Bhadrawahi Bible
लैव्यव्यवस्था 9
याजकेरी सेवकाई केरनेरे लेई बलिदान देनू
अभिषेक केरनेरे रसमरे सत दिहाड़ना बाद मूसे हारून ते तैसेरां मट्ठां ते इस्राएली बुज़ुर्ग कुजेइतां तैन केरे सामने हारूने सेइं ज़ोवं, “पापबेलरे लेई अक बगैर नुक्से बछ़ड़ू, ते होमबेलरे लेई अक बगैर नुक्से हुड़ नेइतां यहोवारे सामने बलि च़ाढ़। ते इस्राएली लोकन सेइं इन ज़ो, ‘तुस पापबेलरे लेई अक थाव्वो, ते होमबेलरे लेई अक बछ़ड़ू ते अक गबड़ू नेथ, तैना दूईये एक्की-एक्की सालेरां भोन ते बगैर नुक्से भोन, ते मेलबेलरे लेई यहोवारे सामने च़ाढ़नेरे लेई अक दांत ते अक हुड़, ते तेले सेइं सन्नोरे अट्टेरी अक अन्नेरी बलि भी नेथ; किजोकि अज़ यहोवा तुसन दर्शन देलो।’” ते ज़ैस-ज़ैस चीज़रो हुक्म मूसे दित्तो तैना सब तैनेईं मिलापे बाले तेम्बेरे नेड़े एन्हीं; ते सारी मेण्डलरे नेड़े गेइतां यहोवारे सामने खड़ी भोइ। तैखन मूसे ज़ोवं, “इन तैन कम्मे ज़ैन केरनेरे लेई यहोवाए तुसन हुक्म दित्तोरोए कि तुस तैस केरा; ते यहोवारे महिमारो तेज तुसन लेइलो।” तैखन मूसे हारूने सेइं ज़ोवं, “यहोवारे हुक्मेरे मुताबिक वेदी कां नेड़े गेइतां अपने पापबलि ते होमबलि च़ेढ़तां अपने ते सब लोकां केरे लेई प्रायश्चित केर ते लोकां केरे च़ढ़तलन भी च़ेढ़तां तैन केरे लेई प्रायश्चित केर।”
एल्हेरेलेइ हारूने वेदी कां नेड़े गेइतां अपने पापबेलरू बछ़ड़ू बलिदान कियूं। ते हारूनेरे मट्ठेईं खून तैस कां आनो, तैखन तैनी अपनि अंगलोइ खूने मां डोबतां वेदरे शिंगन पुड़ खून लव, ते बाकी खून वेदरे पेइड़न पुड़ उलटाव; ते पापबेलरी चर्भी ते दूईये गुर्दे ते कलैज़े पुड़ेरी झिल्ली तैनी वेदी पुड़ फुक्की, ज़ेन्च़रे यहोवाए मूसे हुक्म दित्तोरो थियो। ते मास ते खाड़ी तैनी डेरन करां बेइर अग्गी मां फुक्की।
तैखन होमबेलरो जानबर बलि कियो; ते हारूनेरे मट्ठेईं खून तैसेरे हथ्थे मां दित्तो, ते तैनी तै वेदी पुड़ च़ेवरे पासन छ़िड़को। तैखन तैनेईं होमबेलरे जानबरेरे टुक्ड़े-टुक्ड़े केरतां क्रोड़ी सने तैसेरे हथ्थे मां दित्तो ते तैनी तैना वेदी पुड़ फुक्के। ते तैनी आंट्लां ते खुरैड़ू धोइतां वेदी पुड़ होमबेलि पुड़ फुक्कां।
तैखन हारूने लोकां केरि च़ढ़तलां अग्गर नेइतां ते तैस पापबेलरे थाव्वे ज़ै तैन केरे लेई थियो नेइतां तैसेरू बलिदान कियूं, ते ज़ेन्च़रे तैनी पेइली अपने लेई पापबलि च़ाढ़ोरी थी तेन्च़रे तै भी च़ाढ़ी। फिरी तैनी होमबलि भी नेड़े नेइतां विधरे मुताबिक च़ाढ़ी। ते अन्नेरी बलि भी नेड़े नेइतां तैस मरां मुठड़ी भेरतां वेदी पुड़ फुक्कू, ई रोज़ झ़ेझ़ेरे होमबेलरे अलावा च़ाढ़ी जेई।
दांत ते हुड़, मतलब ज़ैना मेलबलि जानबर लोकां केरे लेई थिये तैन केरि भी बलि दित्ती जेई; ते हारूनेरे मट्ठेईं खून तैसेरे हथ्थे मां दित्तो, ते तैनी तै वेदी पुड़ च़ेवरे पासन छ़िड़को; ते तैनेईं दांतेरी चर्भी, ते हुड़ेरू मोट्टू पौंछ़ड़, ते ज़ैस चेर्भी सेइं आंट्लां ढेकोरी रैतिन तै, ते गुर्दन सने कलैज़े पुड़ेरी झिल्ली भी तैसेरे हथ्थे मां दित्ती; ते तैनेईं चर्भी छैतन पुड़ रख्खी; ते तैनी तै चर्भी वेदी पुड़ फुक्की, पन छैती ते देइनी ज़ंघ हारूने मूसेरे हुक्मेरे मुताबिक हिलानेरी च़ढ़तलरे लेई यहोवारे सामने हिलाई।
फिरी हारूने लोकां केरे पासे हथ अग्रोवं केरतां तैन्न आशिर्वाद दित्तो; ते पापबलि, होमबलि, ते मेलबेलिन च़ैढ़तां तै बुन ओस्तां अव। तैखन मूसो ते हारून मिलापे बाले तेम्बु मां जे, ते निस्तां लोकन आशिर्वाद दित्तो; तैखन यहोवारी महिमा सारे लोकन लेइहोई। ते यहोवारे सामनेरां अग निस्सी ते चेर्भी सने होमबेलरे वेदी पुड़ भस्म भोइ जेई; एन हेरतां लोकेईं जय-जयकारेरे नहरे लाए, ते अपने-अपने तुत्तरेरे भारे झुकतां मथ्थो टेको।
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.