Bhadrawahi Bible
लैव्यव्यवस्था 23
खास तिहारां केरे दिहाड़े
फिरी यहोवाए मूसे सेइं ज़ोवं, “इस्राएली लोकन सेइं ज़ो कि यहोवारां तिहारां ज़ैन केरी तुसेईं पवित्र सभा अकोट्ठी केरनेरे लेई ठीक वक्ते पुड़ प्रचार केरनो भोल्हो, मेरां तैना तिहारां इना आन।
थैकरी दिहाड़ी
“तुश्शे लेई हफतेरे शा दिहाड़े कम-काज़ केरनेरे लेई आन, पन सत्तोवं दिहाड़ी आरामेरी ते पवित्र सभारी दिहाड़ीए; एल्हेरेलेइ तुस तैस दिहैड़ी कोन्ची किसमेरू कम-काज़ न केरथ; तै तुश्शे सेब्भी घरन मां यहोवारी थैकरी दिहाड़ी भोल्ही।
फ़सह ते अखमीरी रोट्टी
“फिरी यहोवारां तिहारां ज़ैन मरां एक्की-एक्की ठहरावरे वक्ते मां तुसन पवित्र सभा केरनेरे लेई प्रचार केरनो भोल्हो तैना इना आन। पेइले1 महीनेरे च़ेवधोवं दिहाड़े ड्लवझ़रे मौके यहोवारे फ़सह तिहारेरी शुरुआत भोल्ही। ते तैस्से महीनेरे परहनोवं दिहाड़े यहोवारे लेई अखमीरी रोट्टरू तिहार भोल्हु; तैस मां तुस सत दिहाड़न तगर अखमीरी रोट्टी खेइयथ। इस तिहारेरे पेइली दिहाड़ी तुश्शी पवित्र सभा भोल्ही; ते तैस दिहाड़े मेहनतरू कोई कम न केरथ। ते सत्तोवं दिहाड़े तुस यहोवा जो च़ढ़तल अग्गी मां फुकतां च़ैढ़थ; ते सत्तोवं दिहाड़े पवित्र सभा भोल्ही; तैस दिहाड़े मेहनतरू कोई कम न कियूं गालू।”
पेइली फसलरू तिहार
फिरी यहोवाए मूसे सेइं ज़ोवं, “इस्राएली लोकन सेइं ज़ो कि ज़ैखन तुस तैस मुल्खे मां दाखल भोथ ज़ै यहोवा तुसन देते ते तैट्ठेरे उडारन कट्टथ, तैखन अपने-अपने पकोरे ऊडारां केरि पेइली फसलरो पूलोटु याजके कां ऐनथ; ते तै तैस पूलोटु यहोवारे सामने हिलाए कि तै तुश्शे लेई कबूल कियो गालो; तै तैस थैकरे दिहाड़ेरे एग्री दिहाड़े हिलाए। ते ज़ैस दिहाड़े तुस पूलोटु हिलाथ तैस्से दिहाड़े एक्की सालेरू बगैर नुक्से गबड़ू यहोवारे लेई होमबलि च़ैढ़थ। ते तैस साथी अन्नेरी बलि एपारे दूई दशोवं अंश तेले सेइं सन्नोरे मैदो भोए तै पसंद एजनेबाली खुशबूअरे लेई यहोवारू हबन भोल्हु; ते तैस साथी पीनेरी च़ढ़तल हीन भर च़ेवरोवं दाछ़रो रस2 भोए3। ते ज़ांतगर तुस इस च़ढ़तली अपने परमेशरे कां न नेथ, तैस दिहाड़े तगर नंव्वे उडारे मरां न त रोट्टी खानी ते न ट्लाड़ोरू अन्न ते न नीलां शिल्लां खेइयथ; ई तुश्शी पीढ़ी-पीढ़ी मां तुश्शे सारे घराने मां हमेशारी विधि भोल्ही।
हफतां केरू तिहार
