Bhadrawahi Bible
भजन संहिता 115
मूरती फुज़ूल ते परमेशरेरी वफादारी
हे यहोवा, इश्शी नईं, इश्शी नईं, बल्के अपने नव्वेंरी महिमा,
ते एपनी दयाई ते सच़्च़ाइयरे खातर केर।
कौमां-कौमां केरे लोक असन किजो पुछ़न,
“तैन केरो परमेशर कोड़ि राव?”
इश्शो परमेशर त सुर्गे मांए;
तैने ज़ैन चाऊ तैन्ने कियोरूए।
तैन गैर लोकां केरि मूरती सोन्ने चैंदरी त आन,
तैना मैन्हु केरे हथ्थेरी बेनोरिन।
तैन आशी त भोते पन तैना गल न केरि बटन;
तैन केरि एछ़्छ़ी त भोतिन पन तैना लेही न बटन।
तैन केरे कन त भोतन, पन शुनी न बटन,
तैन केरां नक्कां त भोतन, पन शिंघी न बटन।
तैन केरे हथ त भोतन, पन कोन्ची सेइं हुरी न बटन,
तैन केरे पव त भोतन, पन तैना च़ेलि न बटन;
ते तैन केरे गलेरां कोई आवाज़ न निस्सी बटे।
ज़ेरि तैना आन तेरहे तैन केरे बनाने बालेन;
ते तैन पुड़ सब भरोसो रखनेबाले भी तेरहे भोइ गान।
हे इस्राएल, यहोवा पुड़ भरोसो रख!
ते मद्दत केरनेबालो, ते ढाल तैए आहे।
हे हारूनेरे घराना,1 यहोवा पुड़ भरोसो रख!
ते मद्दत केरनेबालो, ते ढाल तैए आहे।
हे यहोवा करां डरने बालाव, यहोवा पुड़ भरोसो रखा
तुश्शी मद्दत केरनेबालो, ते ढाल तैए आहे।
यहोवा असां याद कियोरेम, ते तैए असन बरकत देलो;
तै इस्राएली लोकन बरकत देलो;
तै हारूनेरे घराने बरकत देलो।
कुन निकड़े कुन बड्डे
ज़ेत्रे यहोवा करां डरनेबालेन, तै तैन बरकत देलो।
यहोवा तुसन ते तुश्शे खानदाने भी बद्धातो गाए।
यहोवा ज़ै अम्बर ते ज़मीन बनानेबालोए,
तैसेरे तरफां तुसन बरकत मैल्हे।
सुर्ग त यहोवारू आहे,
पन धरती तैनी मैन्हु केरे हवाले कियोरीए।
मुड़दे ज़ेत्रे भी च़ुप आन,
तैना यहोवारी तारीफ़ न केरि बटन।
पन असां लोक यहोवा जो,
हुन्ना करां लेइतां हमेशा तगर धन ज़ोते राले,
यहोवारी तारीफ़ केरा!
Source notes (1)
- Footnote हारूनेरे घराना परमेशरेरे याजक
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.