Bhadrawahi Bible
लैव्यव्यवस्था 20
मौतरी सज़ाहरे पाप
फिरी यहोवाए मूसे सेइं ज़ोवं, “इस्राएली लोकन सेइं ज़ो कि इस्राएली लोकन मरां, या इस्राएली लोकन मां रानेबाले परदेशन मरां, कोई की न भोए, ज़ै अपने कोन्ची बच्चन मोलेक नंव्वेरे गैर कौमरे देबते जो बलिदान केरे तै ज़रूर मारो गालो; ते लोक तैस जो घोड़ेईं बान। अवं भी तैस मैन्हेरे खलाफ भोइतां, तैस तैसेरे लोकन मरां इस वजाई सेइं नाश केरेलो, कि तैने अपने बच्चे मोलेके जो देइतां पवित्र ठार अशुद्ध कियोरीए, ते मेरू पवित्र नवं अपवित्र कियोरूए। ते अगर कोई अपने बच्चे मोलेक देबते जो बलि केरे, ते लोक तैसेरे बारे मां बहाने केरन, ते तैस मारन नन्ना, तैखन त अवं एप्पु तैस मैन्हु ते तैसेरे टब्बरेरे खलाफ भोइतां तैस ते ज़ेत्रे तैस साथी भोइतां मोलेके सेइं साथी व्यभिचार केरन तैन सेब्भन भी तैन केरे लोकां केरे दरमियाने मरां नाश केरेलो।
“फिरी ज़ै मैन्हु जैदू टूनो केरनेबाले या भूत साधने बालां केरे पासे गाए, ते तैन पत्ती गेइतां व्यभिचार केरनेबालो बने, तैखन अवं तैस मैन्हेरे खलाफ भोइतां तैस तैसेरे लोकां केरे दरमियाने मरां नाश केरेलो। एल्हेरेलेइ तुस अपने आपे पवित्र केरा; ते पवित्र बनोरे राथ; किजोकि अवं तुश्शो परमेशर यहोवा आईं। ते तुस मेरे विधन मन्ना, ते तैन पुड़ अमल भी केरा; किजोकि अवं तुश्शो पवित्र केरनेबालो यहोवा आईं।
टब्बर ते जिसमानी रिश्तां केरो पाप
“कोई की न भोए, ज़ै अपने बाजी या अम्मा श्राप दे तै ज़रूर मारो गालो; तैनी अपने बाजी या अम्मा श्राप दित्तोरोए, एल्हेरेलेइ तै अपने मौतरो ज़िमेवार भोए। फिरी कोई बखली कौन्शी सेइं व्यभिचार केरे, त ज़ेत्रे कोन्ची होरेरी कौन्शी सेइं व्यभिचार केरन त तै व्यभिचार केरनेबालो ते तै व्यभिचार केरनेबाली दूईये ज़रूर मारे गान। अगर कोई अपनि बेबानी अम्मा सेइं जिसमानी रिश्तो बनाए, तै अपने बाजी केरो तन बेपरदा केरनेबालो ठहरे; एल्हेरेलेइ तैना दूईये ज़रूर मारां गान, तैना अपने मौतरे ज़िमेवार एप्पु भोल्हे। अगर कोई अपनि नुश्शी सेइं जिसमानी रिश्तो बनाए, त तैना दूईये ज़रूर मारां गान; किजोकि तैना उलटू कम केरनेबालां भोल्हां, ते तैना अपने मौतरे ज़िमेवार एप्पु भोल्हे। कोई ज़ैस तरीके सेइं कौन्शी सेइं तैस्से तरीके मड़दे सेइं जिसमानी रिश्तो बनाए, त तैना दूईये भिट्टू कम केरनेबाले भोल्हे; इस वजाई सेइं तैना ज़रूर मारे गान, ते तैना अपने मौतरे ज़िमेवार एप्पु भोल्हे। कोई अपनि लाड़ी ते अपनि शिख दूईयने रख्खे, त ई महापापे; एल्हेरेलेइ तै मड़द ते तैना कौन्शां ट्लां गान ते अग्गी मां फुक्कां गान, ज़ैस सेइं तुश्शे दरमियाने मां महापाप न भोए। फिरी कोई मड़द जानबरन सेइं जिसमानी रिश्तो बनानेबालो भोए, त तै मड़द ते जानबर दूईये ज़रूर मारे गान। अगर कोई कौन्श जानबरे कां गेइतां तैस साथी कुकर्म केरे, त तू तैस कौन्शी ते जानबर दूईयने मैरां; तैना ज़रूर मारे गान, ते तैना अपने मौतरे ज़िमेवार एप्पु भोल्हां।
