Bhadrawahi Bible
भजन संहिता 57
दुश्मन्न करां बच़नेरे लेई प्राथना
बज़ानेबालां केरे प्रधानेरे लेई अल-तशहेतेरे रागे मां दाऊदेरो मिक्ताम; ज़ैखन शाऊले करां नेशतां कुढी मां छ़ेप्पी जेवरो थियो
हे परमेशर, मीं पुड़ दया केर, मीं पुड़ दया केर,
किजोकि अवं तेरी शरणी मां रहताईं;
ते ज़ांतगर मीं पुड़ेरां आफतां टेली न गान,
तांतगर अवं तेरे फंघन हैठ शरण नेइतां रेइलो।
अवं परमप्रधान परमेशरे कां बिनती केरेलो,
परमेशरे ज़ै मेरे लेई सब किछ केरते।
परमेशर सुर्गेरां जुवाब देलो ते मीं बच़ालो,
ज़ैखन मेरो निगलने बालो निन्दा केरि राहोरो भोए। (सेला)
परमेशर अपनि दया ते सच़्च़ाई बांदी केरेलो।
मेरी जान शेरां केरे मझ़ाटे,
मीं फुकने बालां केरे दरमियान लेटनू पेते,
मतलब एरे लोकां केरे दरमियाने मां ज़ैन केरे दंत बर्छी ते तीरन,
ते ज़ैन केरि ज़िभ तेज़ तलवारे।
हे परमेशर तू सुर्गे मां बा बड़ो महान ते महिमा बालोस,
ते तेरी महिमा सैरी धेरती पुड़ फैली गाए!
मेरे दुश्मनेईं मेरे पव्वां केरे लेई ज़ाल बछ़ेइतां छ़डोरूए;
ते मेरी जान ढेली गातीए।
तैनेईं मेरे सामने गत घड़ेरू आहे,
पन एप्पु तैस मां बिछ़ड़ी गानेन। (सेला)
हे परमेशर, मेरो दिल पक्कोए, ते मेरो मन पक्कोए,
ते गीत ज़ोइलो बल्के भजन किरतन केरेलो।
हे मेरे मन खड़े भो! हे सैन्गी ते सितार बींझ़ां;
अवं दिहाड़ो निसने करां पेइले बींझ़ेलो।
हे प्रभु, अवं मुल्खे-मुल्खेरे लोकां केरे दरमियान तेरू शुक्र केरेलो;
रियासतां-रियासतां केरे लोकन मां तेरू भजन ज़ोइलो।
किजोकि तेरी करुणा सुर्गे तगर उच्चीए,
ते तेरी सच़्च़ाई अम्बरे तगर पुज़तीए।
हे परमेशर तू अम्बरे मरां बा बड़ो महानस!
तेरी महिमा सारे धेरती पुड़ फैली गाए!
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.