Bhadrawahi Bible
प्रकाशितवाक्य 5
मुहरबन्द किताब ते गबड़ू
ज़ै तखते पुड़ बिशोरो थियो, मीं तैसेरे देइने हथ्थे मां अक किताब लाही, ज़ै अन्त्रमेईं त कने बेइरमेईं लिखोरी थी, ते तै सत मोहरां लेइतां बन्द कियोरी थी। फिरी मीं अक ताकतबर स्वर्गदूत लाव, ज़ै ज़ोरे-ज़ोरे सेइं ई प्रचार केरतो थियो। “इस किताबरो खोल्लने ते इसेरी मोहरां ट्लोड़नेरे काबल कौने?” पन न सुर्गे मां, न धेरती पुड़ न धेरतरे बुन कोई तैस किताबी खोल्लने या तैस पुड़ नज़र केरनेरे काबल मैल्हो। ते अवं ज़ोरे-ज़ोरे सेइं लेरां देने लव, किजोकि तैस किताबरे खोल्लनेरे या तैस पुड़ नज़र केरनेरे काबल कोई न मैल्हो। तैखन तैन बुज़ुर्गन मरां एक्के मीं सेइं ज़ोवं, “लेरां न दे, तक, तै ज़ैस जो यहूदारे गोट्लेरो शेर ज़ोतन, ज़ै दाऊद राज़ेरे खानदाने मरांए तैने तै किताबी खोल्लनेरे ते सत्ते मोहरां ट्लोड़नेरे लेई शैतान हारावरोए।” तैखन मीं तखत ते च़ेवरे प्राणी त कने तैन बुज़ुर्गां केरे मझ़ाटे अक मारोरू गबड़ू लाहू। तैसेरां सत शिन्गां ते सत एछ़्छ़ी थी; इना परमेशरेरी सते आत्मान, ज़ैना सैरी धेरतली पुड़ भेज़ोरिन। गबड़े अग्गर एइतां ज़ै तखते पुड़ बिशोरो थियो तैसेरे देइने हथ्थे मरां तै किताब नेही। ते ज़ैखन तैने किताब नेही, त तै च़ेवरे प्राणी ते चोब्ही बुज़ुर्ग तैस गबड़ेरे सामने झुके; ते हर केन्चेरे हथ्थे मां सारंगी ते धूपे सेइं भरोरे सोन्नेरे कटोरे थिये, इना पवित्र लोकां केरि प्राथनान। त तैना इन नंव्वू गीत ज़ोने लगे,
“तीं कां अधिकारे कि तू मोहरन ट्लोड़स ते इस किताबी खोल्लस,
किजोकि तीं मेरतां अपने खूने सेइं परमेशरेरे लेई हर एक्की कुले मरां, हर भाषाई मरां,
हर लोकन मरां, ते कौमी मरां लोक घिन्नोरेन।”
“तीं तैना राज़े बनाए, तीं तैना याजक बनाए ज़ैना इश्शे प्रभु परमेशरेरे लेई सेवारू कम केरन, ते तैना धेरती पुड़ राज़ां केरू ज़ेरू राज़ केरतन।”
मीं दुबारां तक्कू, त मीं बेशुमार स्वर्गदूतां त च़ेवरे प्राणी ते बुज़ुर्गां केरि आवाज़ शुनी ज़ैना तखतेरे च़ेवरे पासन थिये। तैना ज़ोरे सेइं ज़ोते थी, “मारोरू गबड़ू सामर्थ, धन, ज्ञान, शक्ति, आदर, महिमा, ते कने शुक्रेरे काबले।” फिरी मीं सुर्गे मां ते धेरतली पुड़ त कने धेरतलरे बुन, ते समुन्दरेरी सब चीज़ां, ते सब किछ ज़ैन तैन मांए, इन ज़ोते शुनू कि, “ज़ै तखते पुड़ बिशोरोए तैसेरू त कने गबड़ेरू शुक्र, आदर, महिमा ते राज़, हमेशा राए।” ते च़ेवरे प्रैणेईं आमीन ज़ोवं, ते बुज़ुर्गेईं मथ्थो टेको।
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.