Bhadrawahi Bible
गिनती 13
भेद घिन्ने बाले कनाने जो भेज़ने
फिरी यहोवाए मूसे सेइं ज़ोवं, “कनान मुल्ख ज़ै अवं इस्राएली लोकन देताईं, तैसेरो भेद घिन्नेरे लेई मैन्हन भेज़, तैना तैन केरे सियाना केरे गोट्लेरे अक-अक प्रधान भोन।” यहोवारो ऐह हुक्म मैलतां मूसे एरे ज़ेरे मड़दे पारान सुनसान ठैरी मरां भेज़े, तैना सब इस्राएली लोकां केरे प्रधान थिये। तैन केरां नंव्वां इना आन, रूबेनेरे गोट्ले मरां जक्कूरेरू मट्ठू शम्मू; शिमोनेरे गोट्ले मरां होरी एरू मट्ठू शापात; यहूदारे गोट्ले मरां यपुन्नेरू मट्ठू कालेब; इस्साकारेरे गोट्ले मरां यूसुफेरू मट्ठू यिगाल; एप्रैमेरे गोट्ले मरां नूनेरू मट्ठू होशे; बिन्यामीनेरे गोट्ले मरां रापू एरू मट्ठू पलती; जबूलूनेरे गोट्ले मरां सोदीएरू मट्ठू गद्दीएल; यूसुफेरे खानदाने मरां, मनश्शेरे गोट्ले मरां सूसी एरू मट्ठू गद्दी; दानेरे गोट्ले मरां गमल्ली एरू मट्ठू अम्मीएल; आशेरेरे गोट्ले मरां मीकाएलेरू मट्ठू सतूर; नप्ताली एरे गोट्ले मरां वोप्सी एरू मट्ठू नहूबी; गादेरे गोट्ले मरां माकी एरू मट्ठू गूएल। ज़ैना मड़द मूसे मुल्खेरो भेद घिन्नेरे लेई भेज़ोरे थिये, तैन केरां नंव्वां इना आन, ते नूनेरे मट्ठे होशेरू नवं मूसे यहोशू रख्खू।
तैना मड़द कनान मुल्खेरो भेद घिन्नेरे लेई भेज़ते बार मूसे ज़ोवं, “इट्ठां दक्षिण मुल्खे मांमेइं निस्तां गाथ, फिरी पहाड़ी मुल्खे मांमेइं गेइतां तैस मुल्खे हेरा, कि तैस मुल्खे मां बस्सोरे लोकन भी हेरा, कि तैना ताकतबरन कि कमज़ोरन, तैना थोड़ेन कि जादेन, ते ज़ेरे मुल्खे मां तैना बस्सोरेन तै केरहोए, रोड़ोए कि बुरोए, ते तैना केरही-केरही बेस्तन मां बस्सोरेन, ते तैना डेरन मां रहतन कि क़िलन मां रहतन? ते तै मुल्ख केरहोए, फसल देनेबालो कि बंझरे, ते तैस मां बुट आन या नईं। ते तुस हिम्मत केरतां गाथ, ते तैट्ठेरी फसली मरां किछ एइते बार ऐनथ।” तै मौको पेइली पेकोरी फसल दाछ़रो थियो।
एल्हेरेलेइ तैना च़ले जे, ते सीन नव्वेंरे जंगले करां लेइतां रहोब नगरे तगर ज़ैन हमातरी बत्ती मांए, तैस सारे मुल्खेरो भेद घिन्नो। तैना दक्षिण मुल्खे मांमेइं निस्तां च़ले; ते हेब्रोने तगर जे; तैड़ी अहीमन, शेशै, ते तल्मै नव्वेंरे अनाक वंशेरे लोक रहते थिये, हेब्रोन, मिस्र मुल्खेरे सोअनेरां सत साल पेइले बसाव जेवरो थियो। तैखन तैना एशकोल नाले तगर जे, ते तैट्ठां अक डालड़ी दाछ़रे घोन्छ़े सने ट्लोड़ी; ते दूई मैन्हेइं तै एक्की टमने पुड़ छ़ुइतां च़लाई; ते तैनेईं किछ अनार ते किछ फैगू भी आनां। इस्राएली लोकेईं ज़ै दाछ़रो घोन्छ़ ट्लोड़तां आनोरो थियो, एस्से वजाई सेइं तैस ठारारू नवं एशकोल नालो रख्खू जेवं।
भेद घिन्ने बाले वापस एइतन
40 दिहाड़ना बाद तैना तैस मुल्खेरो भेद घिन्तां वापस आए। ते पारान जंगलेरे कादेश नव्वेंरे सूबे मां मूसे ते हारून ते सारे इस्राएली लोकन कां वापस पुज़्ज़े ते तैड़ी तैन ते सारे मेण्डलरे लोकन तैस मुल्खेरो फल हिराव ते तैस मुल्खेरे बारे मां ज़ोवं। तैनेईं मूसे सेइं एन ज़ोइतां तैस ठैरारे बारे मां ज़ोवं, “ज़ैस मुल्खे मां तीं अस भेज़ोरे थिये, तैस मां असां जे; तैस मां सच़्च़े दुद्ध ते मैछ़ेरी गड्डां1 बेगचन, ते तैसेरी पैदावारी मरां इन आहे। पन तैस मुल्खेरे रानेबाले बड़े ताकतबरन; ते तैट्ठेरे नगर बड़े बड्डेन ते तैना क़िले बालेन ते फिरी असेईं अनाक खानदानेरे लोक भी लाहे। दक्षिण मुल्खे मां त अमालेकी लोक बस्सोरेन; ते पहाड़ी मुल्खे मां हित्ती, यबूसी, ते एमोरी लोक रहतन; ते समुन्दरेरे बन्ने-बन्ने ते यरदन दरियाएरे बन्ने कनानी लोक बस्सोरेन।”
पन कालेबे मूसेरे सामने प्रजारे लोकन च़ुप केरनेरे लेई ज़ोवं, “अस हुन्ना तैस मुल्खे मां गेइतां तैस मुल्खे पुड़ कब्ज़ो केरम; असन याकीने कि असन एन केरनेरी ताकते।” पन ज़ैना मैन्हु तैस सेइं साथी जेवरे थिये, तैनेईं ज़ोवं, “अस तैन लोकन पुड़ चढ़ाई न केरि सकम, किजोकि तैना असन करां जादे ताकतबरन।” ते तैनेईं इस्राएली लोकां केरे सामने ज़ैस मुल्खेरो भेद घिन्नोरो थियो, एन ज़ोइतां निन्दा भी की, “तै मुल्ख ज़ेसेरो भेद घिन्नेरे लेई असां जेवरे थिये, एरहो ज़ेरोए, ज़ैना अपने रानेबालन निगली गातन; ते ज़ेत्रे मैन्हु असेईं तैस मुल्खे मां लाहोरेन, तैना सब बड़े कदे बालेन। फिरी असेईं तैड़ी नपीली लोक यानी नपीली कौमरे अनाक खानदानेरे लोक लाहे; ते अस एपनी नज़री मां तैन केरे सामने टिट्टां केरे ज़ेरे लेइहोतम, ते एरे ज़ेरे असां तैन केरि नज़री मां लेइहोते थिये।”
Source notes (1)
- Footnote दुद्ध ते मैछ़ेरी गड्डां बड़ी रोड़े ते बड़ी फलदार ज़मीन
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.