Bhadrawahi Bible
लैव्यव्यवस्था 15
जिसमे मरां बगने बाली अशुद्ध धात
फिरी यहोवाए मूसे ते हारूने सेइं ज़ोवं, “इस्राएलन सेइं इन ज़ोथ कि ज़ैस-ज़ैस मड़दे धात भोए, त तै धातरे वजाई सेइं अशुद्ध ठहरे। तै चाहे बगती राए, चाहे बगनी बन्द भी भोए, फिरी भी तैसेरी अशुद्धता तेरही रहेली। ज़ैस धात भोए तै ज़ैस-ज़ैस बिछ़ाने पुड़ लेटे तैन अशुद्ध भोल्हु, ते ज़ैस-ज़ैस चीज़ी पुड़ तै बिश्शे तै भी अशुद्ध राहेली। ते ज़ै कोई तैसेरे बिछ़ाने सेइं हुरे तै अपने लिगड़न धोइतां पैनी सेइं निहान दे, ते तै ड्लवझ़ी तगर अशुद्ध रालो। ते ज़ैस धात भोए ते तै ज़ैस चीज़ी पुड़ बिश्शे, तैस पुड़ ज़ै कोई बिश्शे तै अपने लिगड़न धोइतां पैनी सेइं निहान दे, ते ड्लवझ़ी तगर अशुद्ध रालो। ते ज़ैस धात भोए तैस सेइं ज़ै कोई हुरे तै अपने लिगड़न धोइतां पैनी सेइं निहान दे ते फिरी भी तै ड्लवझ़ी तगर अशुद्ध ठहरे। ते ज़ैस धात भोए अगर तै कोन्ची शुद्ध मैन्हु पुड़ थुक्के, त तै अपने लिगड़न धोइतां पैनी सेइं निहान दे, फिरी भी तै ड्लवझ़ी तगर अशुद्ध रालो। ते ज़ैस धात भोए तै ज़ैस कैठी पुड़ सुवारी केरे तै अशुद्ध भोल्ही। ते ज़ै कोई कोन्ची चीज़ी ज़ै तैस हैठ भोए हुरे, तै ड्लवझ़ी तगर अशुद्ध रालो; ते ज़ै कोई एरी कोन्ची चीज़ी छ़ूए तै अपने लिगड़न धोइतां पैनी सेइं निहान दे, ते ड्लवझ़ी तगर अशुद्ध रालो। ते ज़ैस धात भोए तै ज़ैस कोन्ची सेइं बगैर हथ धोए हुरे तै अपने लिगड़न धोइतां पैनी सेइं निहान दे, ते ड्लवझ़ी तगर अशुद्ध रालो। ते ज़ैस धात भोए तै मित्तरे ज़ैस कोन्ची भांडे सेइं हुरे तैन ट्लोड़ू गाए, ते लेकड़रे हर किसमेरां भांडां पैनी सेइं धोआं गान।
“फिरी ज़ैस धात भोए तै ज़ैखन अपने रोगे करां ठीक भोइ गाए, तैखन करां शुद्ध ठहरानेरे सत दिहाड़े गने, ते तैन केरे बीतने पुड़ अपने लिगड़न धोइतां बगते पैनी सेइं निहान दे; तैखन तै शुद्ध ठहरे। ते अठोवं दिहाड़े तै दूई घुग्गू या कबूतरेरे दूई बच्चे नेइतां मिलापे बाले तेम्बेरे दारे पुड़ यहोवारे सामने गेइतां तैन्न याजके दे। तैखन याजक तैन मरां एक्की पापबलि; ते होरि होमबेलरे लेई बलि च़ाढ़े; ते याजक तैसेरेलेइ तैसेरे धातरे वजाई सेइं यहोवारे सामने प्रायश्चित केरे।
“फिरी अगर कोन्ची मड़देरी धात बगती भोए, त तै अपने सैरी जानी पैनी सेइं धोए, ते ड्लवझ़ी तगर अशुद्ध रालो। ते ज़ैस कोन्ची लिगड़े या चमड़े पुड़ तै धात पे तै चीज़ पैनी सेइं धोई गाए, ते ड्लवझ़ी तगर अशुद्ध रालो। ते ज़ैखन कोई मड़द कौन्शी सेइं हमबिसतरी केरे त तैना दूईये पैनी सेइं निहान देन, ते ड्लवझ़ी तगर अशुद्ध रान।
