Bhadrawahi Bible
गिनती 27
सलोफादेरे कुइयां केरि बिनती
तैखन यूसुफेरे मट्ठे मनश्शेरे खानदानेरे कुलन मरां सलोफाद, ज़ैन हेपेरेरू मट्ठू ते गिलादेरू पोट्लड़ू, ते मनश्शेरे मट्ठे माकीरेरू पड़पोट्लड़ू थियूं, तैसेरी कुइयां ज़ैन केरू नवं महला, नोवा, होग्ला, मिल्का, ते तिर्सा आन, तैना तैस कां एई। ते तैना मूसे ते एलीआजर याजकेरे प्रधानां केरी सैरी मेण्डलरे सामने मिलापे बाले तेम्बेरे दारे पुड़ खेड़ि भोइतां ज़ोने लेगि, “इश्शो बाजी जंगले मां मेरि जेव; पन तै तैस मेण्डली मरां न थियो, ज़ैना लोक कोरह केरी मेण्डली सेइं साथी भोइतां ज़ैना यहोवारे खलाफ अकोट्ठी भोवरी थी, तै अपने पापेरी वजाई सेइं मेरि जेव; ते तैसेरू कोई मट्ठू न थियूं। ते इश्शे बाजी केरू नवं तैसेरे कुले मरां किजो मिटी गाए? इश्शे चाचन सेइं साथी असन भी किछ ज़मीन इश्शो हिस्सो केरतां दित्तो गाए।” ते तैन केरी तै बिनती मूसे यहोवा शुनाई। यहोवा मूसे सेइं ज़ोवं, “सलोफादेरी कुइयां ठीक ज़ोतिन; एल्हेरेलेइ तू तैन केरे चाचन सेइं साथी तैन भी ज़रूर किछ ज़मीन तैन केरो अपनो हिस्सो केरतां दे, मतलब तैन केरे बाजी केरो हिस्सो तैन केरे हथ्थे सौंफी दे। ते इस्राएली लोकन सेइं एन ज़ो, ‘अगर कोई मैन्हु बगैर मट्ठेरे मेरि गाए, त तैसेरो हिस्सो तैसेरी कुइयरे हथ्थे सौंफनो। ते अगर तैसेरी कोई कुई भी न भोए, त तैसेरो हिस्सो तैसेरे ढ्लान देनो। ते अगर तैसेरे कोई ढ्ला भी न भोन, त तैसेरो हिस्सो तैसेरे चाचन देनो। ते अगर तैसेरो कोई चाचो भी न भोए, त तैसेरे कुले मरां तैसेरो ज़ै कुटमे मां सेब्भन करां नेड़ो भोए तैस तैसेरो हिस्सो देनो, ताके तै तैसेरो अधिकारी भोए, इस्राएली लोकां केरे लेई एहे न्यायेरी विधि भोल्ही। ज़ेन्च़रे कि यहोवा मूसे हुक्म दित्तो।’”
यहोशू च़ुनो गाते
फिरी यहोवाए मूसे सेइं ज़ोवं, “इस अबारीम नंव्वेरी पहाड़े पुड़ गा ते उस मुल्खे हेर, ज़ै मीं इस्राएली लोकन दित्तोरोए। ते ज़ैखन तू तैस हेरेलो, तैखन तू अपने ढ्ला हारूनेरो ज़ेरो अपने लोकन मां मिली गालो। किजोकि सीन नंव्वेरे जंगले मां तुसेईं दूइयेईं मेण्डलरे लोकां केरे खलाफत केरनेरे वक्ते मेरो हुक्म ट्लोड़तां मीं सेइं मुखालफत की, ते अवं नागे कां तैन केरे नज़री मां पवित्र न ठहराव।” (ऐह मरीबा नव्वेंरो नागे ज़ै सीन नंव्वेरी जंगले कादेशे मां आए) मूसे यहोवा सेइं ज़ोवं, “यहोवा ज़ै सेब्भी प्राणी केरे आत्मारो परमेशरे, तै इस मेण्डलरे लोकन पुड़ कोन्ची मैन्हु ठहराए, ज़ै तैसेरे सामने एइतो गातो राए, ते ज़ै तैन केरो कढने बालो ते बिशालने बालो भोए, ज़ैस सेइं यहोवारी मण्डली बगैर पुहालेरे भैड्डां छ़ेल्ली केरी ज़ेरी न राई।” यहोवा मूसे सेइं ज़ोवं, “तू नूनेरू मट्ठू यहोशू साथी नेइतां तैस पुड़ हथ रेखां, तै त एरहो मैन्हुए, कि ज़ैस मां मेरी आत्मा बस्सोरीए; ते तैस एलीआजर याजकेरे ते सैरी मेण्डलरे सामने खड़े केरतां तैन केरे सामने तैस हुक्म दे। ते एपनी महिमाई मरां किछ तैस दे, ज़ैस सेइं इस्राएली लोकां केरी सारी मण्डली तैसेरो हुक्म मन्ने। ते तै एलीआजर याजकेरे सामने खड़ो भोतो राए, ते एलीआजर तैसेरेलेइ यहोवा करां ऊरीमेरो1 हुक्म पुछ़तो राए; ते तै इस्राएली लोकां केरी सारी मण्डली समेत तैसेरे ज़ोने सेइं तैना बेइर गान ते तैसेरे ज़ोने सेइं तैना अन्तर एज्जन।” यहोवारे इस हुक्मेरे मुताबिक मूसे यहोशू नेइतां एलीआजर याजक ते सैरी मेण्डलरे सामने खड़ो केरतां, तैस पुड़ हथ रख्खे, ते तैस हुक्म दित्तो, ज़ेन्च़रे कि यहोवा मूसेरे ज़िरिये ज़ोवरू थियूं।
Source notes (1)
- Footnote ऊरीम ऊरीम ते तुम्मीम रीतरे मुताबिक दूई चीज़ां थी, मुमकिने कि तैना घोड़ या नकाश्शी कियोरी चीज़ां थी, ज़ैना परमेशरेरी मर्ज़ी हाँ या न ज़ान्नेरे लेई महायाजकेरे लेई ज़रूरी थी।
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.