Bhadrawahi Bible
लैव्यव्यवस्था 24
पवित्र दीये सज़ाने
फिरी यहोवाए मूसे सेइं ज़ोवं, “इस्राएली लोकन ई हुक्म दे कि मीं कां लौ देनेरे लेई झ़ुसतां कढोरो ज़ैतूनेरो खालिस तेल ऐनथ, कि दीयो लगातार बलतो राए। हारून तैस, मिलापे बाले तेम्बु मां, करारेरो सन्दूखेरे मझ़ाटेरे पड़दे करां बेइर, यहोवारे सामने रोज़ ड्लवझ़ी करां झ़ेझ़ां तगर सज़ेइतां रख्खे; ई तुश्शी पीढ़ी-पीढ़रे लेई हमेशारी विधि भोल्ही। तै दीयन सोन्नेरे दीवटे पुड़ यहोवारे सामने रोज़ सज़ाए।
तेम्बेरी रोट्टी
“तू मैदो नेइतां 12 रोट्टी पकावेइयां, हर एक्की रोट्टी1 मां एपारू दूई दशोवं हिस्सो अट्टू भोल्हु। तैखन तैन केरि दूई बारां बनेइतां, एक्की-एक्की बारी मां शा-शा रोट्टी साफ मेज़े पुड़ यहोवारे सामने रेखां। ते एक्की-एक्की बारी पुड़ शुद्ध लोबान रखनो कि तै रोट्टी याद करानेबाली चीज़ ते यहोवारे लेई हबन भोए। हर थैकरे दिहाड़े तै तैस रोज़ यहोवारे सामने बारां सेइं रख्खे, ई हमेशारे करारेरे रीति पुड़ इस्राएली लोकां केरि तरफां भोल्ही। ते तैना हारून ते तैसेरे मट्ठां केरि भोल्ही, ते तैना तैस कोन्ची पवित्र ठारी मां खान, किजोकि तै यहोवारे बलिदान्न मरां हमेशारी विधरे मुताबिक हारूनेरे लेई परमपवित्र चीज़ भोल्ही।”
परमेशरेरी निन्दा केरनेरी सज़ाह
तैन दिहाड़न मां कोन्ची इस्राएली कौन्शरू मट्ठू, ज़ेसेरो बाजी मिस्री मड़द थियो, इस्राएली लोकन मां च़लो जेव; ते तैन इस्राएली कौन्शरू मट्ठू ते अक इस्राएली मड़द डेरां केरे मझ़ाटे एप्पु मांमेइं लड़ने लग्गे, ते तैन इस्राएली कौन्शरू मट्ठू यहोवारे नंव्वेरी निन्दा केरतां श्राप देने लगू। एन शुन्तां किछ लोकेईं तैन मूसे कां निव। तैसेरी अम्मरू नवं शलोमीत थियूं, ज़ै दानेरे गोट्लेरे दिब्री नंव्वे मैन्हेरी कुई थी। तैनेईं तैन कैदखाने मां बन्द कियूं, ज़ैस सेइं यहोवारे हुक्मेरे मुताबिक इस गल्ली पुड़ विचार कियो गालो।
तैखन यहोवाए मूसे सेइं ज़ोवं, “तुस लोक तैस श्राप देनेबाले डेरन करां बेइर नेथ; ते ज़ेत्रेइं तै निन्दा केरतो शुनोरो भोए तैना सब अपने-अपने हथ तैसेरे दोग्गे पुड़ रखन, तैखन सारी मेण्डलरे लोक तैस पुड़ घोड़ेईं देन। ते तू इस्राएली लोकन सेइं ज़ो कि कोई की न भोए, ज़ै अपने परमेशरे जो श्राप दे तै अपने पापेरो ज़िमेवार भोल्हो। यहोवारे नंव्वेरी निन्दा केरनेबालो ज़रूर मारो गालो; सारी मेण्डलरे लोक ज़रूर तैस पुड़ घोड़ेईं देन; चाहे तै देशी भोए चाहे परदेशी, अगर कोई यहोवारे नंव्वेरी निन्दा केरे त तै मारो गालो।
“फिरी ज़ै कोई कोन्ची मैन्हु जानां मारे तै ज़रूर मारो गालो। ते ज़ै कोई कोन्ची घरेरे जानबरन जानां मारे तै तैस प्राणेरे बदले प्राण दे।
“फिरी कोई कोन्ची होरि मैन्हु चोट पुज़ाए, त ज़ेरू तैने कियोरू भोल्हु तेरहु तैस सेइं भी कियूं गालू, मतलब अंग-भंग केरनेरे बदले अंग-भंग कियो गालो, अछ़रे बदले अछ़, ते दंतेरे बदले दंत, ज़ेरि चोट ज़ैनी कोन्ची पुज़ावरि भोल्ही तेरही तैस भी पुज़ाई गाली। जानबरे मारनेबालो तैसेरो बदलो दे, पन मैन्हु मारनेबालो मारो गालो। तुश्शो नियम अक्के भोए, ज़ेरो देशी मैन्हेरे लेई तेरहो परदेशी केरे लेई भी भोए; अवं तुश्शो परमेशर यहोवा आईं।” ते मूसे इस्राएली लोकन इन समझ़व; तैखन तैनेईं तै श्राप देनेबालो डेरन करां बेइर नेइतां तैस पुड़ घोड़ेईं दित्ती। ते इस्राएली लोकेईं तेरहु कियूं ज़ेरो यहोवाए मूसे हुक्म दित्तोरो थियो।
Source notes (1)
- Footnote रोट्टी हर रोट्टी 2 किल्लो
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.