Bhadrawahi Bible
नहेम्याह 11
हाकिम ज़ैना यरूशलेम नगरे मां बेस्सी जे
लोकां केरे हाकिम त यरूशलेम नगरे मां रहते थिये, ते बाकी लोकेईं एन ठहरानेरे लेई चिट्ठी छ़ेडी, कि दश मैन्हन मरां अक मैन्हु यरूशलेमे मां ज़ैन पवित्र नगरे, बेस्सी गाए, ते नौ मैन्हु बाकी नगरन मां बेस्सी गान। ज़ैनेईं एपनी मेर्ज़ी सेइं यरूशलेम नगरे मां बस्सनू चाव तैन सेभी लोकेईं आशिर्वाद दित्तो।
तैन सूबन मां प्रधान मैन्हु ज़ैना यरूशलेम नगरे मां रहते थिये, तैना इना आन। पन यहूदारे नगरन मां अक-अक मैन्हु एपनी ज़मीनी पुड़ रहतो थियो। मतलब, इस्राएली, याजक, लेवी, भवनेरे सेवक ते सुलैमानेरे दासां केरू खानदान। यरूशलेम नगरे मां त किछ यहूदा ते बिन्यामीन गोट्लां केरे लोक रहते थिये। यहूदन मरां त येरेसेरे खानदाने मरां अतायाह ज़ैन उज्जियाहेरू मट्ठू थियूं, उज्जियाह जकर्याहेरू मट्ठू थियूं, जकर्याह अमर्याहेरू मट्ठू थियूं, अमर्याह शपत्याहेरू मट्ठू थियूं, शपत्याह महललेलेरू मट्ठू थियूं। मासेयाह ज़ैन बारूकेरू मट्ठू थियूं, बारूक कोल्होजेरू मट्ठू थियूं, कोल्होजे हजायाहेरू मट्ठू थियूं, हजायाह अदायाहेरू मट्ठू थियूं, अदायाह योयारीबेरू मट्ठू थियूं, योयारीब जकर्याहेरू मट्ठू थियूं, ते जकर्याह शीलोई एरू मट्ठू थियूं। पेरेसेरे खानदानेरे ज़ैना लोक यरूशलेम नगरे मां रहते थिये, तैना सब मिलेइतां 468 बहादर सिपाही थिये।
बिन्यामीनी लोकन मरां सल्लू ज़ैन मशुल्लामेरू मट्ठू, मशुल्लाम योएदेरू मट्ठू थियूं, योएद पदायाहेरू मट्ठू थियूं, पदायाह कोलायाहेरू मट्ठू थियूं, कोलायाह मासेयाहेरू मट्ठू थियूं, मासेयाह इतीएहेरू मट्ठू थियूं, इतीएह यशायाहेरू मट्ठू थियूं। तैसेरां बाद गब्बै सल्लै ज़ैन सेइं साथी 928 मैन्हु थिये। एन केरो प्रधान जिक्री एरू मट्ठू योएल थियूं, ते हस्सनूआरू मट्ठू यहूदा नगरेरो प्रधानेरो नायब थियो।
फिरी याजकन मरां योयारीबेरू मट्ठू यदायाह ते याकीन थिये। ते सरायाह ज़ै परमेशरेरे भवनेरो प्रधान ते हिल्किय्याहेरू मट्ठू थियूं, हिल्किय्याह मशुल्लामेरू मट्ठू थियूं, मशुल्लाम सादोकेरू मट्ठू थियूं, सादोक मरायोतेरू मट्ठू थियूं, मरायोत अहीतूबेरू मट्ठू थियूं। एन केरे 822 रिश्तेदार ज़ैना तैस भवनेरू कम केरते थिये। ते अदायाह, ज़ैन यरोहामेरू मट्ठू थियूं, यरोहाम पलल्याहेरू मट्ठू थियूं, पलल्याह अमसी एरू मट्ठू थियूं, अमसी जकर्याहेरू मट्ठू थियूं, जकर्याह पशहूरेरू मट्ठू थियूं, पशहूर मल्किय्याहेरू मट्ठू थियूं। एन केरे 242 भियाल ज़ैना अपने पूर्वजां केरे घराना केरे प्रधान थिये। ते अमशै ज़ैन अजरेलेरू मट्ठू थियूं, अजरेल अहजैरू मट्ठू थियूं, अहजै मशिल्लेमोतेरू मट्ठू थियूं, मशिल्लेमोत इम्मेरू मट्ठू थियूं। एन केरे 128 शूरबीर भियाल थिये ते एन केरो प्रधान हग्गदोलीमेरू मट्ठू जब्दीएल थियूं।
