Bhadrawahi Bible
भजन संहिता 89
मुल्खे मां आफतरे वक्ते तारीफ़रू गीत
एतान एज्रा खानदानेरे लोकां केरो मश्कील
अवं यहोवारे प्यारेरे बारे मां हमेशा गीत ज़ोतो रेइलो;
अवं तेरी सच़्च़ाई पीढ़ी करां पीढ़ी तगर ज़ोतो रेइलो।
किजोकि मीं ज़ोवं, “तेरो प्यार सदा बनोरो रालो,
तू सुर्गे मां अपनि सच़्च़ाई कायम रखेलो।”
तीं ज़ोवं, “मीं अपने च़ुनोरे सेइं करार कियोरोए,
ते अपने सेवक दाऊदे सेइं कसम खेवरीए,
अवं तेरे खानदाने हमेशा तगर कायम रखेलो;
ते तेरो तखत पीढ़ी करां पीढ़ी तगर कायम रखेलो।” (सेला)
हे यहोवा, सुर्गे मां तेरे अद्भुत कम्मां केरी,
ते पवित्र लोकां केरि सभाई मां तेरी सच़्च़ेरी तारीफ़ भोल्ही।
किजोकि अम्बरे मां कौन यहोवारो ज़ेरो भोल्हो?
स्वर्गदूतन मां कौन प्रभुएरो ज़ेरो भोइ सकते?
परमेशर पवित्र लोकां केरि सभाई मां बड़ो आदरारे काबले,
ते अपने च़ेवरे पासन सब रानेबालन करां जादे डरेरे काबले।
हे सेना केरे यहोवा परमेशर,
हे यहोवा, तेरे बराबर कौन शेक्ति बालोए?
तेरी सच़्च़ाई त तेरे च़ेवरे पासन आहे!
समुन्दरेरे घमण्डे तूए ट्लोड़तस;
ज़ैखन तैसेरी छ़ेल्ही उछ़ड़तिन, तैखन तू तैन शान्त केरतस।
तीं रहब मारोरां केरो ज़ेरो ढ्लन्च़ोरो,
ते अपने दुश्मन एपनी ताकती सेइं तितर बितर कियोरेन।
अम्बर तेरूए, ते धरती भी तेरीए;
दुनिया ते ज़ैन किछ भी तैस मांए, तैन सब तींए बनेवरूए।
तीं उत्तर ते दक्षिण भी बनेवरूए;
ताबोर पहाड़ ते हेर्मोन पहाड़ तेरे नंव्वेरी जयजयकार केरतन।
तेरी पाखड़ निगर;
ते तेरो हथ ताकतबरे तेरो हथ प्रबले।
तेरे तखतेरी बुनीयाद, धर्म ते न्याये;
प्यार ते सच़्च़ाई तीं अग्री-अग्री च़लतीए।
केत्रे धन आन तैना लोक ज़ैना आनन्देरे ललकारी पिशानतन
हे यहोवा, तैना लोक तेरे तुत्तरेरे लोई मां च़लतन,
तैना तेरे नंव्वेरे खातर सारे दिहैड़ी मघन रहतन,
ते तेरे धर्मेरे वजाई सेइं महान भोइ गातन।
किजोकि तूए तैन केरि ताकतरी शोभा आस,
ते तू असन अपने खुशी सेइं इश्शे शिंगे उच्चो केरेलो।
किजोकि इश्शी ढाल ते सिर्फ यहोवारे तरफांए,
ते इश्शो राज़ो इस्राएलेरे पवित्र परमेशरेरे तरफांए।
एक्की वक्ते तीं अपने भक्ते दर्शन देइतां गल्लां की;
ते ज़ोवं, “मीं मद्दत केरनेरो भार एक्की बहादरे पुड़ रखोरोए,
लोकन मरां अक च़ुनतां अग्रोवं बधावरोए।
मीं अपनो दास दाऊद नेइतां,
ते अपने तेले सेइं तैसेरू अभिषेक कियोरूए।
मेरो हथ तैस सेइं साथी हमेशा भोल्हो,
मेरी पाखड़ तैस मज़बूत रखेली।
दाऊदेरे दुश्मन तैस तंग न केरि सकेले,
ते न बुरो मैन्हु तैस दुख देइ सकेलो।
अवं तैसेरे दुश्मन्न तैसेरे सामनेरां नाश केरेलो,
ते तैसेरे बैरन पुड़ आफत छ़डेलो।
पन मेरी सच़्च़ाई ते दया तैस पुड़ बनोरी राली,