“फिरी तैस थैकरे दिहाड़ेरे दूइयोवं दिहाड़े करां, मतलब ज़ैस दिहाड़े तुस हिलाने बाले च़ढ़तलरे पूलोटु आनेले, तैस दिहाड़े करां पूरे सत आरामेरे दिहाड़े गेनथ; सत्तोवं थैकरे दिहाड़ेरे एग्री दिहाड़े तगर 50 दिहाड़े गेनथ, फिरी पज़ाहवं दिहाड़े यहोवारे लेई नव्वीं अन्नेरी बलि च़ैढ़थ। तुस अपने घरन मरां एपारे दूई दशोवं4 अंश अट्टेरी दूई रोट्टी हिलानेरी च़ढ़तलरे लेई ऐनथ; तैना खमीरे सेइं पकेइयथ, ते तै यहोवारे लेई पेइली फसल भोल्ही। ते तैस रोट्टी सेइं साथी एक्की-एक्की सालेरां सत बगैर नुक्से गबड़ां, ते अक बछ़ड़ू, ते दूई हुड़ च़ैढ़थ; तैन अपने-अपने साथी अन्नेरी बलि ते पीनेरी च़ढ़तली सने यहोवारे लेई होमबेलरी ज़ेरि च़ैड़नी भोल्ही, मतलब तैन यहोवारे लेई पसंद एजनेबाली खुशबू देने बालू हबन भोल्हु। फिरी पापबेलरे लेई अक थाव्वो, ते मेलबेलरे लेई एक्की-एक्की सालेरां दूई गबड़ां च़ैढ़थ। तैखन याजक तैन्न पेइली फसलरी रोट्टी समेत यहोवारे सामने हिलानेरी च़ढ़तलरे लेई हिलाए, ते इन रोट्टन साथी तैना दूई गबड़ां भी हिलाना भोल्हां; तैना यहोवारे लेई पवित्र, ते याजकेरो हिस्सो ठहरे। ते तुस तैस दिहाड़े ई प्रचार केरथ, कि अज़ इश्शी अक पवित्र सभा भोल्ही; ते मेहनतरू कोई कम न कियूं गालू; ई तुश्शे सारे घराने मां तुश्शी पीढ़ी-पीढ़ी मां हमेशारी विधि भोल्ही।
“ज़ैखन तुस अपने मुल्खे मां ऊडारां केरी फसल कट्टथ, त तैखन अपने उडारेरे कून्न पूरे तरीके सेइं न केटथ, ते उडारे मां झ़ड़ोरे शिल्लन अकोट्ठे न केरथ; तैना गरीब ते परदेशी लोकां केरे लेई शैरथ ज़ैना तुश्शे दरमियाने मां रहतन; अवं तुश्शो परमेशर यहोवा आईं।”
नंव्वे सालेरू तिहार
फिरी यहोवाए मूसे सेइं ज़ोवं, “इस्राएली लोकन सेइं ज़ो कि सत्तोवं महीनेरे पेइले दिहाड़े तुश्शे लेई खास थैकरी दिहाड़ी भोल्ही; तैस दिहैड़ी याद करानेरे लेई नरशिंगे बज़ानो ठहरे, ते अक पवित्र सभा अकोट्ठी भोल्ही। तैस दिहाड़े तुस मेहनतरू कोई कम न केरथ, ते यहोवारे लेई अक हबन च़ैढ़थ।”
प्रायश्चितेरि दिहाड़ी
फिरी यहोवाए मूसे सेइं ज़ोवं, “तैस्से सत्तोवं महीनेरे दशोवं दिहाड़े प्रायश्चितेरि दिहाड़ी मनाई गाली; तै तुश्शी पवित्र सभारी दिहाड़ी भोल्ही, ते तैस मां तुस बरत रेखत ते यहोवारे लेई च़ढ़तल अग्गी मां फुकतां च़ैढ़थ। तैस दिहाड़े तुस कोन्ची किसमेरू कम-काज़ न केरथ; किजोकि तै प्रायश्चित केरनेरी दिहाड़ी ठहरावरी भोल्ही ज़ैस मां तुश्शे परमेशर यहोवारे सामने तुश्शे लेई प्रायश्चित कियूं गालू। एल्हेरेलेइ ज़ै मैन्हु तैस दिहाड़े बरत न रख्खे तै अपने लोकन मरां अलग कियो गालो। ते ज़ै मैन्हु तैस दिहाड़े कोन्ची किसमेरू कम-काज़ केरे तैस मैन्हु अवं तैसेरे लोकन मरां नाश केरतां छ़डेलो। तुस कोन्ची किसमेरू कम-काज़ न केरथ; ई तुश्शी पीढ़ी-पीढ़ी मां तुश्शे टब्बरे मां हमेशारी विधि भोल्ही। तै दिहाड़ी तुश्शे लेई महा आरामेरी भोल्ही, तैस मां तुस बरत रेखत; ते तैस महीनेरे दशोवं दिहाड़ेरे ड्लवझ़ी करां एग्री ड्लवझ़ी तगर अपनि थैकरी दिहाड़ी मनेइयथ।”
