Bhadrawahi Bible
भजन संहिता 78
परमेशर ते तैसेरे लोक
आसापेरो मश्कील
हे मेरे लोकव, मेरी शिक्षा शुना;
मेरे गल्लां केरे पासे ध्यान देथ!
अवं अपनि ज़बान कहावतां ज़ोनेरे लेई खोलेलो;
अवं पुराने ज़मानेरी छ़ेपोरी गल्लां बियान केरेलो।1
ज़ैना गल्लां असेईं शुनी, ते असन पतो लग्गो,
ते इश्शे दादे पड़दादेईं असन सेइं ज़ोवं।
तैन अस अपने खानदाने करां छ़ुपेइतां न रखमेले,
पन एजने बैली पीढ़रे लोकन करां,
यहोवारी तारीफ़ ते तैसेरी शक्ति
ते चमत्कारां केरे बारे मां ज़ोमेले।2
किजोकि तैनी याकूबे मां अक गवाही ठहराई,
इस्राएले मां कानून च़लाव,
ज़ेसेरे बारे मां तैने इश्शे पूर्वजन हुक्म दित्तो,
कि तुस एन अपने-अपने बाल बच्चन शिखैलथ;
ताके एजने बाले पीढ़रे लोक, मतलब ज़ैना बच्चे पैदा भोने बालेन, तैना इन ज़ानन;
ते अपने-अपने बाल-बच्चन सेइं इन केरे बारे ज़ोने मां तियार भोन।
ज़ैस सेइं तैना परमेशरे पुड़ भरोसो रखन, परमेशरेरे बड़े कम्मन न बिसरन,
पन तैसेरो हुक्म मन्ते रान;
ते अपने बुज़ुर्गां केरे ज़ेरे न भोन,
तैस पीढ़रे लोक त ज़िद्दी ते झगड़ो केरनेबाले थिये,
ते तैनेईं अपनो मन कायम न थियो कियोरो,
ते न तैन केरि आत्मा परमेशरेरे लेई सच़्च़ी राई।3
एप्रैमी लोकेईं त शास्त्रधारी ते धनुषधारी भोने पुड़ भी,
जंगरे मौके पिठ हरेवरी थी।
तैनेईं परमेशरेरो करार पूरो न कियो,
ते तैसेरे कानूने पुड़ च़लने करां इन्कार कियो।
तैनेईं तैसेरे बड़े कम्मन ते ज़ैना चमत्कार तैने तैन केरे सामने कियोरे थिये,
तैना बिसरे।
तैने त तैन केरे दादे पड़दादां केरे सामने मिस्र मुल्खेरे सोअनेरे4 मैइदाने मां महान कम्मां कियोरां थियां।
तैने समुन्दर दूई हिस्से केरतां तैना तैस पार कढे,
ते पानी ढेरेरू ज़ेरू खड़ू कियूं।5
दिहैड़ी तैनी बिदलारारे ज़िरिये
ते सैरी राती बेलति अग्गरी लौअरे ज़िरिये तैन केरि अगवाई की।
रेगिस्ताने मां तैनी चट्टानां ट्लेइतां,
धेरतरू डुग्घू पानी पियावं।6
तैनी चट्टानी मरां गड्डां केढी,
ते पानी दरियां केरू ज़ेरू बगाऊं।
फिरी भी तैना इब्रानी लोक तैसेरे खलाफ जादे पाप केरते जे,
बल्के रेगिस्ताने मां परमप्रधान परमेशरेरे खलाफ खड़े भोते जे।
ते अपने मेर्ज़रे मुताबिक रोट्टी मेगतां मने-मने मां परमेशरेरो इंतज़ार कियो।
तैनेईं परमेशरेरे खलाफ ज़ोवं,
ते ज़ोने लगे, “कुन परमेशर जंगले मां मेज़ लेई सकते?
तैने चट्टानी पुड़ बैइतां पानी त रुड़ाव,
ते गड्डां उछ़ड़ने लेग्गी,
पन कुन तै रोट्टी भी देइ सकते?
कुन तै अपने लोकां केरे लेई मास भी तियार केरि सकते?”
