Bhadrawahi Bible
लूका 23
पिलातुसेरे सामने यीशु
तैखन तैना सब तैट्ठां उठे ते यीशुए पिलातुसे कां घिन्तां जे।1 ते तैस जो एन ज़ोइतां ऐह इलज़ाम लांने लगे, “कि ऐह इश्शे लोकन भड़काते ते महाराज़े जो धड़त देनेरे लेई ठाकते, ते अपने आपे जो मसीह राज़ो ज़ोते।” तैखन पिलातुसे यीशुए पुछ़ू, “तू यहूदी केरो राज़ोस?” यीशु तैस जुवाब दित्तो, “तू एप्पू ज़ोतस!” पिलातुसे प्रधान याजकन ते लोकन सेइं ज़ोवं, “कि अवं एस मैन्हु मां कोई कसूर न लेही।” पन तैना बड़े घमण्डे सेइं ज़ोने लगे, “ऐह यहूदियारे इलाके करां गलील इलाके तगर बल्के इड़ी तगर लोकन अपनि शिक्षाई सेइं भड़काते।” ज़ैखन पिलातुसे एन शुनू त तैनी पुछ़ू, “कुन ऐह मैन्हु भी गलील इलाकेरो आहे।” ते ज़ेरो तैस पतो लगो, कि ऐह हेरोदेसेरे इलाकेरो रानेबालोए, त पिलातुसे तै हेरोदेस कांजो भेज़ो। किजोकि तैस वक्ते मां तै एप्पू भी यरूशलेम नगरे मां थियो।
हेरोदेसेरे सामने यीशु
ज़ैखन हेरोदेसे यीशु लाव त बड़ो खुशी भोव। किजोकि तैस च़रोक्नी देंती यीशु हेरनेरी इच्छा थी। तैनी तैसेरे बारे मां बेड़ि गल्लां शुनोरी थी, ते तैस बड़ी उमीद थी, कि यीशुएरो कोई चमत्कार हेरे। तैनी यीशुए बड़ू किछ पुछ़ू, पन यीशुए तैस कोई जुवाब न दित्तो। पन याजक ते प्रधान याजक ते कने शास्त्री लोक बड़े ज़ोरे शोरे सेइं यीशु पुड़ इलज़ाम लांने लगे। तैखन हेरोदेस भी अपने सैथन सेइं मिलतां यीशुएरी तुहीन की, ते तैसेरी हासी बनाई फिरी तैस अक चमकतो कुरतो लुवेइतां पिलातुसे कां वापस भेज़ो। पेइले पिलातुस त हेरोदेस दुश्मन थिये, तैस दिहाड़े तैना दोस्त बेनि जे।
पिलातुसेरे ज़िरिये यीशु मौतरी सज़ा
तैखन पिलातुसे प्रधान याजक ते सरदार ते होरे लोक अकोट्ठे किये।2 “ते पिलातुसे तैन सेइं ज़ोवं तुसेईं ऐह मैन्हु मीं कां एन ज़ोतो आनोरोए कि, ऐह लोकन भड़काते ते मीं भी एसेरी पुछ़ गन की, पन ज़ैस जुर्मेरो दोष तुस एस पुड़ लातथ, अवं एल्हेरो एसमां कोई कसूर न लेहीं। ते न हेरोदेस ज़ैनी ऐह असन कां भेज़ोरोए तैस भी कोई दोष न मैल्हो, ते असन कां एरू कोई सबूत बराँमद न भोवं, ज़ैस सेइं ऐह कत्ल कियो गाए। तैल्हेरेलेइ अवं एस कोड़ेइं बाएतां छ़ेडी देताईं।” पिलातुस यहूदी केरे फ़सह तिहारेरे मौके पुड़ अक कैदी हथरां छ़डतो थियो। तैना सारे लोक चिन्डां लगे मारने, “कि एस मैन्हु सज़ा देथ ते बरअब्बा इश्शे लेई हथरां छ़ड्डा।” बरअब्बा नगरे मां गड़बड़ी केरनेरे ते कत्लेरे बारे मां कैदखाने मां छ़डोरो थियो। पिलातुसे यीशु हथरां छ़डनेरे इरादे सेइं लोकन दुबारू पुछ़ू। पन तैना लोक मना चिन्डां लगे मारने, “कि तू एस क्रूसे पुड़ च़ाढ़ एस क्रूस पुड़ च़ाढ़।” तैखन पिलातुसे तैन