Bhadrawahi Bible
गिनती 12
मूसेरू महान भोनेरू सबूत
मूसे एक्की कूशी कौन्शी सेइं ड्लाह बनेवरो थियो। एल्हेरेलेइ मिर्याम ते हारून तैसेरी तैस ड्लाहोरी कूशी कौन्शरे वजाई सेइं तैसेरे खलाफ तैसेरी तुहीन केरने लगे; तैनेईं ज़ोवं, “कुन यहोवा सिर्फ मूसे सेइं गल्लां कियोरिन? कुन तैनी असन सेइं गल्लां न की?” तैन केरि ई गल यहोवाए शुनी। ते मूसो त सारे दुनियारे लोकन करां जादे हलीम सुभावेरो थियो। अकदम यहोवाए मूसे ते हारून ते मिर्याम सेइं ज़ोवं, “तुस ट्लाईए मिलापे बाले तेम्बु कांजो निस्सी गाथ।” ते तैखन तैना ट्लाईए तैड़ी जो आए। तैखन यहोवा बिदलारारे खम्भे मरां ओस्तां तेम्बु कां दारे मां खड़ो भोइतां हारून ते मिर्याम कुजां, ते तैना दूईये तैड़ी जो जेआं। तैखन यहोवाए ज़ोवं, “मेरी गल्लां शुना, ज़ैखन तुश्शे दरमियाने मां कोई नबी भोए, त तैस पुड़ अवं यहोवा अपने दर्शनेरे ज़िरिये अपनो आप बांदो केरेलो, या सुपने मां तैस सेइं गल्लां केरेलो। पन मेरो दास मूसो एरहो नईं, किजोकि तै मेरे सारे घराने मां सेब्भन करां जादे वफादारे। तैस सेइं अवं छ़ेपतां नईं, बल्के तैसेरे आमने-सामने बांदो भोइतां गल्लां केरताईं: ते तै यहोवारू रूप हेरते। एल्हेरेलेइ तुसां मेरे दास मूसेरी निन्दा केरते किना डरे?”
तैखन यहोवारो क्रोध तैन पुड़ भड़को, ते फिरी तै मिलापे बाले तेम्बु पुड़ेरां बिदलार च़ली जेई। ज़ैखन तै बिदलार तैस तेम्बु पुड़ेरां खड़ी भोइ जेई, ते मिर्याम कोढ़े सेइं हिंवेरी ज़ेरि छ़ित्ती भोइ जेई। ते हारूने मिर्यामरे पासे नज़र दित्ती, ते हेरू कि तै कोढ़ी भोइ जेवरीए। ते तैखन हारून मूसे सेइं ज़ोने लगो, “हे मेरे प्रभु, असेईं दूइयेईं ज़ै बेवकूफरे वजाई सेइं पाप कियो, ई पाप असन पुड़ न लग्गने दे। ते मिर्यामी एस हालती मां न छ़ड, तै त एरे बच्चेरी ज़ेरि ज़ै मरोरो ज़र्मोरोए, ज़ेसेरे जानरो अध्धो हिस्सो गेली जेवरोए।” त मूसे एन ज़ोइतां यहोवा कां फरियाद की, “हे मेरे परमेशर, महरबानी केर, ते एस बज़्झ़ा।” तैखन यहोवाए मूसे सेइं ज़ोवं, “अगर तैसारे बाजे तैसारे तुत्तरे पुड़ थुकेरू भोथू त कुन तै सत दिहाड़े शरमिन्दा न थी भोनी? एल्हेरेलेइ तै सत दिहाड़े डेरन करां बेइर बन्द राए, तैसेरे बाद तै फिरी अन्तर एज्जी सखचे।” त मिर्याम सत दिहाड़े डेरन करां बेइर बन्द राई, ते ज़ांतगर मिर्याम फिरी न एज्जी बटी तांतगर लोक अग्रोवं सफर न केरि बटे। तैसेरां बाद तैनेईं हसेरोतेरां अग्रोवं सफर केरतां पारान नव्वेंरे सुनसान ठैरी मां अपने डेरे लाए।
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.