Bhadrawahi Bible
मीका 4
शैन्तरू राज़
आखरी दिहाड़न मां एरहु भोल्हु कि यहोवारे भवनेरू पहाड़ सेभी पहाड़न पुड़ मज़बूत कियूं गालू, ते सेभी पहाड़न करां उच्चु कियूं गालू, ते हर कौमां केरे लोक पैनेरी गड्डां केरे ज़ेरे तैसेरे पासे च़लेले। ते बेड़ि कौमां केरे लोक गाले ते एक्की होरि सेइं ज़ोले, “एज्जा यहोवारे पहाड़े पुड़ गेइतां, याकूबेरे भवने मां गाम; तैखन तै अपनि बत असन शिखालेलो, ते असां तैसेरी बत्तन पुड़ च़लमेले।” किजोकि यहोवारो कानून सिय्योने मरां, ते तैसेरू वचन यरूशलेमे मरां निसेलू। यहोवा बड़े मुल्खां केरे लोकां केरो न्याय केरेलो, ते दूर-दूर तगर ताकतबर कौमां केरे झगड़े मटालो; एल्हेरेलेइ तैना एपनी तलवारां झ़ुसतां हलरे फाल, ते मैक्कु झ़ुसतां ड्लातां बनाले; तैखन अक कौम होरि कौमरे खलाफ तलवार न च़लाली। ते लोक अग्रोवं जो जंग केरनी न शिखेले। पन तैना अपनि-अपनि दाछ़ ते फैगेरे बुट्टन हैठ बिश्शेले, ते कोई तैन्न न डरालो; सेना केरो यहोवा एन ज़ोते।1
सेभी रियासतां केरे लोक त अपने देबतां केरू नवं घिन्तां च़लतन, पन असां अपने परमेशर यहोवारू नवं घिन्तां च़लते राले।
यहोवा एन ज़ोते, तैस मौके अवं अपने लोकन मरां टोन्टन, ते ज़बरदस्ती कढोरे लोकन, ते ज़ैन्न मीं गुलैमी मां दुख दित्तोरोए तैन सेभन अवं अकोट्ठे केरेलो। ते टोन्टन अवं बच़ेइतां रखेलो, ते दूर कढोरे लोकन अवं अक ज़बरदस्त कौम बनेइलो; ते यहोवा तैन पुड़ सिय्योने मरां हमेशा तगर राज़ केरतो रालो।
हे एदेरे गुम्मट, हे सिय्योनेरी पहाड़ी, पेइली हुकूमत मतलब यरूशलेमेरू राज़ तीं मैल्हेलू।
हुनी तू किजो लेरां देतिस? कुन तीं मां कोई राज़ो नईं राहोरो? कुन तीं सलाह देनेबाले मिटी जेवरेन, ज़ैस सेइं गल्हे बिशोरी कौन्शरी ज़ेरि तीं तकलीफ भोतीए?2 हे सिय्योनेरी कुइये3, तू गल्हे बिशने बाले कौन्शरी ज़ेरि चिन्डां मारती गा; किजोकि हुनी तीं नगरे मरां निस्तां मैइदाने मां रानू भोल्हु, बल्के गुलाम बेनतां बाबेले तगर गाली। तैड़ी तू छुटाई गाली, मतलब तैड़ी यहोवा तीं तेरे दुश्मन्न करां आज़ाद केरेलो।
हुनी बेड़ि कौमां तेरे खलाफ अकोट्ठी भोइतां तेरे बारे मां ज़ोली, “सिय्योन नगरी अपवित्र की गाए, ते असां अपने एछ़्छ़न सेइं तैसेरो तमाशो तक्कम।” पन तैना यहोवारी इच्छा न ज़ानन, ते तैसेरी योजना न समझ़न, कि तै तैन्न एरे अकोट्ठे केरेलो ज़ेन्च़रे खलाड़ी मां फेक्की अकोट्ठी गैतिन। यहोवा ज़ोते, हे सिय्योनेरी कुइये उठ, ते मड, अवं तेरे शिंगन4 लोंहेरे, ते तेरे रौन्ने पितलरे बनेइलो, ते तू बेड़ि कौमां केरे टुक्ड़े केरतां छ़डेली। ते तू तैन केरि कमाई यहोवा ते तैन केरि धन-दौलत दुनियारे प्रभु जो अर्पण केरेली।
Source notes (4)
- Cross-reference 1 राज़. 4:25;जक. 3:10.
- Cross-reference यिर्म. 8:19;यशा. 13:8.
- Footnote सिय्योनेरी कुइये मतलब यरूशलेम नगरेरे लोक।
- Footnote शिंगन ताकत
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.