Bhadrawahi Bible
कहावतां 16
मनेरी योजना मैन्हेरे कैबू मां रहतीए,
पन आखरी मां जुवाब यहोवारे तरफां भोते।
मैन्हेरो सारो चाल च़लन एपनी नज़री मां पवित्र ठहरते,
पन यहोवा मैन्हेरी आत्मा परखते।1
अपने कम्मन यहोवा पुड़ छ़ड,
इस सेइं तेरे खियाल सिद्ध भोल्हे।
यहोवा सब चीज़ां खास मकसदेरे लेई बनेवरिन,
बल्के दुष्ट भी मुसीबत भोगनेरे लेई बनेवरोए।
सब मनेरे घमण्डी लोकन सेइं यहोवा नफरत केरते;
अवं मज़बूती सेइं ज़ोताईं, एरे लोक बेकसूर न ठहरेले।
यहोवारे लेई सच़्च़े प्यार ते वफादैरारे ज़िरिये सेइं,
तैने इश्शे पाप माफ़ कियोरेन।
ज़ैखन केन्चेरो चाल च़लन यहोवा पसंद एइते,
तैखन तै तैसेरे दुशमनां केरो भी तैस सेइं मेल कराते।
अन्यायेरे बड़े फैइदे सेइं,
न्याय सेइं थोड़ू हासिल केरनू रोड़ूए।
मैन्हु मने मां अपने बत्ती पुड़ खियाल केरते,
पन यहोवा तैसेरे पव्वन कायम रखते।
राज़ेरे ऐशी मरां परमेशरेरी अक्ल निसतीए,
न्याय केरने मां तैस करां गलती न भोए।
सच़्च़ी ट्लकड़ी ते पलड़े यहोवारे तरफां भोतन,
थेली मां ज़ेत्रे तोल भोतन, सब तैसेरे बनेवरेन।
बुरू केरनू राज़ां केरे लेई भिट्टू कम्मे,
किजोकि तैन केरो तखत धार्मिकताई सेइं टिकोरो रहते।
धर्मेरी गल ज़ोनेबालन सेइं राज़ो खुश भोते,
ते ज़ै सिद्धी गल्लां ज़ोते, तैस सेइं तै प्यार रखते।
राज़ेरी सरक मौतरे दूतेरी ज़ेरिए,
पन अक्लमन्द मैन्हु तैस ठंडी केरते।
राज़ेरे तुत्तरेरी चमकी मां ज़िन्दगी रहतीए,
ते तैसेरी खुशी बरसांतरे आखरी बिदलारारी ज़ेरि भोतीए।
अक्ल हासिल केरनी शुद्ध सोन्ने करां बड़ी रोड़ीए!
ते समझ़ हासिल केरनी चैंदी करां बेद्धतां काबले।
बुरैई करां दूर भोनू धर्मी लोकां केरे लेई रोड़ी बत्ते,
ज़ै अपने चाल च़लनेरी एतिहात केरते, तै अपने प्राणेरी भी हिफाज़त केरते।
नाशे करां पेइले अहंकार,
ते ठोकर खाने करां पेइलू घमण्ड एइते।
घमण्डी लोकन सेइं साथी लूट बन्टने करां,
हलीम लोकन सेइं साथी नम्र भावे सेइं रानू ठीके।
ज़ै वचने पुड़ मन लाते, तै ज़िन्दगी मां तरक्की हासिल केरते,
ते ज़ै यहोवा पुड़ भरोसो रखते, तै धन भोते।
ज़ेसेरे दिले मां अक्ले, तैस जो समझ़ी बालो ज़ोवं गाते,
ते रोड़ी गल्लां केरे ज़िरिये ज्ञान बद्धते।
ज़ैस मां अक्ले, तैसेरेलेइ तै ज़िन्दगरे पैनेरो नागे,
पन बेवकूफेरी सज़ाह एप्पु तैसेरी बेवकूफी आहे।
अक्लमन्द मैन्हेरो मन तैसेरे तुत्तरे पुड़ भी अक्लमन्दी बांदी केरते,
ते तैसेरे वचने मां विद्या रहतीए।
मन पसंद वचन मैछ़ी सेइं भेरतां कशेरे ज़ेरे प्राणन मिट्ठे लगतन,
ते हेड्डन हेरी-भेरि केरतन।
एरी भी बत्ते, ज़ै मैन्हु सिद्धी लगतीए,
पन तैसेरे आखरी मां मौते मैलतीए।
मेहनती मैन्हेरी खुवैइश तैसेरेलेइ मेहनत केरतीए,
तैसेरी ढ्लुख त तैस उकसाती रहतीए।
बुरो मैन्हु बुरी योजना कढते,
ते तैसेरे गल्लन सेइं अग लेग्गी गाचे।
बुरो मैन्हु बेड़ि लड़ैई बनाते,
ते चोगली केरनेबालो पक्के दोस्तन मां भी फूट छ़डते।
ज़ुलमी मैन्हु अपने पड़ोसी टपलेइतां बुरी बत्ती पुड़ च़लते।
अछ़ मारनेबालो धोखेरे खियाल केरते,
ते ओठ दबाने बालो बुराई केरते।
सुफेद बाल शोभारू ताज ठहरतन;
तैना धार्मिकतारे बत्ती पुड़ च़लने सेइं हासिल भोतन।
च़िरे सेइं क्रोध केरनो बहदरी,
ते अपनो मन कैबू मां रखनो, नगर ज़ींतने करां रोड़ूए।
चिट्ठी छ़डी गाती त आहे,
पन तैसेरू कढनू यहोवारे तरफां भोते।
Source notes (1)
- Footnote आत्मा परखते योजनां केरो न्याय केरते
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.