मेरे नंव्वेरे ज़िरिये तैसेरू शिंग उच्चु भोइ गालू।
अवं समुन्दरे तैसेरे हथ्थे हैठ
ते दरियान तैसेरे देइने हथ्थे हैठ केरेलो।
तै मींजो पुकैरतां ज़ोलो, ‘तू मेरो बाजी आस,
तू परमेशर ते मेरे मुक्तरी चट्टान आस।’
अवं तैस अपनु बड्डू मट्ठू,
ते दुनियारे राज़न पुड़ प्रधान ठहरेलो।
अवं अपनो प्यार तैस पुड़ हमेशा बनोरो रखेलो,
ते मेरो करार तैसेरे लेई अटल रालो।
अवं तैसेरू खानदान हमेशा तगर रखेलो,
ते तैसेरो तखत सुर्गेरो ज़ेरो हमेशा बनोरो रालो।
अगर तैसेरे खानदानेरे लोक मेरे कानूने शारन
ते मेरे नियमां केरे मुताबिक न च़लन,
अगर तैना मेरे विधन ट्लोड़न,
ते मेरे हुक्मन न मन्न,
त अवं तैन पापेरी सज़ाह सोटे सेइं,
ते तैन केरे अधर्मेरी सज़ाह कोड़न सेइं देलो।
पन अवं तैस पुड़ेरां अपनो प्यार दूर न केरेलो,
ते न सच़्च़ाई शैरतां झूठो ठहरालो।
ते अपनो करार न ट्लोड़ेलो,
ते ज़ैन मेरे ऐशी मरां निस्सी जेवं, तैस न बदलेलो।
मीं एक्की बार अपने पवित्रतारी कसम खेवरीए;
ते अवं दाऊदे कधे धोखो न देइलो।
ते तैसेरू खानदान हमेशा रालू,
ते तैसेरो तखत दिहाड़ेरो ज़ेरो मेरे सामने चमकतो रालो।
तै चैंदनरो ज़ेरो हमेशा च़लतो रालो,
ते अम्बरेरे वफादार गवाहेरो ज़ेरो सदा बनोरो रालो।” (सेला)
फिरी भी तीं अपनो अभिषिक्त राज़ो रद कियो ते तै शारो,
ते तू तैस पुड़ क्रोधे भोवरोस।
तीं अपने दासे सेइं कियोरो करार रद कियो,
ते तैसेरू ताज तल्ले बिछ़ड़तां अशुद्ध कियोरूए।
तीं तैस नगरेरी सैरी दिवारां ट्लोड़ी छ़ेडी,
ते तैसेरे क़िले उज़ैड़ी छ़डे।
सब बत्तां च़लनेबाले, तैस लुटतन,
ते तैसेरे पड़ोसन करां तैसेरी बदनामी भोतीए।
तीं तैसेरे विरोधी प्रबल किये;
ते तैसेरे सारे दुश्मन खुश कियोरेन।
फिरी तू तैसेरी तलवारारी धार ट्लोड़तस,
ते जंगी मां तैस ज़ींतने न देस।
तीं तैसेरी शान खतम की
ते तैसेरो तखत ज़मीनी पुड़ शैरी दित्तोरोए।
तीं तैसेरी जुवानी घटाई,
तै शरमी सेइं छ़ुपेइतां छ़डोरोए। (सेला)
हे यहोवा, तू केइस तगर लगातार तुत्तर छ़ुपेइतां रालो,
ते सरक कैखन तगर अग्गरी ज़ेरि भटकती राली?
मीं याद केर, कि मेरी ज़िन्दगी केत्री घटे,
तीं सब इन्सान किजो बेकारे मां बनाए?
कौन मैन्हु हमेशा अमर रालो?
कुन कोई अपने प्राणे पाताले करां बच़ेइ सकते? (सेला)
हे प्रभु, तेरो ज़ुमाना केरो प्यार कोड़ि राव,
ज़ेसेरे बारे मां तीं अपने सच़्च़ेरी कसम दाऊदे सेइं कियोरी थी?
हे प्रभु, अपने दासां केरि बदनामी याद केर;
अवं त सब ताकतबर कौमां केरो बोझ घिन्तां रहताईं।
तेरे तैन दुश्मनेईं त हे यहोवा,
तेरे अभिषिक्ते पत्ती पेइतां तैसेरी बदनामी कियोरीए।
यहोवा हमेशा धन रालो,
आमीन, फिरी आमीन।
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.