Bhadrawahi Bible
भजन संहिता 148
सारे सृष्टरे लेई परमेशरेरी तारीफ़
यहोवारी तारीफ़ केरा।
सुर्गे मरां यहोवारी तारीफ़ केरा,
उच्ची ठैरी पुड़ेरां तैसेरी तारीफ़ केरा।
हे यहोवारे सारे दूतव, तैसेरी तारीफ़ केरा,
हे तैसेरी सैरी सेनाव, तैसेरी तारीफ़ केरा।
हे दिहाड़ां, ते हे चाँदनी, तैसेरी तारीफ़ केरा,
हे सारे चमकते तारव, तैसेरी तारीफ़ केरा।
हे उच्चे अम्बरव,
ते अम्बरेरे बेइयों पानी, तुस दूईये तैसेरी तारीफ़ केरा।
तैना यहोवारे नव्वेंरी तारीफ़ केरन,
किजोकि तैनी ज़ोवं त तैन वजूदे मां अव।
ते तैनी तैन हमेशा हमेशारे लेई कायम केरतां छ़डोरूए;
ते एरी विधि ठहराई, ज़ैना टलनेरी नईं।
ज़मीनी पुड़ेरां यहोवारी तारीफ़ केरा,
हे समुन्दरेरे अजगरव, ते डुग्घे समुन्दर,
हे अग ते आण, ते हिवं, ते धुन्द,
हे तैसेरे हुक्मे पुड़ च़लनेबाली आँधी!
हे पहाड़व, ते निक्की पहैड़ी,
ते फल देनेबाले बुट्टव, ते सारे गैइड़!
हे जंगली जानबरव, ते पैलतू जानबरव,
हे पेटेरे भारे च़लनेबाले जीपव ते हे च़ुड़ोलव!
हे दुनियारे राज़व, ते रियासतां-रियासतां केरे सब लोकव,
हे हाकिमव ते धेरतरे सब न्याय केरनेबालव!
हे जुवान मट्ठव ते कुइयव,
ते सियानव ते बच्चव!
यहोवारे नंव्वेरी तारीफ़ केरा,
किजोकि सिर्फ तैसेरू नवं महाने;
तैसेरी आदर ज़मीन ते आसमाने मांए।
तैनी अपने लोकां केरे लेई अक शिंग1 उच्चु कियोरूए,
इन तैसेरे सब भक्तां केरे लेई
मतलब सारे इस्राएली लोकां केरे लेई ते तैसेरे नेड़े रानेबाले लोकां केरे लेई तारीफ़ केरनेरो विषय आहे।
यहोवारी तारीफ़ केरा।
Source notes (1)
- Footnote शिंग तैन अपने लोक मज़बूत बनाए
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.