Bhadrawahi Bible
लैव्यव्यवस्था 10
नादाब ते अबीहू भस्म भोतन
तैखन नादाब ते अबीहू नंव्वेरां हारूनेरे मट्ठन मरां दूइयेईं अपनु-अपनु धूपदान आनू, ते तैन मां अग भरी, ते तैस मां धूप छ़ेडतां तै नाजाइज़ अग ज़ेसेरो हुक्म यहोवा न थियो दित्तोरो यहोवारे सामने अर्पित की। तैखन अचानक यहोवारे सामनेरां अग निस्सी ते तैना दूईये भस्म किये, ते तैना यहोवारे सामने मेरि जे। तैखन मूसे हारूने सेइं ज़ोवं, “ई तैए गल्ले ज़ेसेरे बारे मां यहोवाए ज़ोवरू थियूं, कि ज़ैना सेवा केरनेरे लेई नेड़े एज्जन ज़रूरी आहे कि तैना मेरे पवित्र भोनेरी आदर केरन, ते सारे लोकां केरे सामने मेरी महिमा केरन।” ते हारून च़ुप राव।
तैखन मूसे मीशाएल ते एलसाफाने ज़ैना हारूनेरे चाचे उज्जीएलेरां मट्ठां थियां कुजेइतां ज़ोवं, “तुस इड़ी नेड़े एज्जा, ते अपने ढ्लाएरे मट्ठन पवित्र जगारे अगरां छ़ुइतां डेरन मरां बेइर नेथ।” मूसेरे इस हुक्मेरे मुताबिक तैना नेड़े जे ते तैनेईं तैना लिगड़न समेत छ़ुइतां डेरन करां बेइर निये। तैखन मूसे हारूने सेइं ते तैसेरे मट्ठन, एलीआजर ते ईतामारे सेइं ज़ोवं, “तुस लोक अपने दोग्गेरे बाल न खिलारा, ते न अपना लिगड़ां छ़िन्दां, एरू न भोए कि तुस भी मेरि गाथ, ते सैरी मण्डली पुड़ तैसेरो क्रोध भड़के; पन इस्राएलेरे सारे घरानेरे लोक ज़ैना तुश्शे रिश्तेदारन तैना यहोवारे लेवरी अग्गी पुड़ मातम केरन। ते तुस लोक मिलापे बाले तेम्बेरे दारेरे बेइर न गेइयथ, एरू न भोए कि तुस मेरि गाथ; किजोकि यहोवारे अभिषेकेरो तेल तुसन पुड़ लेवरोए।” मूसेरे ज़ोनेरे मुताबिक तैनेईं कियूं।
याजकां केरे लेई रखोरे चाल चलन
फिरी यहोवाए हारूने सेइं ज़ोवं, “ज़ैखन-ज़ैखन तू या तेरां मट्ठां मिलापे बाले तेम्बु मां एज्जन तैखन-तैखन तुसन मरां कोई न त दाछ़रो रस पीतां भोए न होरि कोन्ची किसमेरी शराब, कोन्च एरू न भोए कि तुस भी मेरि गाथ; तुश्शी पीढ़ी-पीढ़ी मां ई विधि मन्नी गाली, ज़ैस सेइं तुस पवित्र ते अपवित्र, ते शुद्ध ते अशुद्धे मां फर्क केरि सकथ; ते इस्राएली लोकन तैना सब विधन शिखैली सकथ ज़ैना यहोवाए मूसेरे ज़िरिये तैन्न दित्तोरिन।”
फिरी मूसे हारूने सेइं ते तैसेरे बच़ोरे दूईये मट्ठन एलीआजर ते ईतामारे सेइं भी ज़ोवं, “यहोवारे हबने मरां ज़ै अन्नेरी बलि बंच़ोरीए तैस नेइतां वेदी कां बगैर खमीरे खाथ, किजोकि तै परमपवित्रे; ते तुस तैस कोन्ची पवित्र ठारी मां खाथ, किजोकि ज़ैन किछ लोक यहोवारे लेई हबन देतन तैस मां तेरू ते तेरे मट्ठां केरू हके; किजोकि मीं एरहो हुक्म मैल्होरोए। तैखन हिलावरी च़ढ़तलरी छाती ते सल्लोरी च़ढ़तलरी ज़ंघ तुस लोक, मतलब तू ते तेरां मट्ठां-कुइयां सब कोन्ची शुद्ध ठारी पुड़ खाथ; किजोकि तैना इस्राएली लोकां केरि मेलबेलिन मरां तेरू ते तेरे बच्चां केरू हक रखोरूए। चेर्भरे हबनन सने ज़ै सल्लोरी ज़ंघ ते हिलेवरी छाती यहोवारे सामने हिलानेरे लेई एज्जेली, इना हिस्से यहोवारे हुक्मेरे मुताबिक सदारे विधरे कानूने सेइं तेरे ते तेरे बच्चां केरे लेई आन।”
फिरी मूसे पापबेलरे थाव्वेरी हेरजाच की, त तैस पतो च़लो कि तै फुक्कोरोए, एल्हेरेलेइ एलीआजर ते ईतामार ज़ैना हारूनेरां मट्ठां बच़ोरां थियां तैन सेइं तै सेरकोइतां ज़ोने लग्गो, “पापबलि ज़ै परमपवित्रे ते ज़ै यहोवाए तुसन एल्हेरेलेइ दित्तोरीए कि तुस मेण्डलरे अधर्मेरो भार एप्पु पुड़ छ़ुइतां तैन केरे लेई यहोवारे सामने प्रायश्चित केरथ, तुसेईं तैसेरू मास पवित्र ठारी पुड़ किजो न खवं? हेरा, तैसेरो खून पवित्र ठारारे अन्तर त आनोरो नईं, इस मां कोई शक नईं इन जाइज़ थियूं कि तुस मेरे हुक्मेरे मुताबिक तैसेरे मासे पवित्र ठारी पुड़ खाथे।” इसेरो जुवाब हारूने मूसे एन्च़रां दित्तो, “हेर, अज़्ज़े तैनेईं अपनि पापबलि ते होमबलि यहोवारे सामने च़ाढ़ी; फिरी मीं पुड़ एरी आफतां एवरिन! एल्हेरेलेइ अगर अवं अज़ पापेरी बेलरू मास खाथो त कुन ई गल यहोवारे सामने रोड़ी भोथी?” ज़ैखन मूसे इन शुनू तैस तसल्ली भोइ।
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.