एन शुन्तां यहोवा सरक अई,
तैखन याकूबेरे खलाफ अग लेग्गी जेई,
ते तैसेरो क्रोध इस्राएले पुड़ भड़को;7
एल्हेरेलेइ कि तैनेईं परमेशरे पुड़ विश्वास न थियो,
तैना तैसेरी मुक्ति केरनी शेक्ति पुड़ भरोसो कियो।
फिरी भी तैने अम्बरे हुक्म दित्तो,
ते सुर्गेरे दारां खोल्लां;
तैन केरे खानेरे लेई अम्बरेरां मन्नो बखाव,
तैन सुर्गेरां अन्न दित्तू।8
मैन्हन स्वर्गदूतां केरि रोट्टी मैल्ही,
तैनी तैन मन पसंद रोट्टी दित्ती।
तैनी अम्बरे मां पूर्वेरां हवा च़लाई,
ते एपनी शेक्ति सेइं दक्षिणी हवा च़लाई।
तैनी मित्तरू ज़ेरू खुल्लू मास तैन जो बखावं,
समुन्दरेरी रेतरां ज़ेरां बेशुमार च़ुड़ोलू भेज़ां;
तैन्ना केरे डेरन मां तैना एजने लगां,
तैन केरे घरां केरे आसे-पासे ज़मीनी मां तैना बिछ़ड़ने लगां।
तैखन तैना खेइतां रेज़्ज़ी जे,
ते तैने तैन केरि इच्छा पूरी की।
पन तैन केरि इच्छा बनोरी राई,
ते ड्लाछ़ोड़ो हेजू तैन केरे ऐशी मां थियूं,
कि परमेशरेरो क्रोध तैन पुड़ भेड़की जेव,
तैनी तैन केरे हट्टे कट्टे लोक नाश किये,
इस्राएलेरे जुवान बिछ़ोड़े।9
एना सैरी गल्लां केरे बावजूद भी तैना अपने पापन मां बद्धते जे;
ते तैसेरे बड्डे-बड्डे कम्मन पुड़ विश्वास न कियो।
एल्हेरेलेइ तैनी तैन केरे दिहाड़े निकम्मे गुज़रने दित्ते,
ते तैन केरे साल घबराहटी मां कट्टाए।
ज़ैखन तै तैन मारने लग्गे, तैखन तैना तैस पुछ़ते थिये;
ते मुड़तां परमेशरे दिले सेइं तलाश केरने लगे।
तैखन तैन याद एइतू थियूं कि परमेशर इश्शी चट्टाने,
ते परमप्रधान परमेशर इश्शो छुटानेबालोए।
फिरी भी तैनेईं तैसेरी चापलूसी की;
तैनेईं तैस सेइं झूठ ज़ोवं।
किजोकि न तैन केरो दिल तैन केरे पासे मज़बूत थियो;
ते न तैना तैसेरे करारेरे बारे मां सच़्च़े थिये।10
पन परमेशर ज़ै दया केरनेबालोए, तै अधर्मे माफ़ केरते, ते नाश न केरे;
तै बार-बार अपने सरकी ठंडी केरते,
ते अपनि जलजलाहट पूरे तरीके सेइं भड़कने न दे।
किजोकि तैस याद थियूं कि तैना नाश भोनेबाले इन्सानन,
इना हवारे ज़ेरे आन ज़ै च़ली गातीए ते वापस न एज्जे।
बियाबाने मां तैना केत्रे फेरेईं तैसेरे खलाफ भोए
ते बगैर पैनेरे मुल्खे मां तै उदास कियो!
बार-बार तैना परमेशरे अज़माते थिये,
ते इस्राएलेरे पवित्र परमेशरे परेशान केरते थिये।
तैनेईं न त तैसेरी ताकत याद की,
न तै दिहाड़ी ज़ैखन तैनी तैना दुश्मना केरे कब्ज़े करां छुटाए;
कि तैनी केन्च़रे अपने निशान मिस्रे मां
ते अपने चमत्कार सोअनेरे मैइदाने मां कियोरे थिये।
तैनी मिस्री केरे दरिया खून बनाए,
ते तैना अपने दरियां केरू पानी पी न बटे।11
तैनी तैन मां डांघाल भेज़े, ज़ैना तैन खाने लगे,
ते मैंडू तैन मां भेज़ां, ज़ैनेईं तैना तबाह किये।
तैनी तैन केरे ज़मीनरी पैदावार कीड़न,
ते तैन केरे ज़मीनदैरारो फल टिट्टन दित्तोरो थियो।
तैन केरे दाछ़रे बूटे तैनी आणी सेइं,
ते तैन केरे गूलरेरे बुट आणी बखेइतां तबाह किये।
तैनी तैन केरे जानबर आणी सेइं,
तैन केरां गोरू गब्बां च़ड़कन सेइं नाश कियां।
तैनेईं तैन पुड़ अपनो बड़ो जादे क्रोध ते सरक भड़काई,
ते तैना मुसीबती मां छ़डे,
ते दुख देनेबाले बड़े दूत भेज़े।
तैनी एपनी सरकरे लेई बत बनाई,
ते तैन केरे प्राण मौती करां न बच़ाए,
पन तैना आफतरे हवाले किये।
