Bhadrawahi Bible
भजन संहिता 40
तारीफ़रू अक गीत
प्रधान बज़ानेबालेरे लेई दाऊदेरू भजन
अवं सबरी सेइं यहोवारो इंतज़ारे केरतो राव;
ते तैने मेरे पासे झुकतां मेरी बिनती शुनी।
तैनी अवं नाश भोनेरे खड्डे
ते च़िकरी मरां खिचतां कढो,
तैनी मेरे पव चट्टानी पुड़ खड़े किये,
मेरे पव मज़बूत कियोरेन।1
यहोवा मेरी ज़बानी पुड़ अक नंव्वू गीत शिखालू,
ज़ैन इश्शे परमेशरेरे तारीफ़रू आहे।
बड़े लोक एन हेरेले ते तैसेरी महिमा केरेले,
ते यहोवा पुड़ भरोसो रख्खेले।
धने तै मैन्हु,
ज़ै यहोवा पुड़ भरोसो रखते,
ज़ै अभिमानी ते झूठां केरे पासे
मुड़ने बालां केरे पासे तुत्तर न फिरातो भोए।
हे मेरे यहोवा परमेशर, तीं बड़ां कम्मां कियोरन!
ज़ैना चमत्कार ते विचार तू इश्शे लेई केरतस
तैना बड़े आन; तेरे बराबर कोई नईं!
अवं त सोचताईं कि खोलतां तैन केरे बारे मां ज़ोईं,
पन तैन केरि गिनती न भोइ सके।
मेलबेलि ते अन्नबेलि सेइं तू खुश न भोस
तीं मेरे कन खोलोरेन।
होमबलि ते पापेरी बलि तीं न चाई।
तैखन मीं ज़ोवं,
“हेर, अवं एवरोईं; किजोकि किताबी मां
मेरे बारे मां एरू लिखेरूए।
हे मेरे परमेशर,
अवं खुशी सेइं तेरी मर्ज़ी पूरी केरताईं;
ते तेरो कानून मेरे अन्तर बेस्सी जेवरोए।”2
मीं बड़े लोकन मां तेरे धार्मिकतारी खुशखबरी शुनेवरीए;
हेर, मीं अपनु आशी बन्द नईं कियोरू हे यहोवा,
तू इन ज़ानतस।
मीं तेरी धार्मिकता मने मां नईं रख्खोरी;
मीं तेरी सच़्च़ाई
ते तेरे कियोरे मुक्तरी गलबात कियोरीए;
मीं तेरी करुणा ते सच़्च़ाई बड़े सभाई करां छ़पोरी न रख्खी।
हे यहोवा, तू भी मीं पुड़ेरां अपनि बड़ी दया न हटा।
तेरे करुणा ते सच़्च़े सेइं लगातार
मेरी हिफाज़त भोती राए!
किजोकि अवं बेड़ी बुरैइयन सेइं घिरोरो आईं;
मेरे बुरे कम्मेईं अवं ट्लेइतां रख्खो
ते अवं नज़र न केरि सेकी।
तैन केरि गिनती मेरे दोग्गेरे बालन करां जादे;
एल्हेरेलेइ मेरो दिल ट्लुटी जेव।
हे यहोवा, महरबानी केरतां मीं छुटा!
हे यहोवा, मेरी मद्दत केरनेरे लेई लूश केर!
ज़ैना मेरे जानरे दुश्मन आन,
तैना शरमिन्दा भोन;
ते तैना पत्रोवं हटाए ते बेइज़्ज़त किये गान
ज़ैना मेरे नुकसाने सेइं खुश भोतन।
ज़ैना मीं सेइं, “आहा, आहा,” ज़ोतन,
तैना एपनी शरमरे मारे तबाह भोन।
पन तैना लोक ज़ैना तीं कां एइतन,
तैना सब तेरे वजाई सेइं खुश
ते मघन भोन; ज़ैना तेरे कियोरे मुक्ति चातन,
तैना लगातार ज़ोते रान, “यहोवारी तारीफ़ भोए!”
अवं त गरीब ते ज़रूरतमन्द आईं,
फिरी भी प्रभु मेरी फिक्र केरते।
तू मद्दतगार ते छुटानेबालो आस;
हे मेरे परमेशर मेरी मद्दत केरनेरे लेई च़िर न ला।
Source notes (2)
- Cross-reference प्रका. 5:9;14:3;भज. 52:6.
- Cross-reference इब्रा. 10:5-7.
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.