरेले,” यहोवा एन ज़ोते।
Source notes (1)
- Cross-reference मत. 9:36;हब. 2:18-19.
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.