Bhadrawahi Bible
कहावतां 31
राज़े सलाह
लमूएल राज़ेरे प्रभाव केरनेबाले वचन, ज़ैना तैसेरी अम्मा तैस शिखाले।
हे मेरे मट्ठा, हे मेरे अपने मट्ठा!
हे मेरी मिन्नतां कियोरे मट्ठा!
अपनि ताकत कौन्शन न दे,
न अपनि ज़िन्दगी तैन केरे कैबू मां केर ज़ैना राज़न बरबाद केरतिन।
हे लमूएल, राज़न दाछ़रो रस पीनो शोभा न दे,
ते शराब चानी, रईस लोकन न शोभे;
एरू न भोए कि तैना पीतां कानूने बिसरन
ते कोन्ची दुखी मैन्हेरे हक्के मारन।
शराब तैस पियाथ ज़ै मरने पुड़े,
ते दाछ़रो रस परेशान मने बाले देनो;
ज़ैस सेइं तैना पीतां अपनि गरीबी बिसरन
ते अपने सकत मेहनती फिरी याद न केरन।
तैन केरे लेई ज़ो ज़ैना अपने लेई न ज़ोइ सकन,
ते सब अनाथां केरो न्याय जाइज़ तरीके सेइं केर।
अपनु आशी खोल्ल ते धार्मिकताई सेइं न्याय केर,
ज़रूरतमन्द ते गरीबां केरो न्याय केर।
रोड़े चाल चलने बाली कौन्श
भली कौन्श कौन हासिल केरि सकते?
किजोकि तैसेरी कीमत हीरे मोतन करां भी बड़ी जादे भोतीए।
तैसेरे मुन्शेरे मने मां तैसेरेलेइ विश्वासे,
ते तै कधी गरीब न भोल्हो।
तै अपने ज़िन्दगरे सारे दिहाड़न मां तैस सेइं बुरो नईं,
बल्के भलो सलूख केरतीए।
तै उन ते सन तोप्पी-तोप्पी,
अपने हथ्थन सेइं खुशी सेइं कम केरतीए।
तै बुपारेरे ज़िहाज़ां केरे ज़ेरे अपनि खानेरी चीज़ां दूरेरां मगातीए।
तै झ़ेझ़ां सुबेले उठतीए,
ते अपने टब्बरे रोट्टी खुवातीए
ते अपनि दैसन अलग-अलग कम देतीए।
तै कोन्ची उडारेरे बारे मां सोच विचार केरतीए
ते तैस घिन्नतीए; ते अपने मेहनतरे फले सेइं दाछ़री बाग लातीए।
तै अपनि कमर ज़ोरे सेइं कसतीए,
ते अपने पैखड़न मज़बूत बनातीए।
तै परखतीए कि मेरो बुपार फैइदेरोए।
राती तैसेरो दीयो न हिश्शे।1
तै अटेरने मां हथ लातीए,
ते जंट्ल ट्लेइतां तैस च़लातीए।
तै गरीबेरे लेई मुठड़ी खोल्लतीए,
ते गरीबे सम्भालनेरे लेई हथ अग्रोवं केरतीए।
तै अपने घरानेरे लेई हिंवे करां न डरे,
किजोकि तैसेरे घरेरे सब लोक लाल लिगड़ां लातन।
तै च़ादर बनातीए;
तैसेरे लिगड़ां सूक्ष्म सन ते बैंगनी रंगेरां भोतन।
ज़ैखन तैसारो मुन्श सभाई मां नगरेरे बुज़ुर्गन सेइं साथी बिशते,2
तैखन तैसेरी आदर भोतीए।
तै सनेरां लिगड़ां बनेइतां बेच़तीए;
ते बुपैरी कमरबन्ध देतीए।
तै ताकत ते इज़्ज़तरू लान लातीए,
ते एजने बाले कालेरे बारे मां हसतीए।
तै अक्लरी गल ज़ोतीए,
ते तैसेरी गल्लां दयारी शिक्षारे मुताबिक भोतिन।
तै अपने घरानेरे चाल च़लने ध्याने सेइं हेरतीए,
ते अपनि रोट्टी बगैर मेहनतां न खाए।
तैसेरे बच्चे उठी-उठी तैस धन ज़ोतन,
तैसेरो मुन्श भी उठतां तैसेरी एरी तारीफ़ केरते:
“बड़े कौन्शेइं रोड़ां-रोड़ां कम्मां त कियोरन पन तू तैन सेब्भन मां रोड़ी आस।”
शोभा त झूठी ते खूबसूरती बेकारे,
पन ज़ै कौन्श यहोवारो डर मन्नतीए, तैसेरी तारीफ़ की गाली।
तैसेरे हथ्थां केरि मेहनतरो फल तैस देथ,
ते तैसेरे कम्मन सेइं सभाई मां तैसेरी तारीफ़ भोल्ही।
Source notes (2)
- Footnote राती तैसेरो दीयो न हिश्शे तै राती च़िरे तगर कम केरतीए
- Footnote साथी बिशते गलबात केरने फैसलेरे लेई बिशते
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.