Bhadrawahi Bible
मीका 5
हुनी हे बड़े सेना केरे नगर यरूशलेम, सेना अकोट्ठे केरा, किजोकि तैनी असां लोक घेरी छ़डोरेम। तैना इस्राएलेरे खैखोड़ी पुड़ सोटी सेइं बाले।1
यहोवा ज़ोते, हे बैतलहम एप्राता, अगर तू एरहो निकड़ो आस कि यहूदारे हज़ारन मां गनो न गास, फिरी भी तीं मां मेरे लेई अक मैन्हु निसेलो; ज़ै इस्राएली लोकन मां हुकूमत केरनेबालो भोल्हो, ते तैसेरू निसनू पुराने ज़माने करां, बल्के हमेशा करां भोतू एवरू आहे।2 एल्हेरेलेइ तै तैन्न तैस वक्ते तगर शारेलो, ज़ांतगर गल्हे बिशने बाली कौन्श बच्चो न ज़ाए; तैखन इस्राएली लोकन कां गुलैमी मां तैसेरे बच़ोरे ढ्ला वापस तैन कां मिली गाले। ते तै खड़ो भोइतां यहोवारी दित्तोरी शेक्ति सेइं ते अपने परमेशर यहोवारे प्रतापे सेइं, ते तैन केरि पुहाली केरेलो, ते तैना सुरक्षित राले, किजोकि हुनी तै पूरे धेरती मां महान ठहरेलो।
ते तै शैन्तरो ज़िरियो भोल्हो, ज़ैखन अश्शूरी सिपाही इश्शे मुल्खे पुड़ चढ़ाई केरन, ते इश्शे मेहलन मां पव रखन, तैखन असां तैन केरे खलाफ सत पुहाल बल्के अठ प्रधान मैन्हु खड़े केरमेले। ते तैना अश्शूरेरे मुल्खे बल्के दाखल भोनेरे ठारन तगर निम्रोद राज़ेरे मुल्खे पुड़ तलवार च़लेइतां मारेले; ते ज़ैखन अश्शूरी लोक तैसेरे घरे मां एज्जन, ते तैसेरी सरहद्दी अन्तर पव रखन, तैखन तैए मैन्हु असन तैन करां बच़ालो।3 ते याकूबेरे बच़ोरे लोक बड़े रियासतन मां एरू कम देले, ज़ेरि यहोवारी तरफां पेने बाली ओश, ते घासे पुड़ झ़ड़ी; ज़ै मैन्हु केरो इंतज़ार न केरे। ते याकूबेरे बच़ोरे लोक कौमन मां ते मुल्खे-मुल्खेरे लोकन मां एरे भोल्हे, ज़ेन्च़रे जंगलेरे जानबरन मां शेर, ते गब्बां केरि केन्नी मां जुवान शेर भोते, किजोकि ज़ैखन तै तैन मांमेइं गाए, तैखन तै दलतो ते मारतो गाते, ते कोई कोन्ची बच़ेइ न बटे। तेरो हथ तेरे दुश्मन्न पुड़ पे, ते तेरे सारे दुश्मन नाश भोइ गान।
यहोवा एन ज़ोते, तैखन अवं तेरे घोड़े ज़ैना तीं कां आन तैना नाश केरतां छ़डेलो; ते तेरे रथां केरो नाश केरतां छ़डेलो। अवं तेरे मुल्खेरे नगरन भी नाश केरतां छ़डेलो, ते अवं तेरे क़िले भी डोलतां छ़डेलो। ते अवं तेरां मन्ट्लां भी नाश केरतां छ़डेलो, ते तेरे दरमियान जैदू टूने अग्रोवं जो न राले। ते अवं तेरी बनेवरी मूरती, ते तेरे खम्भे, तेरे दरमियाने मरां नाश केरेलो; ते अग्रोवं जो तू अपने हथ्थन सेइं बनेवरी मूरती केरि पूज़ा न केरेलो। ते अवं तेरी अशेरा देबरे मूरतन तेरी धेरती पुड़ेरां पुटतां छ़डेलो, ते तेरे नगरां केरो नाश केरतां छ़डेलो। ते अवं गैर कौमन मरां ज़ैना मेरो हुक्म न मन्न, क्रोध ते बड़े सरकी सेइं बदलो घिन्नेलो।
Source notes (3)
- Cross-reference यूह. 18:22;यूह. 19:3;विल. 3:30.
- Cross-reference मत. 2:6;यूह. 7:42.
- Cross-reference उत्प. 10:8-12.
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.