Bhadrawahi Bible
गिनती 1
इस्राएली लोकां केरि गिनती
इस्राएली लोकां केरे मिस्र मुल्खे मरां निसनेरे दूइयोवं सालेरे दूइयोवं महीनेरे पेइले दिहाड़े, यहोवा सीनैरे सुनसान ठैरी मां रानेरे वक्ते मिलापे बाले तेम्बु मां, मूसे सेइं ज़ोवं, “सारे इस्राएली लोकां केरि मेण्डलरे कुलां ते सियानां केरे घराना केरे मुताबिक, सब मड़दां केरि गिनती नवं घिन्तां केरथ। ज़ेत्रे इस्राएली लोक 20 साल या तैस करां जादे उमरारे भोल्हे, ते ज़ैना जंग केरनेरे काबल भोन, तैन सेब्भन तैन केरे टोली केरे मुताबिक तू ते हारून गेनथ। ते हर एक्की गोट्लेरो अक मड़द ज़ै अपने सियानां केरे घरानेरो प्रधान भोए त तै तुश्शी मद्दत केरनेरे लेई तुसन सेइं साथी राए। ज़ैना लोक तेरी ते हारूनेरी मद्दत केरेले तैन केरां नंव्वां इना आन: रूबेनेरे गोट्ले मरां शदेऊरेरू मट्ठू एलीसूर; शिमोनेरे गोट्ले मरां सूरीशद्दैरू मट्ठू शलूमीएल; यहूदारे गोट्ले मरां अम्मीनादाबेरू मट्ठू नहशोन; इस्साकारेरे गोट्ले मरां सूआरेरू मट्ठू नतनेल; जबूलूनेरे गोट्ले मरां हेलोनेरू मट्ठू एलीआब; यूसुफेरे खानदाने मरां इना आन: यूसुफेरे मट्ठे एप्रैमेरे गोट्ले मरां अम्मीहूदेरू मट्ठू एलीशामा, ते यूसुफेरे होरि मट्ठे मनश्शेरे गोट्ले मरां पदासूरेरू मट्ठू गम्लीएल। बिन्यामीनेरे गोट्ले मरां गिदोनी एरू मट्ठू अबीदान; दानेरे गोट्ले मरां अम्मीशद्दैरू मट्ठू अहीएजेर; आशेरेरे गोट्ले मरां ओक्रानेरू मट्ठू पगीएल; गादेरे गोट्ले मरां दूएलेरू मट्ठू एल्यासाप; नप्ताली एरे गोट्ले मरां एनानेरू मट्ठू अहीरा।” मण्डली मरां ज़ैना मड़द अपने-अपने सियाना केरे गोट्ले मरां प्रधान बनेइतां कुजेवरे थिये, तैना इना आन, ते इस्राएली केरे गोट्लन मां प्रधान थिये।
ज़ैन मैन्हु केरां नंव्वां बह लिखोरन, तैना साथी नेइतां मूसे ते हारूने, दूइयोवं महीनेरे पेइले दिहाड़े सारे लोकन समेत अकोट्ठे किये, ते तैखन इस्राएली लोकेईं अपने-अपने कुल ते अपने-अपने सियाना केरे घरानेरे मुताबिक 20 साल या तैस करां जादे उमरारे मैन्हु केरि नंव्वां गिनती केरतां अपनि-अपनि खानदानी लिखाई; ज़ैस तरीके सेइं यहोवाए मूसे हुक्म दित्तोरो थियो तैसेरे मुताबिक तैनी सीनैरे सुनसान ठैरी मां तैन केरि गिनती की।
ते इस्राएलेरे बड्डे मट्ठे रूबेनेरे खानदाने मरां ज़ेत्रे मड़द अपने कुलां ते अपने सियाना केरे घराना केरे मुताबिक 20 सालां केरे थिये या तैस करां जादे उमरारे थिये, ते ज़ैना जंग केरनेरे काबल थिये, ते तैना सब अपने-अपने नंव्वे सेइं गने जे; तैना एन्च़रे सेइं आन: ते रूबेनेरे गोट्ले मरां गनोरे मड़द 46500 थिये।
शिमोनेरे खानदाने मरां ज़ेत्रे मड़द अपने कुलां ते अपने सियाना केरे घराना केरे मुताबिक 20 साल या तैस करां जादे उमरारे थिये, ते ज़ैना जंग केरनेरे काबल थिये, ते तैना सब अपने-अपने नंव्वें सेइं गने जे।
ते शिमोनेरे गोट्ले मरां गनोरे मड़द 59300 थिये। गादेरे खानदाने मरां ज़ेत्रे मड़द अपने कुलां ते अपने सियाना केरे घराना केरे मुताबिक 20 साल या तैस करां जादे उमरारे थिये, ते ज़ैना जंग केरनेरे काबल थिये, ते तैना सब अपने-अपने नंव्वें सेइं गने जे। ते गादेरे गोट्ले मरां गनोरे मड़द 45650 थिये।
यहूदारे खानदाने मरां ज़ेत्रे मड़द अपने सियाना केरे कुलां केरे मुताबिक 20 साल या तैस करां जादे उमरारे थिये, ते ज़ैना जंग केरनेरे काबल थिये, तैना सब अपने-अपने नंव्वें सेइं गने जे। तैना इना थिये। ते यहूदारे गोट्ले मरां गनोरे मड़द 74600 थिये।
इस्साकारेरे खानदाने मरां ज़ेत्रे मड़द अपने कुलां ते अपने सियाना केरे घराना केरे मुताबिक 20 साल या तैस करां जादे उमरारे थिये, ते ज़ैना जंग केरनेरे काबल थिये, तैना सब अपने-अपने नंव्वें सेइं गने जे; ते इस्साकारेरे गोट्ले मरां गनोरे मड़द 54400 थिये।
