Bhadrawahi Bible
लैव्यव्यवस्था 21
याजकां केरे लेई खास विधि
फिरी यहोवाए मूसे सेइं ज़ोवं, “हारूनेरां मट्ठां ज़ैना याजकन, तैन सेइं ज़ो कि तुश्शे लोकन मरां कोई भी मरे, त तैन केरे वजाई सेइं तुसन मरां कोई अपनो आप अशुद्ध न केरे; अपने नेड़ेरे कुटमेरे लोकन, मतलब अपनि अम्मा, बाजी, मट्ठू, कुई, या ढ्लारे लेई, या अपनि कुवारी बेइन ज़ेसेरो ड्लाह न भोए भोवरो, ज़ैन केरो नेड़ेरो रिशतोए; तैन केरे लेई तै अपने आपे अशुद्ध केरि सकते। पन याजक भोनेरे वजाई सेइं तै अपने लोकन मां प्रधाने, एल्हेरेलेइ तै अपने आपे एरहो अशुद्ध न केरे कि अपवित्र भोइ गाए।1 तैना न त अपनो दोग कटान, ते न अपनि दाढ़ी कट्टान, ते न अपने जान ज़खमी केरन।2 तैना अपने परमेशरेरे लेई पवित्र बेनतां रान, ते अपने परमेशरेरू नवं अपवित्र न केरन; किजोकि तैना यहोवारे हबने च़ाढ़तन, ज़ैन तैन केरे परमेशरेरी खूराके; इस वजाई तैना पवित्र बेनतां रान। तैना वेश्या या बदचलन कौन्शी सेइं ड्लाह न बनान; ते न शैरोरी कौन्शी सेइं ड्लाह बनान; किजोकि याजक अपने परमेशरेरे लेई पवित्र भोते। एल्हेरेलेइ तू याजके पवित्र सेमझ़ा, किजोकि तै तुश्शे परमेशरेरी रोट्टी च़ाढ़ते; एल्हेरेलेइ तैस पवित्र मन्ना; किजोकि अवं यहोवा पवित्र आईं, ज़ै तुसन पवित्र केरताईं। ते अगर याजकेरी कुई वेश्या बेनतां अपने आपे अपवित्र केरे, त तै अपने बाजी अपवित्र केरतीए; एल्हेरेलेइ तै अग्गी मां फुक्की गाए।
“ज़ै अपने ढ्लान मां महायाजक भोए, ज़ेसेरे दोग्गे पुड़ अभिषेकेरो तेल छ़डो जेवरोए, ते ज़ैसेरां पवित्र लिगड़ां लानेरे लेई संस्कार भोवरां भोन, तै अपने दोग्गेरे बालन खिलरने न दे, ते न अपना लिगड़ां छ़िन्दे; ते न तै कोन्ची लाशी कां गाए, ते न अपने बाजी या अम्मरे वजाई सेइं अपने आपे अशुद्ध केरे; ते तै पवित्र ठारी मरां बेइर भी न निस्से, ते न अपने परमेशरेरे पवित्र ठारी अपवित्र बनाए; किजोकि तैने अपने परमेशरेरे अभिषेक तेलेरे रूपे मां मुकुट धारण कियोरूए; अवं यहोवा आईं। ते तै कुवारी कौन्शी सेइं ड्लाह बनाए। ज़ै विधवा, या शारोरी भोए, या बदचलन, या वेश्या भोए, एरी कोन्ची सेइं तै ड्लाह न बनाए, तै अपने लोकन मरां कोन्ची कुवारी कुइये सेइं ड्लाह बनाए। ते तै अपने बच्चन अपने लोकन मां अपवित्र न केरे; किजोकि अवं तैसेरो पवित्र केरनेबालो यहोवा आईं।”
जिसमानी नुक्स ते याजक
फिरी यहोवाए मूसे सेइं ज़ोवं, “हारूने सेइं ज़ो कि तेरे खानदानेरे पीढ़ी-पीढ़ी मां ज़ैस कोन्ची कोई भी जिसमानी नुक्स भोए तै अपने परमेशरेरी रोट्टी च़ाढ़नेरे लेई नेड़े न एज्जे। कोई की न भोए, ज़ैस मां नुक्स भोए, तै नेड़े न एज्जे, चाहे तै कानो भोए, चाहे टोन्टो, चाहे नकचपटो भोए, चाहे तैसेरे किछ जादे अंग भोन, या तैसेरो पव, या हथ ट्लुटोरो भोए, या तै कुबड़ो, या छोट्टो भोए, या तैसेरी एछ़्छ़ी मां नुक्स भोए, या तैस मैन्हेरे चाईं या काणी भोए, या तैसेरे अण्ड पिचकोरे भोन; हारून याजकेरे कुटमे मां ज़ैस कोन्ची मां कोई भी जिसमानी नुक्स भोए, तै यहोवारे हबन च़ाढ़नेरे लेई नेड़े न एज्जे; तै ज़ै नुक्से बालोए कधी भी अपने परमेशरेरे रोट्टी च़ाढ़नेरे लेई नेड़े न एज्जे। तै अपने परमेशरेरे पवित्र ते परमपवित्र दूईयां किसमां केरि रोट्टी खाए, पन तैसेरे नुक्सेरे वजाई सेइं तै न त मझ़ेटियें पड़देरे अन्तर एज्जे ते न वेदी कां नेड़े, ज़ैस सेइं एरू न भोए कि तै मेरे पवित्र ठारी अपवित्र केरे; किजोकि अवं तैन पवित्र केरनेबालो यहोवा आईं।” एल्हेरेलेइ मूसे हारून ते तैसेरे मट्ठन ते सब इस्राएली लोकन इना गल्लां शुनेई।
Source notes (2)
- Footnote अपवित्र भोइ गाए या कोन्ची एरे मैन्हु ज़ै ड्लाहेरे बारे मां भोए
- Footnote ज़खमी केरन हेरा: 19:27-28 एन्च़रे मर्रे लोकां केरे लेई शोग मन्नेरे लेई कियूं गातू थियूं।
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.