मिस्रे मां तैनी सारे बड्डे बच्चे मारे,
ज़ैना हामेरे12 डेरन मां ताकतरे पेइले फल थिये;
पन तैनी अपने लोक गब्बां केरे ज़ेरे च़लाए
ते जंगले मां तैन केरि अगवाई जानबरां केरे झुण्डेरी ज़ेरि की।
तैखन तैना तैसेरे च़लाने सेइं बेधड़क च़ले ते तैन किछ डर न भोव,
पन तैन केरे दुश्मन समुन्दरे मां डुबी जे।
ते तैने तैना अपने पवित्र मुल्खेरी सरहद्दी तगर,
इस्से पहाड़ी मुल्खे13 मां पुज़ाए, ज़ै तैने अपने देइने हथ्थे सेइं हासिल कियोरो थियो।
तैने तैन केरे सामने गैर कौमां निशैनी;
ते तैन केरि ज़मीनरी डोरी नैपतां बेंटी दित्ती;
ते इस्राएलेरे गोट्ल तैन केरे डेरन मां बसाए।
फिरी भी तैनेईं परमप्रधान परमेशरेरी अज़मैइश की ते तैस सेइं बगावत की,
ते तैसेरो कानून न मन्नो,
ते मुड़तां अपने बुज़ुर्गां केरे ज़ेरे धोखेबाज़ भोए;
तैनेईं निकम्मे धनुषेरे सामने धोखो दित्तो।
किजोकि तैनेईं उच्ची ठारां बनेइतां तैस सरक दुवाई,
ते घेड़ोरि मूरती केरे ज़िरिये तैस मां जलन पैदा कराई।
परमेशर शुन्तां क्रोधे सेइं भेरि जेव,
ते तैने इस्राएल बिलकुल शैरी दित्तो।
तैनी शीलोरे नगरेरे घरे,
मतलब तैस तेम्बु ज़ै तैने मैन्हु केरे दरमियान खड़ो कियोरो थियो, शैरी दित्तो,
ते तैनी अपनि ताकत गुलैमी मां गाने दित्ती,
ते अपनि शोभा दुश्मना केरे कब्ज़े की।
अपनि कौम तैनी तलवारारी सेइं मारी,
ते अपने खास हिस्सेरे खलाफ सरकी सेइं भेरि जेव।
तैन केरे जुवान अग्गी सेइं भस्म भोइ जे,
ते तैन केरि अड्लैही कुइयां केरे ड्लाहेरां गीतां भी न ज़ोआं।
तैन केरे याजक तलवारी सेइं मारे जे,
ते तैन केरि विधवा कौन्शन शोग मनाने न दित्तो।
तैखन प्रभु ज़ेन्च़रे निड्लारां बींझ़ो,
ते एरे बहादरेरो ज़ेरो उठ्ठो ज़ै दाछ़रो रस पीतां ललकारतो भोए।
तैने अपने दुश्मन मैरतां पत्रोवं हटाए;
ते तैन केरि सदा बदनामी कराई।
तैस मौके तैनी यूसुफेरो तेम्बु शारो;
ते एप्रैमेरे गोट्ले मरां कोई न च़ुनो;
पन यहूदारे गोट्ले,
ते अपनु ट्लारू सिय्योन पहाड़ च़ुनू।
तैनी अपनि पवित्र ठार बड़ी उच्ची बनाई,
ते धेरतरी ज़ेरि मज़बूत बनाई, ज़ेसेरी बुनीयाद तैने हमेशारे लेई छ़डी।
फिरी तैनी अपनो दास दाऊद च़ुनतां छ़ेल्ली भैड्डां केरे बाड़े मरां कुजव;
तै तैस बच्चन बैली भैड्डन पत्ती-पत्ती फिरने करां आनो
कि तै तैसेरे लोक याकूबेरी मतलब तैसेरे खास हिस्से इस्राएलेरी रखवाली केरे।
तैखन तैने सच़्च़े मने सेइं तैन केरि रखवाली की,
ते अपने माहिर हथ्थन सेइं तैन केरि अगवाई की।
Source notes (13)
- Cross-reference मत. 13:35.
- Cross-reference व्यव. 4:9;यहो. 4:6-7;इफि. 6:4.
- Cross-reference 2 राज़. 17:14-15.
- Footnote सोअनेरे इस नगरे जो रामसेस भी ज़ोतन। (निर्ग. 1:11)
- Cross-reference निर्ग. 14:21-29.
- Cross-reference निर्ग. 17:6;गिन. 20:11;1 कुरि. 10:4.
- Footnote याकूब ते इस्राएलेरो अक मतलबे, एन्च़रे इब्रानी लोकां केरे ज़ोनेरो तरीकोए।
- Cross-reference निर्ग. 16:4;यूह. 6:31.
- Cross-reference 1 कुरि. 10:5.
- Cross-reference प्रेरित. 8:21.
- Cross-reference निर्ग. 7:17-21;भज. 105:29.
- Footnote हामेरे हाम नूहेरू मट्ठू थियूं उत्प. 10:6
- Footnote पहाड़ी मुल्खे सिय्योन पहाड़
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.