Bhadrawahi Bible
नहेम्याह 10
कानूनेरे मुताबिक करार केरनो
ज़ैनेईं मोहर लेवरी थी तैना इना आन, हकल्याहेरू मट्ठू नहेम्याह ज़ै हाकिम थियो ते सिदकिय्याह, सरायाह, अजर्याह, यिर्मयाह, पशहूर, अमर्याह, मल्किय्याह, हत्तूश, शबन्याह, मल्लूक, हारीम, मरेमोत, ओबद्याह, दानिय्येल, गिन्नतोन, बारूक, मशुल्लाम, अबिय्याह, मिय्यामीन, माज्याह, बिलगै ते शमायाह इना त याजक थिये। लेवी इना थिये: आजन्याहेरू मट्ठू येशुअ, हेनादादेरे खानदाने मरां बिन्नूई ते कदमीएल, ते तैन केरे भियाल शबन्याह, होदिय्याह, कलीता, पलायाह, हानान, मीका, रहोब, हशब्याह, जक्कूर, शेरेब्याह, शबन्याह। होदिय्याह, बानी ते बनीनू, फिरी लोकां प्रधान इना थिये: परोश, पहत्मोआब, एलाम, जत्तू, बानी, बुन्नी, अजगाद, बेबै, अदोनिय्याह, बिगवै, आदीन, आतेर, हिजकिय्याह, अज्जूर, होदिय्याह, हाशूम, बेसै, हारीफ, अनातोत, नोबै, मग्पीआश, मशुल्लाम, हेजीर; मशेजबेल, सादोक, यद्दू, पलत्याह, हानान, अनायाह; होशे, हनन्याह, हश्शूब, हल्लोहेश, पिल्हा, शोबेक, रहूम, हशब्ना, मासेयाह, अहिय्याह, हानान, आनान, मल्लूक, हारीम ते बानाह।
इस्राएली लोकां केरे ज़िरिये कसम केरनी
बाकी लोक मतलब याजक, लेवी, पहरदार, गीतां ज़ोनेबाले ते भवनेरे सेवक, ते ज़ेत्रे परमेशरेरे कानून मन्नेरे लेई मुल्खे-मुल्खेरे लोकन करां अलग भोवरे थिये, तैनेईं सेभेइं एपनी कौन्शां ते मट्ठन कुइयन समेत ज़ैना समझ़ने बालां थियां, अपने भियाल रईस लोकन सेइं मिलतां कसम खाई, कि असां परमेशरेरे तैस कानूने पुड़ च़लमेले ज़ै तैसेरे दास मूसेरे ज़िरिये दित्तोरो थियो, ते अपने प्रभु यहोवारे सारे हुक्म ते नियम ते विधि मन्नेरे लेई एहतियात केरमेले। न असां एपनी कुइयां इस मुल्खेरे परदेशी लोकन जो ड्लेइतां देमेले, ते न अपने मट्ठन जो तैन केरि कुइयां ड्लेइतां आनमेले। ते ज़ैखन इस मुल्खेरे लोक आरामेरे दिहाड़े अन्न या कोई बिकने बाली चीज़ां बेच़ने जो आनेले, तैखन असां तैन करां न त आरामेरे दिहाड़े कोई पवित्र चीज़ न घिन्मेले। ते सत्तोवं साले मां असां ज़मीन खिल्ली छ़डमेले। ते ज़ै कर्ज़ो असेईं दित्तोरोए तैस वापस न नेमेले।1
फिरी असेईं लोकेईं एरहो कानून बनाव कि ज़ैस सेइं असां अपने परमेशरेरे भवनेरी सेवारे लेई अक-अक तिहाई शेकेल देमेले। मतलब च़ैढ़ोरी रोट्टी ते रोज़ेरी अन्नबलि ते लगातार होमबलि च़ाढ़नेरे लेई, ते आरामेरे दिहाड़े ते नंव्वे चाँद रख्खोरां तिहारां केरे बलिदानां ते बाकी तिहारां ते पवित्र च़ढ़तलां ते इस्राएली लोकां केरे प्रायश्चितेरे खातर पापबेलि केरे लेई मतलब अपने परमेशरेरे भवन ते सारे कम्मेरे लेई। फिरी कुन याजक, कुन लेवी, कुन आम लोक, असेईं सेभी लोकेईं एस गल पक्की ठहरनेरे लेई चिट्ठी छ़ेडी, कि अपने पूर्वजां केरे घराना केरे मुताबिक हर साल रखोरे मौके पुड़ लेकड़री भेंट ते कानूने मां लिखोरी गल्लां केरे मुताबिक असां अपने परमेशर यहोवारी वेदी पुड़ फुकनेरे लेई अपने परमेशरेरे भवने मां आनमेले।2 असां एपनी-एपनी ज़मीनरी पेइली फसल ते सेभी किसमेरे बुट्टां केरे फल हर साल यहोवारे भवने मां आनमेले।3 ते कानूने मां लिखोरी गल्लां केरे मुताबिक असां अपने-अपने बड्डां मट्ठां ते जानबर, मतलब बड्डां बछ़ड़ां ते गबड़ां अपने परमेशरेरे भवने मां तैन याजकन कां आनमेले, ज़ैना इश्शे परमेशरेरे भवने मां सेवा केरतन। असां अपनु पेइलू सन्नेरू अट्टू, ते सल्लोरी च़ढ़तल, ते हर किसमेरे बुट्टां केरे फल, ते नंव्वो दाछ़रो रस, ते ज़ैतूनेरो तेल अपने परमेशरेरे भवनेरे कमरन मां याजकन कां आनमेले, ते एपनी-एपनी ज़मीनरी फसलरो दशोवं हिस्सो लेवी लोकन कां देमेले। किजोकि तैना लेवी आन, ज़ैना इश्शे सारे नगरां केरि ज़मीनरी फसलरो दशोवं हिस्सो नेतन।4 ज़ैखन-ज़ैखन लेवी दशोवं हिस्सो नेन, तैखन-तैखन तैन सेइं साथी हारूनेरे खानदानेरो कोई याजक साथी राए। ते लेवी दशोवं हिस्सेरो दशोवं हिस्सो इश्शे परमेशरे भवनेरे भण्डारे मां पुज़ेइतां छ़डन।5 किजोकि ज़ैन कमरन मां पवित्र ठारारां भांडां ते सेवा केरनेबाले याजक ते पहरदार ते गीतां ज़ोनेबाले रहतन, तैन मां इस्राएली ते लेवी, अन्न, ते नंव्वो दाछ़रो रस, तेल, ते सल्लोरी च़ढ़तल पुज़ाले। एस तरीके सेइं असां अपने परमेशरेरे भवने न शारमेले।
Source notes (5)
- Cross-reference निर्ग. 20:8-11;व्यव. 5:12-15.
- Cross-reference लैव्य. 6:12-13.
- Cross-reference निर्ग. 23:19.
- Cross-reference रोम. 11:16;लैव्य. 23:7.
- Cross-reference गिन. 18:26.
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.