ट्लेइयोवं फेरे फिरी ज़ोवं, “किजो आखर एनी कुन जुर्म कियोरोए? हेरा एसमां एरू कोई सबूत बराँमद न भोवं, कि ऐह मौतरे सज़ारो हकदार भोए, तैल्हेरेलेइ अवं एस कुटेइतां छ़ेडी देताईं।” पन तैना चिन्डां मैरी-मैरी ज़ोने लगे, ऐह क्रूसे पुड़ च़ाढ़ोरो लोड़ते, ते तैन केरि चिन्डां मारनेरी उमीद पूरी भोइ। बस्सा, पिलातुसे ज़ोवं कि तैन केरे मेर्ज़रे मुताबिक कियूं गाए। ते ज़ै मैन्हु हुकूमतरे खलाफ ते खूनेरे जुर्मे मां कैद थियो, ते ज़ैस हथरां छ़डनेरे लेई तैनेईं दरखुवास कियोरी थी, तै हथरां छ़डो पन यीशु तैन केरि मेर्ज़ी सेइं सिपाही केरे हवाले कियो।
यीशु क्रूसे पुड़ च़ाढ़ो
ज़ैखन तैना यीशु नेइतां च़लोरे थियो, त तैनेईं शमौन कुरेनी ज़ै एक्की ड्लोंवेरां एवरो थियो, ट्लातो ते क्रूस तैस कां छ़ूने जो दित्तू, कि तू ई क्रूसे छ़ुइतां यीशु पत्ती च़ला।3
ते बड़े लोक तैस पत्ती च़लोरे थिये ते किछ कुआन्शां भी थी ज़ैना यीशुएरे लेई शोग बनैती थी। यीशुए तैन केरे पासे मुड़तां ज़ोवं, “हे यरूशलेम नगरेरी कुइयव मेरे लेई लेरां न देथ, बल्के अपने बच्चां केरे लेई लेरां देथ। किजोकि तैना मुश्किल दिहाड़े एजने बालेन ज़ैखन लोक एन ज़ोले कि, ‘धन आन तैना कुआन्शां ज़ैना बेऔलादन ते बच्चे न पाले।’”
“तैस वक्ते लोक पहाड़न सेइं ज़ोले,
‘असन उन्ढे बिछ़ड़ा ते उच्ची ठारन जो ज़ोले, कि असन छ़ुपाथ।’ किजोकि ज़ैखन तैनेईं सब्ज़ बुट्टे सेइं एन केरू, त शुक्कोरे बुट्टे सेइं कुन न केरेले?”
ते सिपैहेईं दूई होरे मुर्ज़म भी यीशु सेइं साथी च़लेवरे थिये ताके तैन भी मारन। ज़ैखन तैना तैस ठैरी पुज़्ज़े ज़ैस जो “खोपड़ी” ज़ोतन त तैड़ी यीशु क्रूसे पुड़ च़ाढ़ो, ते तैना दूई मुर्ज़मन भी एक्की यीशुएरे देइने पासे ते होरि बांए पासे क्रूसे पुड़ च़ाढ़े। यीशु ज़ोवं, “हे बाजी एन माफ़ करां एन न ज़ानन कि एना कुन लगोरेम केरने।” ते तैनेईं तैसेरे लिगड़ां केरे लेई पेरची छ़ेडतां शर्त रख्खू ते एप्पू मांमेइं बंटां। लोक खड़खड़े एन सब किछ हेरने लगोरे थिये ते सरदार ज़ोरे-ज़ोरे सेइं ज़ोते थिये, “एनी होरे त बच़ाए ते अगर ऐह मसीहे ते परमेशरेरो च़ुनोरे त अपने आपे किजो न बच़ाए।” सिपाही भी तैस कां एइतां तैसेरी हासी बनाने लगे (किजोकि तै अपनो आप राज़ो बनातो थियो), ते घटिया दाछ़रो रस पीनेरे लेई तैस देने लगे। “ते ज़ोते थिये तू अगर यहूदी केरो राज़ोस त अपनो आप बच़ा!” ते तैस क्रूसे पुड़ यानी यीशुएरे क्रोड़ी करां बहा अक पखड़ी लिखतां लेवरी थी, ते तैस पुड़ एन लिखोरू थियूं, “ऐह यहूदी केरो राज़ आहे।”
मन फिराने बालो डैकू