“कोई अपनि बेइन, चाहे तैसेरी सकी बेइन भोए चाहे बेबानी बेइन, तैसेरी नेग्गी जान तक्के, ते तैसेरी बेइन भी तैसेरी नग्गी जान तक्के, त ई बेइज़्ज़त गल्ले, तैना दूईये अपने कौमरे ढ्लां केरे एछ़्छ़ी केरे सामने नाश कियां गान; किजोकि ज़ै अपनि बेइनरू तन बेपरदा केरनेबालोए तैस अपने पापेरी सज़ाह मैल्हेली। फिरी कोई मड़द कोन्ची मासिक धर्मे बैली कौन्शी सेइं साथी झ़ुलतां तैस सेइं साथी जिसमानी रिश्तो बनाए, त तै मड़द तैसेरे खूने बेपरदा केरनेबालोए, ते तै कौन्श अपने खूने बेपरदा केरनेबाली ठहरेली; इस वजाई सेइं तैना दूईये अपने लोकां केरे दरमियाने मरां नाश कियां गान। अपनि मैसी या बूजी सेइं जिसमानी रिश्तो नईं बनानो किजोकि ज़ै तैस बेपरदा केरे तै एपनी नेड़ेरी रिश्तेदारनी नग्गो केरते; एल्हेरेलेइ इन दूईयन अपने पापेरी सज़ाह मैल्हेली। कोई अपनि चैची सेइं जिसमानी रिश्तो बनाए, त तै अपने चाचेरो तन बेपरदा केरनेबालो ठहरे; एल्हेरेलेइ तैना दूईये अपने पापेरो भार छ़ुइतां बेऔलाद मेरि गान। कोई अपनि भाभी अपनि लाड़ी बनाए, त इन भिट्टू कम समझ़नू; ते तै अपने ढ्लाएरू तन बेपरदा केरनेबालोए, इस वजाई सेइं तैना दूईये बेऔलाद राहेलां।
“तुस मेरी सब विधि ते मेरे सब नियमन समझ़ी सेइं मन्ना; ज़ैस सेइं इन न भोए कि ज़ैस मुल्खे मां अवं तुसन नेही राहोरोईं तै तुसन उतारेलो। ते ज़ैस कौमरे लोकन अवं तुश्शे सामनेरां कढताईं, तैन केरि रीति-रूवाज़न पुड़ न च़ेलथ; किजोकि तैन लोकेईं ज़ैना इना सब कुकर्म कियोरेन, इस्से वजाई सेइं मीं तैन सेइं नफरत भोइ जेवरीए। पन अवं तुसन लोकन सेइं ज़ोताईं कि तुस त तैन केरि ज़मीनरे मालिक भोल्हे, ते अवं इस मुल्खे मां ज़ैस मां दुद्ध ते मैछ़ेरी गड्डां1 बेगतिन तुश्शे अधिकारे मां केरेलो; अवं तुश्शो परमेशर यहोवा आईं ज़ैनी तुस बाकी मुल्खां केरे लोकन मरां अलग कियोरोरेथ। इस वजाई सेइं तुस शुद्ध ते अशुद्ध जानबरन मां, ते शुद्ध ते अशुद्ध च़ुड़ोलन मां फर्क केरथ; ते कोई जानबर या च़ुड़ोलू या कोन्ची किसमेरे धेरती पुड़ रेंगने बालो जीप जन्तू की न भोए, ज़ैना मीं तुश्शे लेई अशुद्ध केरतां मनाह कियोरेन, तैन सेइं अपने आपे अशुद्ध न केरथ। तुस मेरे लेई पवित्र बेनतां रेइयथ; किजोकि अवं यहोवा एप्पु पवित्र आईं, ते मीं तुस होरि मुल्खां केरे लोकन मरां एल्हेरेलेइ अलग कियोरेथ कि तुस लगातार मेरे बनोरे राथ।
“कोई मड़द या कौन्श जैदूगिर या भूतां केरि साधना केरे, त तै पक्को मारो गालो; एरन जो घोड़ेईं दित्तोरी लोड़तिन, तैना अपने मौतरे एप्पु ज़िमेवार भोल्हे।”
Source notes (1)
- Footnote दुद्ध ते मैछ़ेरी गड्डां फलदार ज़मीन
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.