जबूलूनेरे खानदाने मरां ज़ेत्रे मड़द अपने कुलां ते अपने सियाना केरे घराना केरे मुताबिक 20 साल या तैस करां जादे उमरारे थिये, ते ज़ैना जंग केरनेरे काबल थिये, तैना सब अपने-अपने नंव्वें सेइं गने जे; ते जबूलूनेरे गोट्ले मरां गनोरे मड़द 57400 थिये।
यूसुफेरे मट्ठन मरां एप्रैमेरे खानदाने मरां ज़ैना मड़द अपने कुलां ते अपने सियाना केरे घराना केरे मुताबिक 20 साल या तैस करां जादे उमरारे थिये, ते ज़ैना जंग केरनेरे काबल थिये, ते तैना सब अपने-अपने नंव्वें सेइं गने जे; ते एप्रैमेरे गोट्ले मरां गनोरे मड़द 40500 थिये।
मनश्शेरे खानदाने मरां ज़ेत्रे मड़द अपने-अपने कुलां ते सियाना केरे घराना केरे मुताबिक 20 साल या तैस करां जादे उमरारे थिये, ते ज़ैना जंग केरनेरे काबल थिये, ते तैना सब अपने-अपने नंव्वें सेइं गने जे; ते मनश्शेरे गोट्ले मरां गनोरे मड़द 32200 थिये।
बिन्यामीनेरे खानदाने मरां ज़ेत्रे मड़द अपने कुलां ते अपने सियाना केरे घराना केरे मुताबिक 20 साल या तैस करां जादे उमरारे थिये, ते ज़ैना जंग केरनेरे काबल थिये, ते तैना सब अपने-अपने नंव्वें सेइं गने जे: ते बिन्यामीनेरे गोट्ले मरां गनोरे मड़द 35400 थिये।
दानेरे खानदाने मरां ज़ेत्रे मड़द अपने कुलां ते अपने सियाना केरे घराना केरे मुताबिक 20 साल या तैस करां जादे उमरारे थिये, ते ज़ैना जंग केरनेरे काबल थिये, तैना सब अपने-अपने नंव्वें सेइं गने जे: ते दानेरे गोट्ले मरां गनोरे मड़द 62700 थिये।
आशेरेरे खानदाने मरां ज़ेत्रे मड़द अपने कुलां ते अपने सियाना केरे घराना केरे मुताबिक 20 साल या तैस करां जादे उमरारे थिये, ते ज़ैना जंग केरनेरे काबल थिये, ते तैना सब अपने-अपने नंव्वें सेइं गने जे: ते आशेरेरे गोट्ले मरां गनोरे मड़द 41500 थिये।
नप्ताली एरे खानदाने मरां ज़ेत्रे मड़द अपने कुलां ते अपने सियाना केरे घराना केरे मुताबिक 20 साल या तैस करां जादे उमरारे थिये, ते ज़ैना जंग केरनेरे काबल थिये, ते तैना सब अपने-अपने नंव्वें सेइं गने जे: ते नप्ताली एरे गोट्ले मरां गनोरे मड़द 53400 थिये।
एन्च़रे मूसे ते हारूने ते इस्राएली केरे 12 प्रधानेईं, ज़ैना अपने-अपने सियाना केरे घराना केरे मुताबिक प्रधान थिये, तैना सब गने, ते तैन केरि एहे गिनती थी। ते ज़ेत्रे इस्राएली लोकन मरां ज़ैना 20 साल या तैस करां जादे उमरारे थिये, ते ज़ैना जंग केरनेरे काबल थिये, तैना सब अपने सियानां केरे घराना केरे मुताबिक गने जे। ते तैना सब गनोरे मड़द मिलेइतां 603550 थिये।
लेवी गोट्ल अलग कियूं गानू
इन मां लेवी गोट्लेरे लोक अपने सियाना केरे गोट्लेरे मुताबिक न थिये गनोरे। किजोकि यहोवाए मूसे सेइं ज़ोवरू थियूं, “लेवी गोट्लेरे लोकां केरि गिनती इस्राएली लोकन सेइं साथी न केरां; पन तू लेवी लोकन मिलापे बाले तेम्बु पुड़, ते तैसेरे सारे सामाने, मतलब ज़ैन किछ तैस सेइं ज़ुड़ोरूए तैन सब चीज़न पुड़ अधिकारी च़ुना; ते सब सामान तैना छ़ून, ते तैन केरि हिफाज़त केरन, ते मिलापे बाले तेम्बेरे आसे पासे रेइतां अपने डेरे लान। ते ज़ैखन-ज़ैखन मिलापे बालो तेम्बु अग्रोवं नेनो भोल्हो तैखन लेवी लोके एन कम केरन, ते ज़ैखन-ज़ैखन मिलापे बालो तेम्बु तैखन-तैखन लेवी लोक तैस खड़ो केरन, ते अगर कोई लेवी गोट्लेरे अलावा होरो कोई एस कम्मेरे लेई नेड़े एज्जे तै मारो गालो। ते इस्राएली लोक अपने-अपने खानदानेरे मुताबिक अपने-अपने डेरे अपने झण्डे कां खड़े केरन। ते लेवी लोक मिलापे बाले तेम्बु कां अपने डेरे खड़े केरन, कोन्च एरू न भोए कि इस्राएली लोकन पुड़ मेरो क्रोध भड़के, ते लेवी खानदानेरे लोक मेरे मिलापे बाले तेम्बेरी हेरगेश केरते रान।” ज़ैना हुक्म यहोवाए मूसे दित्तोरे थिये, इस्राएली लोकेईं तैन केरे मुताबिक कियूं।
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.