“फिरी ज़ैखन कोई कौन्श मासिक धर्मे मां भोए, त तै सत दिहाड़न तगर अशुद्ध राहेली, ते ज़ै कोई तैस सेइं हुरे तै ड्लवझ़ी तगर अशुद्ध ठहरे।
“ते ज़ांतगर तै अशुद्ध राए तांतगर ज़ैस-ज़ैस चीज़ी पुड़ तै लेटे, ते ज़ैस-ज़ैस चीज़ी पुड़ तै बिश्शे तैना सब अशुद्ध भोल्ही। ते ज़ै कोई तैसेरे बिछ़ाने सेइं हुरे तै अपने लिगड़न धोइतां पैनी सेइं निहान दे, ते ड्लवझ़ी तगर अशुद्ध रालो। ते ज़ै कोई कोन्ची चीज़ी सेइं हुरे ज़ैस पुड़ तै बिशोरी भोए तै अपने लिगड़न धोइतां पैनी सेइं निहान दे, ते ड्लवझ़ी तगर अशुद्ध रालो। ते अगर बिछ़ाने या होरि कोन्ची चीज़ी पुड़ ज़ैस पुड़ तै बिशोरी भोए हुरनेरे वक्ते तैसेरो खून लग्गोरो भोए, त हुरने बालो ड्लवझ़ी तगर अशुद्ध रालो। ते ज़ै कोई मड़द तैस सेइं हमबिसतरी केरे, ते तैसेरो खून तैस सेइं लग्गे, त तै मड़द सत दिहाड़न तगर अशुद्ध रालो, ते ज़ैस-ज़ैस बिछ़ाने पुड़ तै झ़ुल्ले तैन सब अशुद्ध भोल्हु।
“फिरी अगर कोन्ची कौन्शरो अपने मासिक धर्मेरे पूरे वक्ते करां जादे दिहाड़न तगर खून बगतो राए, या तै ठहरावरे वक्ते करां जादे वक्ते तगर मासिक धर्मे मां राए, त ज़ांतगर तै एरी हालती मां राए तांतगर तै अशुद्ध भोल्ही। तैसेरे मासिक धर्मेरे सब दिहाड़न मां ज़ैस-ज़ैस बिछ़ाने पुड़ तै लेटे तैन सब तैसेरे मासिक धर्मेरे बिछ़ानेरू ज़ेरू भोल्हु; ते ज़ैस-ज़ैस चीज़ी पुड़ तै बिश्शे तैन भी तैसेरे मासिक धर्मे मां रानेरे दिहाड़ना केरू ज़ेरू अशुद्ध रालू। ते ज़ै कोई तैन चीज़न सेइं हुरे तै अशुद्ध ठहरे, एल्हेरेलेइ तै अपने लिगड़न धोइतां पैनी सेइं निहान दे, ते ड्लवझ़ी तगर अशुद्ध रालो। ते ज़ैखन तै कौन्श अपने मासिक धर्मे करां शुद्ध भोइ गाए, तैखन करां तै सत दिहाड़े गने, ते तैना दिहाड़े बीतने पुड़ तै शुद्ध भोल्ही। फिरी अठोवं दिहाड़े तै दूई घुग्गू या कबूतरेरे दूई बच्चे नेइतां मिलापे बाले तेम्बेरे दारे पुड़ याजके कां गाए। तैखन याजक एक्की पापबलि ते होरि होमबेलरे लेई च़ाढ़े; ते याजक तैसेरे लेई तैसेरे मासिक धर्मेरी अशुद्ध भोनेरे लेई यहोवारे सामने प्रायश्चित केरे।
“एन्च़रां सेइं तुसां इस्राएली लोकन तैन केरि अशुद्धता करां अलग रखा, कोन्च एरू न भोए कि तैना यहोवारे रानेरी ठारी ज़ै तैन केरे दरमियाने मांए अशुद्ध केरतां अपनि अशुद्धता मां फेसतां मेरि गान।”
ज़ैस धात भोए ते ज़ै मड़द धात बगने सेइं अशुद्ध ठहरे; ते ज़ैस कौन्शी मासिक धर्मे भोए; ते कुन मड़द कुन कौन्शां, ज़ैस केन्चेरे धातरी बिमारी भोए, ते ज़ै मड़द अशुद्ध कौन्शी सेइं हमबिसतरी केरे, इन सेब्भी केरे लेई ईए कानूने।
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.