तैन दूई डैकू ज़ैना मारे जे तैन मरां एक्के यीशु जो तुहीन केरतां ज़ोवं, “अगर तू मसीह आस त एप्पू भी बच़ ते असन भी बच़ा।” पन होरे दूइयोवं डैके तैस जो झ़िड़कतां ज़ोवं, “तीं परमेशरेरो भी डर नईं? ज़ै सज़ाह तैस मैल्हने लावरी तीं भी त तैए सज़ाह मैल्हने लावरीए। असन त न्यायेरे मुताबिक अपने बुरे कम्मां केरि सज़ाह मैल्हने लावरी पन एनी त कोई गलत कम नईं कियेरू।” तैखन तैनी ज़ोवं, “हे यीशु ज़ैखन तू अपने राज़्ज़े मां एज्जेलो त मीं भी याद केरां।” यीशुए तैस जो ज़ोवं, “अवं तीं सेइं सच़ ज़ोताईं कि तू अज़्ज़े मीं सेइं साथी सुर्गे मां भोल्हो।”
यीशु क्रूसे पुड़ प्राण देते
दीसरे 12 बज़ेई सारे मुल्खे मां आंधरू भोवं, त ट्लेइ बज़न तगर रावं।4 दिहाड़ो भी कालो भोव ते मन्दरेरो पड़दो बां देंता बुन तगर फेटतां दूई टुक्ड़े भोइ जे। यीशुए बड़े ज़ोरे सेइं ज़ोवं, “हे बाजी अवं अपनि आत्मा तेरे हथ्थे मां सौंफताईं,” ते एन ज़ोइतां यीशुए प्राण दित्ते। ज़ैखन रोमी सूबेदारे एन सब हेरू त परमेशरेरी तारीफ़ केरते ज़ोवं, “ए मैन्हु सच़्च़े धर्मी थियो।” ते सारे लोक ज़ैना तैड़ी थिये ए अनर्थ हेरतां छाती पिट्टते च़ले जे। पन यीशुएरे सारे दोस्त ते तैना कुआन्शां ज़ैना गलील इलाके मरां यीशुए पत्पती एवरी थी दूर ज़ेरे खेड़ोइतां, ज़ैन किछ भोइ राहोरू थियूं सब किछ हेरी रेवरी थी।
यीशु दबनो
(मत. 27:57-61;मरक. 15:42-47;यूह. 19:38-42)
अक मैन्हु थियो, ज़ेसेरू नवं यूसुफ थियूं, तै यहूदी केरि आदालतरो अक मुलाज़म भी थियो, ते अक बड़ो नेक ते धर्मी मैन्हु थियो। तै बेड्डी आदालत अफसरां केरे फैसलेरे हके मां न थियो। तै यहूदी केरे नगर अरिमतियाह रानेबालो थियो, ते परमेशरेरे राज़्ज़ेरे तलाशी मां थियो। तैनी पिलातुसे कां गेइतां यीशुएरी लाश मग्गी। ते लाश क्रूसे पुड़ेरां ओसैलतां मलमलेरे कपड़े मां पलेटतां ते एक्की कब्री मां रख्खी, ज़ै एक्की शफ़ड़ी मां बनेवरी थी, तैस कब्री मां पेइले कोई लाश न थी रख्खोरी। तै तियैरारी दिहाड़ी थी ज़ै आरामेरी दिहाड़ी शुरू भोने बाली थी। ते तैना दूई कुआन्शां ज़ैना गलील इलाके मरां यीशुए पत्पती एवरी थी, यूसुफे पत्पती जेई ते तैनेईं तै कब्र हेरी, कि यीशुएरी लाश एसमां केन्च़रे सेइं रख्खोरीए। तैखन तैना अपने घरे वापस आए, ते खुशबूदार चीज़ां ते इत्र तियार कियो ते आरामेरे दिहाड़े मूसेरे कानूनेरे मुताबिक आराम कियो।
Source notes (4)
- Cross-reference मत. 27:1-2,11-14;मरक. 15:1-5;यूह. 18:28-38.
- Cross-reference मत. 27:15-26;मरक. 15:6-15;यूह. 18:39—19:16.
- Cross-reference मत. 27:32-44;मरक. 15:21-32;यूह. 19:17-27.
- Cross-reference मत. 27:45-56;मरक. 15:33-41;यूह. 19:28-30.
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.