Bhadrawahi Bible
गिनती 2
इस्राएली लोकां केरे डेरे
फिरी यहोवाए मूसे ते हारूने सेइं ज़ोवं, “इस्राएली लोक तैस मिलापे बाले तेम्बु कां च़ेवरे पासन अपने-अपने झण्डे ते अपने-अपने सियाना केरे गोट्लां केरे निशानेरे झण्डे कां अपने डेरे खड़े केरन। ते पूर्वेरे पासे ज़ैस पासेरां दिहाड़ो निस्ते, अपने-अपने टोली केरे मुताबिक डेरे लान, तैन्ना यहूदारे डेरन बाले झणडेरे लोक भोल्हे, ते तैन केरो प्रधान अम्मीनादाबेरू मट्ठू नहशोन भोल्हु, ते तैन केरे दलेरे गनोरे मड़द 74600 आन। ते तैन केरे नेड़े ज़ैना डेरे लाएले तैना इस्साकारेरे गोट्लेरे लोक भोल्हे, ते सूआरेरू मट्ठू नतनेल तैन केरो प्रधान भोल्हो, ते तैन केरे दलेरे गनोरे मड़द 54400 आन। ते तैन केरे नेड़े जबूलूनेरे गोट्लेरे लोक राले, ते तैन केरो प्रधान हेलोनेरू मट्ठू एलीआब भोल्हु, ते तैन केरे दलेरे गनोरे मड़द 57400 आन। ते एस्से तरीके सेइं यहूदारे डेरन मां ज़ेत्रे भी अपने-अपने दलां केरे मुताबिक गनोरे मैन्हु सब मिलेइतां 186400 आन। पेइले तैन्ना अग्री-अग्री च़लन।
“मिलापे बालेरे तेम्बेरे दक्षिणेरे पासे रूबेनेरे डेरां केरे झणडेरे लोक अपने-अपने दलां केरे मुताबिक रान, ते तैन केरो प्रधान शदेऊरेरू मट्ठू एलीसूर भोल्हु, ते तैन केरे दलेरे गनोरे मड़द 46500 आन। ते तैन केरे नेड़े ज़ैना डेरे लान तैना शिमोनेरे गोट्लेरे भोल्हे, ते तैन केरो प्रधान सूरीशद्दैरू मट्ठू शलूमीएल भोल्हु, ते तैन केरे दलेरे गनोरे मड़द 59300 आन। फिरी गादेरे गोट्लेरे लोक भी रान, ते तैन केरो प्रधान रूएलेरू मट्ठू एल्यासाप भोल्हु, ते तैन केरे दलेरे गनोरे मड़द 45650 आन। रूबेनेरे डेरन मां ज़ेत्रे भी अपने-अपने दलां केरे मुताबिक गनोरे सब मिलेइतां 151450 मैन्हु आन। दूइयोवं बारी अग्रोवं गानेरी तैन केरि भोल्ही।
“तैन पत्पती ते सब डेरन मझ़मेइं लेवी केरे डेरां केरे लोक मिलेइतां मिलापे बाले तेम्बु अग्रोवं च़ले, ज़ेन्च़रे सेइं तैना डेरे लाएले, तेन्च़रे सेइं तैना अपने-अपने झण्डे सेइं साथी-साथी च़लन।
“मिलापे बाले तेम्बेरे पश्चिमेरे पासे एप्रैमेरे डेरां केरे झणडेरे लोक अपने-अपने दलां केरे मुताबिक रान; ते तैन केरो प्रधान अम्मीहूदेरू मट्ठू एलीशामा भोल्हु, ते तैन केरे दलेरे गनोरे मड़द 40500 आन। ते तैन केरे नेड़े मनश्शेरे गोट्लेरे लोक रान, ते तैन केरो प्रधान पदासूरेरू मट्ठू गम्लीएल भोल्हु, ते तैन केरे दलेरे गनोरे मड़द 32200 आन। फिरी बिन्यामीनेरे गोट्लेरे लोक रान, ते तैन केरो प्रधान गिदोनेरू मट्ठू अबीदान भोल्हु, ते तैन केरे दलेरे गनोरे मड़द 35400 आन। एप्रैमेरे डेरन मां ज़ेत्रे भी अपने-अपने दलां केरे मुताबिक गनोरे मैन्हु सब मिलेइतां 108100 मड़द आन। ट्लेइयोवं अग्रोवं च़लनेरी बारी तैन केरि भोल्ही।
“उत्तरेरे पासे दानेरे डेरां केरे झणडेरे लोक अपने-अपने दलां केरे मुताबिक रान; ते तैन केरो प्रधान अम्मीशद्दैरू मट्ठू अहीएजेर भोल्हु, ते तैन केरे दलेरे गनोरे मड़द 62700 आन। तैन कां ज़ैना नेड़े डेरे लान तैना आशेरेरे गोट्लेरे भोल्हे, ते तैन केरो प्रधान ओक्रानेरू मट्ठू पगीएल भोल्हु, ते तैन केरे दलेरे गनोरे मड़द 41500 आन। फिरी तैन केरे बाद नप्ताली गोट्लेरे लोक रान, ते तैन केरो प्रधान एनानेरू मट्ठू अहीरा भोल्हु, ते तैन केरे दलेरे गनोरे मड़द 53400 आन। ते दानेरे डेरन मां ज़ेत्रे भी अपने-अपने दलां केरे मुताबिक गनोरे मैन्हु सब मिलेइतां 157600 आन, तैना सब अपने झण्डे कां साथी रेइतां सेब्भन करां पत्पती च़लन।”
इस्राएली लोकन मरां ज़ैना अपने-अपने सियाना केरे घरानेरे मुताबिक गने जेवरेन तैना इन्ना आन; ते तैना सब डेरां केरे लोक ज़ेत्रे मड़द अपने-अपने दलां केरे मुताबिक गने जेवरेन, तैना सब मिलेइतां 603550 थिये। पन यहोवाए मूसे ज़ै हुक्म दित्तोरो थियो तैसेरे मुताबिक लेवी लोक त इस्राएली लोकन मां न थिये गनोरे।
एन्च़रां सेइं ज़ै-ज़ै हुक्म यहोवाए मूसे दित्तोरो थियो, इस्राएली लोक तैन हुक्मां केरे मुताबिक अपने-अपने कुल ते अपने-अपने सियाना केरे घराना केरे मुताबिक, अपने-अपने झण्डे कां डेरे लाते थिये, ते अग्रोवं भी सफर केरते थिये।
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.