Bhadrawahi Bible
भजन संहिता 102
अक जुवान मुसीबती मां प्राथना केरते
एक्की दुखी मैन्हेरी प्राथना ज़ैने एपनी शिकायतां यहोवा परमेशरेरे सामने रेखी
हे यहोवा मेरी प्राथना शुन;
मेरी मद्दतरे लेई बिनती तीं तगर पुज़्ज़े।
ज़ैखन अवं मुसीबती मां भोईं अपनु तुत्तर मीं करां न छ़ुपा,
अपनो कन मेरे पासे ला;
ज़ैखन अवं बिनती केरी, तैस वक्ते जल्दी केर!
किजोकि मेरे ज़िन्दगरे दिहाड़े तूंएरे ज़ेरे छ़ेप्पी गातन,
मेरी हेड्डी अग्गरी ज़ेरि फुकोई जेई।
मेरो दिल घासेरे ज़ेरो शुक्की जेव;
ते अवं रोट्टी खानी भी बिसरताईं
करलाते-करलाते चमड़ी हेड्डन सेइं ज़ुड़ी जेई।
अवं जंगलेरे बुल्लेरो ज़ेरो भोइ जेवरोईं,
घरेण्डे मां निकड़े बुल्लेरो ज़ेरोईं।
अवं बिछ़ाने मां बींझ़ो रहताईं,
ते लाए पुड़ अकैल्लो च़ुड़ोलवेरो ज़ेरोईं।
मेरे दुश्मन लगातार मेरी बदनामी केरतन,
ज़ैना मेरो मज़ाक बनातन,
तैना मेरू नवं घिन्तां होरन जो लान तान केरतन।
मीं रोट्टरी ज़ेरि मांज़न खाइ, ते ऐंखरू मिलेइतां पानी पीवं।
इन तेरे क्रोध ते सरकरे वजाई सेइं भोवं,
किजोकि तीं अवं खड़ो कियो, ते फिरी बिछ़ोड़ो।
मेरे ज़िन्दगरे दिहाड़े ड्लवझ़रे मौके दिहाड़ी डुबनेरे ज़ेरेन;
अवं घासेरो ज़ेरो शुकने लगोरोइं।
पन तू हे यहोवा, तू हमेशा तखते पुड़ रालो,
ज़ैस नंव्वे सेइं तेरी याद भोतीए,
तैन पीढ़ी करां पीढ़ी तगर बनोरू रालू।
तू खड़े भोइतां सिय्योने पुड़ दया केरेलो।
किजोकि तैस पुड़ दया केरनेरो रखोरो वक्त एवरोए।
एल्हेरेलेइ कि तेरे दास तैसेरे घोड़न चातन,
ते तैसेरां घरैंड़ां केरि धूड़ी पुड़ दया केरतन।
एल्हेरेलेइ कौमां-कौमां केरे लोक यहोवारे नंव्वेरो डर मन्नेले,
ते दुनियारे सारे राज़े तेरी महिमारो डर मन्नेले।
किजोकि यहोवा सिय्योने फिरी आबाद केरेलो,
ते तै एपनी महिमाई सेइं फिरी बांदो भोल्हो।
गरीबां केरि प्राथना पुड़ तै ध्यान देते,
ते तैन केरि प्राथना घटिया न ज़ाने।
इना गल्लां एजने बैली पीढ़रे लेई लिखी गैली,
ताके ज़ै कौम पैदा भोल्ही, तै यहोवारी तारीफ़ केरे।
किजोकि यहोवा अपने उच्चे ते पवित्र ठारी पुड़ेरां तक्कू,
तैनी सुर्गे पुड़ेरां ज़मीनी पुड़ नज़र दित्तोरीए।
ताके कैदी केरू करलानू शुने,
ते मरने बालां केरि बेड़ी खोल्ली।
तैखन लोक सिय्योने मां यहोवारे नंव्वेरू बियान केरेले,
ते यरूशलेमे मां भी तैसेरी तारीफ़ की गाली;
इन तैस वक्ते भोल्हु ज़ैखन लोक मुल्खे-मुल्खे,
ते रियासतां-रियासतां केरे लोक यहोवारी आराधना केरनेरे लेई अकोट्ठे भोल्हे।
यहोवा मेरी ज़िन्दगरे सफरे मां दुख देइतां
मेरी ताकत ते उमर घिटेवरीए।
मीं ज़ोवं, “हे मेरे परमेशर, मीं एध्धी उमरी मां न सलाह,
ते साल पीढ़ी-पीढ़ी तगर राले!”
शुरू मां धेरतरी बुनीयाद रख्खी;
ते तीं अपने हथ्थेइं सेइं अम्बर बनावं।
धरती ते अम्बर त तबाह भोइ गालू, पन तू सदा कायम रालो;
एन सब लिगड़ेरू ज़ेरू पुरानू भोइ गालू,
तू तैस लिगड़ेरो ज़ेरो बदलेलो, ते तैन मिटी गालू।
पन तू तैड़ी आस,
ते तेरे साल कधे खतम न भोल्हे।
इश्शे बच्चे तेरे दास तेरे हज़ूरी मां बस्सोरे राले,
ते तैन केरि औलाद तेरे सामने कायम राली।
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.