Bhadrawahi Bible
भजन संहिता 113
तारीफ़रे काबल नवं
यहोवारी तारीफ़ केरा।1
हे यहोवारे सेवकव, तारीफ़ केरा,
यहोवारे नंव्वेरी तारीफ़ केरा!2
यहोवारू नवं
हुन्ना करां लेइतां हमेशा तगर धन ज़ोवं गाए!
झ़ेझ़ां दिहाड़ो निसने करां देइतां ड्लवझ़ी दिहाड़ो डुबने तगर,
यहोवारू नवं तारीफ़रे काबले।
यहोवा सैरी कौमन पुड़ महाने,
ते तैसेरी महिमा अम्बरे करां भी उच्चीए।
इश्शे परमेशर यहोवारे बराबर कौने?
तै त उच्ची ठैरी तखते पुड़ बिशोरोए।
ते तै अम्बर ते ज़मीनी पुड़
तकनेरे लेई उन्ढे तकते।
तै कंगाले मित्ती पुड़ां
ते ज़रूरतमन्दे मांज़नी पुड़ेरां खड़े केरतां उच्चो केरते।
कि तै तैस प्रधान्न सेइं साथी,
मतलब अपने लोकां केरे प्रधान्न सेइं साथी बिशाले।
तै बेऔलाद कौन्शी घरे मां खुशी मनाने बाली अम्मा बनाते।
यहोवारी तारीफ़ केरा!
Source notes (2)
- Footnote यहोवारी तारीफ़ केरा हालेलुय्याह
- Cross-reference अय्यू. 36:7.
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.