Bhadrawahi Bible
भजन संहिता 61
बचावेरे लेई प्राथना
बज़ानेबालां केरे प्रधानेरे लेई तारीबाले बाज़े सेइं दाऊदेरू भजन
हे परमेशर, मेरी बिनती शुन,
मेरे प्राथनारे पासे ध्यान दे।
अवं दुनियारे आखरी कूने पुड़ेरां तीं पुकारेलो,
ज़ै चट्टान मेरे लेई उच्चीए, तैस पुड़ मीं ने;
किजोकि तूए मेरी छ़पनेरी ठारस,
ते दुश्मन करां बच़ानेरे लेई उच्चो क़िलोस।
अवं हमेशा तेरे तेम्बु मां बनोरो रेइलो।
अवं तेरे फंघन हैठ छ़ेपतां रेइलो।
किजोकि हे परमेशर, तीं मेरी मिन्नतां शुनी,
ज़ैना तेरे नंव्वे करां डरतन, तैन केरो हिस्सो तीं मीं दित्तोरोए।
राज़े तू लम्मी उमर बखशेलो;1
तैसेरे साल पीढ़ी-पीढ़ी केरे बराबर भोल्हे।
तै हमेशा तगर परमेशरेरे हज़ूरी मां रालो;
तू अपनि दया ते सच़्च़ाई तैसेरी हिफाज़तरे लेई ठहरेइतां रख।
एन्च़रे सेइं अवं सदा तेरे नंव्वेरू भजन ज़ोइ-ज़ोइ
अपनि मिन्नतां रोज़ पूरी केरेलो।
Source notes (1)
- Footnote राज़े तू लम्मी उमर बखशेलो तैसेरे एजने बाले पीढ़रे लोक राज़गेद्दी पुड़ बिश्शेले।
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.