Bhadrawahi Bible
श्रेष्ठगीत 6
हे कौन्शन मां बड़ी खूबसूरत,
तेरो ट्लारो कोड़िए?
तेरो ट्लारो कोरहां च़लो जेव
कि अस तीं सेइं साथी तैस तोप्पने च़लम?
लाड़ी
मेरो ट्लारो अपने बागी मां मतलब बलसानेरी
कियैरी केरे पासे जेवरोए,
ताके एपनी बागी मां अपना गब्बां च़ारे ते,
सोसनेरां फूड़ू अकोट्ठां केरे।
अवं अपने ट्लारेरी आईं ते मेरो ट्लारो मेरोए,
तै सोसनेरे फूड़न मां अपना गब्बां च़ारते।
पंच़ोंव गीत
लाड़ो
हे मेरी ट्लारी, तू तिर्सेरी ज़ेरि खूबसूरत आस,
तू यरूशलेमेरी ज़ेरि रूपे बाली आस,
ते झण्डो लहराती सेनारी ज़ेरि खतरनाक आस।
एपनी एछ़्छ़ी मेरे पासेरां उरां फिरा,
किजोकि अवं तैन करां घबराताईं;
तेरे दोग्गेरे बाल छ़ेल्ली केरि केन्नी केरे ज़ेरेन,
ज़ैना गिलादेरे पहाड़े पुड़ेरां उन्ढी ढेलोरी भोन।
तेरे दंत एरे भैड्डां केरि केन्नी केरे ज़ेरेन,
ज़ैना निहेवरी भोन,
ज़ैन मां हर अक भैड जोड़ी बच्चे देती भोए,
ते ज़ैन मरां केन्चेरो साथी नईं मरोरो।
तेरी कनपट्टी तेरे निकाबे हैठ
अनारेरे टुक्ड़े सेइं लेइहोतन।
तैड़ी 60 रैनी ते 80 रखैलां,
ते बेशुमार कुइयां भी आन।
पन मेरी कबूतरी मेरी निर्मल, अनोखी आहे
तै एपनी अम्मरी अक्के,
ते अपने अम्मरी ट्लारीए।
कुइयेईं तै लाई ते तैस जो धन ज़ोवं;
रैनी ते रखैलां तैस लेइतां तैसेरी तारीफ़ केरने लेग्गी।
ई कौने, ज़ेसेरी शोभा झ़ेझ़री ज़ेरिए,
ज़ै चैंदनरी ज़ेरि खूबसूरत
ते दिहाड़ेरे ज़ेरि चमकने बाली,
ते झण्डो फैराने बाले सेनारो ज़ेरो
खतरनाक लेइहोते?
अवं आखोड़ां केरि बागी मां जेई,
ताके तैड़ी खूबसूरत फूड़ू हेरी,
ते हेरी कि दाछ़री बागी मां गुड्डी लेगोरिन
ते अनारेरां फूड़ू लगोरन कि नईं।
मीं पतो भी न थियो कि मेरे खियाले
अवं अपने राजकुमारेरे रथे पुड़ च़ाढ़ी।
सहेली
वापस एई, वापस एई, हे शूलेम्मिन1 वापस एई,
वापस एई कि असां तीं पुड़ नज़र केरम।
लाड़ी
कुन तुस शूलेम्मिन एस तरीके सेइं तकेले,
ज़ेन्च़रे महनैमेरे नाच़े हेरतन?
Source notes (1)
- Footnote शूलेम्मिन इस शब्देरो मतलबे बिलकुल सिद्ध
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.