Bhadrawahi Bible
नहेम्याह 8
यहूदी लोकन कानून शुनव गानो
सत्तोवं महीनेरे पेइले दिहाड़े सारे इस्राएली अपने-अपने नगरे मां थिये। तैखन सारे लोकेईं अक मन भोइतां, पैनेरे फाटकेरे सामने अकोट्ठे भोइतां एज्रा शास्त्री सेइं ज़ोवं, कि मूसेरो ज़ै कानून यहोवा इस्राएली लोकन दित्तोरो थियो, तैसेरी किताब इरां आन।1 तैखन एज्रा याजके सत्तोवं महीनेरे पेइले दिहाड़े कौन्शां, मड़द, ज़ेत्रे शुन्तां सेमझ़ी सखते थिये, तैन सेभी केरे सामने तै कानून घिन्तां अव। तैना तैसेरी गल्लां झ़ेझ़री देंती दुपहरन तगर तैस चौवकेरे सामने ज़ै पैनेरे फाटकेरे सामने थियो, कौन्शां, मड़द, ते सेभी समझ़ने बालन पेढ़तां शुनातो राव। ते लोकेईं कानूनेरी किताबरे गल्लन पुड़ कन लग्गोरे रख्खे। एज्रा शास्त्री, लेकड़रे एक्की मंचे पुड़ खड़ो भोइतां ज़ै सिर्फ एस्से कम्मेरे लेई बनेवरो थियो। ते तैसेरे देइने पासे मत्तित्याह, शेमा, अनायाह, ऊरिय्याह, हिल्किय्याह ते मासेयाह। ते बांए पासे, पदायाह, मीशाएल, मल्किय्याह, हाशूम, हश्बद्दाना, जकर्याह ते मशुल्लाम खड़े भोए। तैखन एज्रा ज़ै सेभी लोकन करां उच्ची ठारी पुड़ थियो, तैनी सेभी केरे सामने तै किताब खोल्ली। ते ज़ैखन तैनी तै किताब खोल्ली, तैखन सारे लोक खड़े भोए। तैखन एज्रा महान परमेशर यहोवारी तारीफ़ की। ते सेभी लोकेईं अपने हथ खड़े केरतां, आमीन, आमीन, ज़ोवं। ते क्रोड़रे भारे झुकतां यहोवा कां मथ्थो टेको। फिरी लेवन मरां येशुअ, बानी, शेरेब्याह, यामीन, अक्कूब, शब्बतै, होदिय्याह, मासेयाह, कलीता, अजर्याह, योजाबाद, हानान ते पलायाह, लोकन कानून समझ़ाते राए, ते लोक एपनी-एपनी ठारी पुड़ खड़े राए। तैनेईं परमेशरेरे कानूनेरी किताब पेढ़तां मतलब समझ़ाव। ते लोकेईं शुन्तां मतलब समझ़ो।
तैखन नहेम्याह ज़ै हाकिम थियो, ते एज्रा ज़ै याजक ते शास्त्री थियो, ते ज़ैना लेवी, लोकन समझ़ाने लगोरे थिये, तैनेईं सेभी लोकन सेइं ज़ोवं, “अज़्ज़ेरी दिहाड़ी तुश्शे परमेशर यहोवारे लेई पवित्रे। एल्हेरेलेइ मातम न केरा ते लेरां न देथ।” किजोकि सारे लोक कानूनेरी गल्लां शुन्तां लेरां देते थिये। फिरी नहेम्याह तैन सेइं ज़ोवं, “गेइतां अपनि मन पसंद रोट्टी खाथ ते मिट्ठू शर्बत पीया, ज़ैन कां किछ नईं तैन केरे लेई खानेरो इंतज़ाम केरा। किजोकि अज़्ज़ेरी दिहाड़ी इश्शे प्रभुएरे लेई पवित्रे। ते उदास न भोथ, किजोकि यहोवारो आनन्द तुश्शे लेई मज़बूत गढ़े।” लेवी लोकेईं एन ज़ोइतां सेभी लोकन च़ुप कराई, “च़ुप राथ किजोकि अज़्ज़ेरी दिहाड़ी पवित्रे, ते उदास न भोथ।” तैखन सारे लोक खाने, पीने, ते खानेरी चीज़ां भेज़ने ते बड़ो आनन्द मनाने जो च़ले जे, किजोकि ज़ैना वचन तैन समझ़ेवरे थिये, तैनेईं तैना वचन समझ़ोरे थिये।
झोफड़ी केरू तिहार
होरसां भी इस्राएली केरे पूर्वजां केरे घरानेरे प्रधान ते याजक ते लेवी लोक, एज्रा शास्त्री कां कानूनेरे वचन ध्याने सेइं शुन्नेरे लेई अकोट्ठे भोए। तैन कानूने मां एन लिखोरू मैल्हू, कि यहोवा मूसा ऐह हुक्म दित्तोरो थियो, कि इस्राएली लोक सत्तोवं महीनेरे तिहारेरे मौके झोफड़ी मां रान।2 ते अपने सेभी नगरन मां ते यरूशलेमे मां एन शुनावं ते प्रचार कियो गाए, “पहाड़न पुड़ गेइतां ज़ैतून, तैलबुट, मींधी, खजूर ते घने-घने बुट्टां केरि डैलड़ी एन्हतां झोफड़ी बनाथ, ज़ेन्च़रे कि परमेशरेरे कानूने मां लिखेरूए।” ते सेभी लोकेईं बेइर गेइतां डैलड़ी एन्हीं, ते अपने-अपने घरेरी छती पुड़, ते अपने अंगन्न मां ते परमेशरे भवनेरे अंगन्न मां, ते पैनेरे फाटकेरे चौवके मां, ते एप्रैमेरे फाटकेरे चौवके मां झोफड़ी बनेई। बल्के सेभी मेण्डलरे लोकेईं ज़ेत्रे बाबेलेरी गुलैमी मरां आज़ाद भोइतां वापस एवरे थिये, झोफड़ी बनेइतां तैन मां राए। नूनेरे मट्ठे यहोशूएरे दिहाड़न करां लेइतां तैस दिहाड़े तगर इस्राएली लोकेईं एन्च़रे न थियूं कियोरू। तैस मौके बड़ो आनन्द भोव। फिरी तिहारेरे पेइले दिहाड़े करां लेइतां आखरी दिहाड़े तगर रोज़ परमेशरेरी कानूनेरी किताबी मरां पेढ़तां शुनाव। ते तैना सत दिहाड़े तिहार मनाते राए, ते अठोवं दिहाड़े नियमेरे मुताबिक अक बड़ी सभा भोइ।
Source notes (2)
- Cross-reference एज. 3:1.
- Cross-reference लैव्य. 23:42.
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.