Bhadrawahi Bible
श्रेष्ठगीत 5
हे मेरी ट्लारी, हे मेरी दुल्हन,
अवं एपनी बागी मां एवरोईं,
मीं अपनो गन्धरस ते बलसान च़ुनो,
मीं कश्शे सने माछ़ी खेवरूए,
मीं अपने दाछ़रो रस ते दुद्ध पियोरूए।
सहेली
हे दोस्तव, तुस भी खाथ,
हे ट्लारव, पीया, खूब रेज़्ज़तां पीया।
च़ेवरोवं गीत
लाड़ी
अवं झ़ुलती थी, पन मेरो मन बींझ़ो थियो।
शुना! मेरो ट्लारो दार गुड़काते, ते तै ज़ोते,
“हे मेरी साथी, हे मेरी ट्लारी, हे मेरी कबूतरी
हे मेरी निर्मल मेरे लेई दार खोल्ल;
किजोकि मेरी क्रोड़ी ओशी सेइं भरोरीए,
ते मेरे दोग्गेरे बाल रातरे ट्लेली सेइं सिज़तन।”1
मीं त लिगड़ां खोलोरां थियां अवं तैन केन्च़रे फिरी लेईं?
मीं त अपने पव धोई छ़डोरेन, हुनी अवं तैन फिरी केन्च़रे मेले केरीं?
मेरे ट्लारे अपनो हथ किवाड़ेरे गत्तेरां बत्तां बेइर कढोरोए,
ते मेरो दिल तैसेरेलेइ धड़कने लगोरोए।
अवं खड़ी उठी, कि अपने ट्लारेरे लेई दार खोल्ली,
ते मेरे हथ्थन सेइं गन्धरस झ़ड़ने लगो,
ते मेरी एंगलोई सेइं मेहलेरे दसतन उन्ढो गन्धरस पेव।
मीं त अपने ट्लारेरे लेई दार त खोल्लू,
पन मेरो ट्लारो तैड़ी न थियो, तै च़लो जेवरो थियो।
ज़ैखन तै ज़ोने लेवरो थियो, तैखन मेरे प्राण डेरि जेवरे थिये।
मीं त तै तोप्पो, पन तै मीं न मैल्हो;
मीं तैस जो हक दित्ती, पन तैनी किछ जुवाब न दित्तो।
पहरदार ज़ैना नगरे मां घुमते थिये, तैना मीं मैल्हे,
तैनेईं मीं मार दित्ती ते ज़खमी की;
ते शहरपनाहरे पहरदारेईं मेरी च़ादर मीं करां थसोड़ी।
हे यरूशलेमेरी कौन्शव, अवं तुसन कसम देइतां ज़ोचां, अगर मेरो ट्लारो तुसन मैल्ही गाए,
त तैस ज़ोइयथ कि अवं प्यारेरी रोगी आईं।
सहेली
हे कौन्शन मां बड़ी खूबसूरत
तेरो ट्लारो होरि ट्लारन मां कोस गल्ली मां रोड़ोए?
तू किजो असन एरी कसम देतिस?
लाड़ी
मेरो ट्लारो छ़ित्तो ते लाल ज़ेरोए,
ते दश हज़ारन मां भी जादे रोड़ोए।
ते तैसेरी क्रोड़ी खालिस सोन्नेरीए; ते तैसेरे दोग्गेरे बाल घुंघरन बालेन,
ते तैसेरे बाल कंव्वेरे ज़ेरे कालेन।
ते तैसेरी एछ़्छ़ी तैन कबूतरां केरि ज़ेरि आन ज़ैना
दुद्धे मां निहेइतां दरियाएरे बन्ने
अपने झुण्डे मां बारां सेइं बिशोरेन।
तैसेरी खैखोड़ी फूड़ू केरि फुलवारी ते बलसानेरी
उभरोरी कियैरी आन।
तैसेरे ओठ सोसनेरां फूड़ू आन ज़ैन सेइं गलतो गन्धरस ट्लिशड़ते।
तैसेरे हथ फीरोज़ै सेइं पलैटोरे ते सोन्नेरे कड़ेन।
तैसेरो जिसम टपकते हाथी दंतां केरो ज़ेरोए, ज़ैना नीलमरे फूड़ू ते हाथी दंतां केरू कम्मे।
तैन केरे पव संगमरमरेरे ज़ेरे खम्भेन ज़ैना खालिस सोन्नेरे पेइड़न पुड़ कायम कियोरेन।
तैना हेरने मां लबानोन ते खूबसूरती मां गैइड़ेरे बुट्टां केरे ज़ेरे रोड़े आन।
तैन केरि ज़बान मैछ़ेरी ज़ेरि मिट्ठी आहे, हाँ तै बड़ी रोड़ीए।
हे यरूशलेमेरी कौन्शव, ईए मेरो ट्लारो ते ईए मेरो दोस्ते।
Source notes (1)
- Cross-reference प्रका. 3:20.
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.