फिरी लेवी लोकन मरां शमायाह ज़ैन हश्शूबेरू मट्ठू थियूं, हश्शूब अज्रीकामेरू मट्ठू थियूं, अज्रीकाम हशब्याहेरू मट्ठू थियूं, हशब्याह बुन्नी एरू मट्ठू थियूं। शब्बतै ते योजाबाद खास लेवी लोकन मरां परमेशरेरे भवनेरे बेइरींए कम्मे पुड़ रखोरे थिये। मत्तन्याह ज़ैन मीकारू मट्ठू ते जब्दी एरू पोट्लड़ू, ते आसापेरो पड़पोट्लड़ू थियूं; तै प्राथना ते शुक्र केरनेबालन मां प्रधान थियो, ते बकबुक्याह अपने ढ्लान मां दूइयोवं दर्जे पुड़ थियो। ते अब्दा ज़ैन शम्मूएरू मट्ठू, ते गालालेरू पोट्लड़ू, ते यदूतूनेरू पड़पोट्लड़ू थियूं। ज़ैना लेवी पवित्र नगरन1 मां रहते थिये, तैना सब मिलेइतां 284 थिये।
अक्कूब ते तल्मोन नंव्वेरे भवनेरे पहरदार ते तैन केरे भियाल ज़ैना फाटकां केरे रखवाले थिये, 172 थिये। बाकी इस्राएली याजक ते लेवी यहूदारे सेभी नगरन मां अपने-अपने हिस्से पुड़ रहते थिये। भवनेरे सेवक ओपेले मां रहते थिये। ते भवनेरे लोकन पुड़ सीहा, ते गिश्पा तैन केरे निगरान थिये।
ज़ैना लेवी यरूशलेमे मां रेइतां परमेशरे भवनेरे कम्मे मां लगोरे रहते थिये, तैन केरो प्रधान आसापेरे खानदाने मरां गीतां ज़ोनेबाले लोकन मरां उज्जी थियो, ज़ैन बानीएरू मट्ठू थियूं, बानी हशब्याहेरू मट्ठू थियूं, हशब्याह मत्तन्याहेरू मट्ठू थियूं ते मत्तन्याह हशब्याहेरू मट्ठू थियूं। किजोकि तैन केरे बारे मां राज़ेरो हुक्म थियो। ते गीतां ज़ोनेबाले केरे रोज़ेरे ज़रूरतरे मुताबिक ठीक इंतज़ाम थियो।2 लोकां केरे सेभी कम्मां केरे लेई मशेजबेलेरू मट्ठू पतह्याह ज़ैन यहूदारे मट्ठे जेरहेरे खानदाने मरां थियूं, तै राज़े कां रहतो थियो।
बाकी नगरां केरे रानेबाले
बच़ोरां ड्लाव्वां ते तैन केरां ऊडारां, किछ यहूदी किर्यतअर्बा नगर ते तैसेरे ड्लाव्वन मां, किछ दीबोन नगर ते तैसेरे ड्लाव्वन मां, किछ यकब्सेल नगर ते तैन केरे ड्लाव्वन मां रहते थिये। फिरी येशुअ, मोलादा, बेत्पेलेत; हसर्शूआल ते बेर्शेबा ते तैसेरे ड्लाव्वन मां। ते सिकलग ते मकोना ते तैन नगरां केरे ड्लाव्वन मां। एन्निम्मोन, सोरा, यर्मूत, जानोह ते अदुल्लाम ते तैन केरे ड्लाव्वन मां, लाकीश ते तैसेरे उडारन मां, अजेका ते तैसेरे ड्लाव्वन मां तैना बेर्शेबा करां लेइतां हिन्नोमेरे वैदी तगर डेरे लेइतां रहते थिये। बिन्यामीनी गेबा करां लेइतां मिकमाश, अय्या ते बेतेल ते तैसेरे ड्लाव्वन मां। अनातोत, नोब, अनन्याह, हासोर, रामाह, गित्तैम, हादीद, सबोईम, नबल्लत, लोद, ओनो ते कारीगिरां केरि वैदी तगर रहते थिये। यहूदी केरे किछ लेवी लोकां केरि टोली बिन्यामीनी केरे सूबन मां बेस्सी जे।
Source notes (2)
- Footnote पवित्र नगरन मतलब यरूशलेम नगर
- Cross-reference एज. 6:1-12.
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.