Bhadrawahi Bible
भजन संहिता 26
एक्की सच़्च़े मैन्हेरी प्राथना
दाऊदेरू भजन
हे यहोवा, मेरो न्याय केर,
किजोकि अवं सच़्च़ैई सेइं च़लतो एवरोईं;
ते मेरो भरोसो यहोवा पुड़ अटल बनोरोए।
हे यहोवा, मीं जांच ते परख;
मेरे मने ते दिले परख।
किजोकि तेरी करुणा मेरी एछ़्छ़ी केरे सामने,
अवं तेरी सच़्च़ेरी बत्ती पुड़ च़लतो राहोरोइं।
अवं निकम्मी चाल च़लनेबालन सेइं साथी न बिश्शो,
ते न अवं कपटी लोकन सेइं साथी कोन्ची गेईं;
अवं कुकर्मी लोकां केरि सेंगती सेइं नफरत रखताईं,
ते दुष्टन सेइं साथी न बिशेलो।
अवं अपने हथ्थन इन हिरानेरे लेई धोइलो कि अवं बेकसूर आईं,
तैखन हे यहोवा अवं तेरी वेदी कां एज्जेलो।1
ताके तेरू शुक्र बड़े उच्ची आवाज़ी सेइं केरीं,
ते तेरे चमत्कारेरे कम्मां केरू बियान केरीं।
हे यहोवा अवं तेरे भवने सेइं
तेरी महिमारे रानेरे ठारी सेइं प्यार रखताईं।
मेरे प्राण पापी लोकन सेइं साथी,
ते मेरी ज़िन्दगी खूनी मैन्हन सेइं साथी न मिला।
तैना त बुरे कम्मन मां लग्गोरे रहतन,
ते तैन केरो देइनो हथ रिश्पती सेइं भरोरो रहते।
पन अवं त सच़्च़ैई सेइं च़लतो रेइलो।
तू मीं छुटा, ते मीं पुड़ दया केर।
मेरे पव बराबर ठैरी खड़े आन;
सभान मां अवं यहोवारी तारीफ़ केरेलो।
Source notes (1)
- Cross-reference भज. 73:13.
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.