झोफड़ी केरू तिहार
फिरी यहोवाए मूसे सेइं ज़ोवं, “इस्राएली लोकन सेइं ज़ो कि तैस्से सत्तोवं महीनेरे परहनोवं दिहाड़े करां सत दिहाड़न तगर यहोवारे लेई झोफड़ी केरू तिहार मनावं गालू। पेइले दिहाड़े पवित्र सभा भोल्ही; तैस मां मेहनतरू कोई कम न केरथ। सत्तोवं दिहाड़े यहोवारे लेई हबन च़ैढ़थ, फिरी अठोवं दिहाड़े तुश्शी पवित्र सभा भोल्ही, फिरी तैस्से दिहाड़े यहोवारे लेई हबन च़ैढ़थ; तै महा सभारी दिहाड़ी भोल्ही, ते तैस मां मेहनतरू कोई कम न कियूं गालू।
“यहोवारां रख्खोरां तिहारां इन्ना आन, इन मां तुस यहोवा कां हबन च़ैढ़थ, मतलब होमबलि, अन्नेरी बलि, मेलबलि, ते पीनेरी च़ढ़तल, हर अक अपने-अपने ठीक मौके पुड़ च़ैढ़थ ते पवित्र सभारो प्रचार केरथ। इन सेब्भन करां जादे यहोवारी थैकरी दिहाड़ी मनेइयथ, ते अपनि च़ढ़तलन, ते सब मिन्नतां, ते अपने मेर्ज़री बेलि ज़ैना यहोवा जो अर्पण केरेले च़ैढ़थ।
“फिरी सत्तोवं महीनेरे परहनोवं दिहाड़े, ज़ैखन तुस मुल्खेरी फसल अकोट्ठी केरि छ़डथ, तैखन सत दिहाड़न तगर यहोवारू तिहार मनेइयथ; पेइले दिहाड़े महा आराम ठहरे, ते अठोवं दिहाड़े महा आराम ठहरे। ते पेइले दिहाड़े तुस रोड़े-रोड़े बुट्टां केरे फल, ज़ेन्च़रे कि खजूरेरां पट्लां, ते घने पट्लां केरे बुट्टां केरि डैलड़न, ते दरियाए मरां मजनू नेइतां अपने परमेशर यहोवारे सामने सत दिहाड़न तगर आनन्द मनेइयथ। हर साल सत दिहाड़न तगर यहोवारे लेई तिहार मनेइयथ; ई तुश्शी पीढ़ी-पीढ़ी मां हमेशारी विधि भोल्ही, कि सत्तोवं महीने मां इन तिहार मनाव गालू। सत दिहाड़न तगर तुस झोफड़न मां रेइयथ, सारे ज़ेत्रे ज़र्मोरे इस्राएली लोक आन तैना सब झोफड़न मां रान
“एल्हेरेलेइ कि तुश्शी पीढ़ी-पीढ़ी केरे लोकन पतो लग्गे, कि ज़ैखन यहोवाए असां इस्राएली लोक मिस्र मुल्खे मरां केढतां आन्ने लेवरो थियो तैखन तैनी झोफड़न मां रखोरे थिये; अवं तुश्शो परमेशर यहोवा आईं।” ते मूसे इस्राएली लोकन यहोवारे तिहारां मन्नेरे लेई ठीक मौको ज़ोवरो थियो।
Source notes (4)
- Footnote ई मारच महीनेरे अध्धे करां अध्धे अप्रैले तगर कधी भी शुरू भोते। इब्रानी महीनो चैंदनरे मुताबिक शुरू भोते थी। एल्हेरेलेइ तैन केरे कैलेंडर महीने इश्शे कैलेंडरे मुताबिक लगातार बदलते रहतन
- Footnote हीन भर च़ेवरोवं दाछ़रो रस दूई किल्लो अट्टू, अक लीटर दाछ़रो रस
- Cross-reference निर्ग. 29:40.
- Footnote एपारे दूई दशोवं दूई किल्लो अट्टू
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.