Bhadrawahi Bible
लैव्यव्यवस्था 14
चेमड़रे रोगे करां शुच्चे भोनेरो कानून
फिरी यहोवाए मूसे सेइं ज़ोवं, “कोढ़ी मैन्हेरो शुद्ध भोनेरो कानून ईए। तै याजके कां पुज़व गाए; ते याजक डेरन करां बेइर गाए, ते याजक तैस कोढ़ी मैन्हु हेरे, ते अगर तैसेरे कोढ़ेरो रोग ठीक भोइ जेवरो भोए, त याजक हुक्म दे कि शुद्ध भोने बालेरे लेई दूई शुद्ध ते ज़ींतां च़ुड़ोलू, गैइड़ेरी लकड़ी, ते लाल रंगेरो कपड़ो ते जूफा इन सब आनू गाए; ते याजक हुक्म दे कि अक च़ुड़ोलोवं बगते पैनी पुड़ मित्तरे भांडे मां बलि कियूं गाए। तैखन तै ज़ींते च़ुड़ोलोवें गैइड़ेरे लेकड़ी ते लाल रंगेरे लिगड़े ते जूफा इन सेब्भन नेइतां अकोट्ठू तैस च़ुड़ोलोवेरे खूने मां ज़ैन बगते पैनी पुड़ बलि कियोरूए डोबे; ते कोढ़े करां शुद्ध भोवरे मैन्हु पुड़ सत फेरेईं छ़िड़कतां तैस शुद्ध केरे, तैखन तैस ज़ींते च़ुड़ोलोवें मैइदाने मां शारे। ते ज़ै मैन्हु शुद्ध भोवरोए तै अपना लिगड़ां धोए, ते सब बाल कट्टेइतां पैनी सेइं निहान दे, तैखन तै शुद्ध ठहरे; ते तैसेरे बाद तै डेरन मां एज्जी सकते, पन सत दिहाड़न तगर अपने डेरे करां बेइरे राए। ते सत्तोवं दिहाड़े तै क्रोड़ी, दाढ़ी ते ढ्लवां केरे सब बाल कट्टाए, ते अपने सारे बाल कटाए, ते अपने लिगड़न धोए, ते पैनी सेइं निहान दे, तैखन तै शुद्ध ठहरे।
“अठोवं दिहाड़े तै दूई बगैर नुक्से गबड़ां, ते एक्की सालेरी बगैर नुक्से गबड़ी, ते अन्नेरी बेलरे लेई तेले सेइं सन्नोरे एपारू ट्लाई दहाई अंश अट्टू1, ते लोज भेरतां तेल आने। ते शुद्ध केरनेबालो याजक इन चीज़न सने तैस शुद्ध भोनेबाले मैन्हु यहोवारे सामने मिलापे बाले तेम्बेरे दारे पुड़ खड़ो केरे। तैखन याजक अक गबड़ू नेइतां दोषबेलरे लेई तैस ते तैस लोज भेरतां तेले नेड़े आने, ते इन दूईयन हिलानेरी च़ढ़तलरे लेई यहोवारे सामने हिलाए; ते तै तैस गबड़े तैस ठारी मां ज़ैड़ी तै पापबलि ते होमबेलरे जानबर बलि केरेलो, मतलब पवित्र ठारी मां बलिदान केरे; किजोकि ज़ेन्च़रे पापबलि याजकेरो अपनो हिस्सो भोल्हो तेन्च़रे दोषबलि भी तैसेरो अपनो हिस्सो ठहरे; तै परमपवित्रे। तैखन याजक दोषबेलरे खूने मरां किछ नेइतां शुद्ध भोने बालेरे देइने कन्नेरे बेइयें पासे, ते तैसेरे देइने हथ्थे ते देइने पव्वेरे नोठन पुड़ लाए। तैखन याजक तैस लोज भेरतां तेले मरां किछ नेइतां अपने बांए हथ्थेरे तेई पुड़ छ़डे, ते याजक अपने देइने हथ्थेरे एंगलोई अपनि बाईं तेई पुड़ीएं तेले मां डुबेइतां तैस तेले मरां किछ अपने एंगलोई सेइं यहोवारे सामने सत फेरेईं छ़िड़के। ते ज़ै तेल तैसेरी तेई पुड़ रेही गालो याजक तैस मरां किछ शुद्ध भोने बालेरे देइने कन्नेरे बेइयें पासे, ते तैसेरे देइने हथ्थे ते देइने पव्वेरे नोठन पुड़ दोषबेलरे खूने पुड़ लाए; ते ज़ै तेल याजकेरे तेई पुड़ रेही गाए तैस तै शुद्ध भोने बालेरे दोग्गे पुड़ लाए। ते याजक तैसेरे लेई यहोवारे सामने प्रायश्चित केरे। याजक पापबलि भी च़ैढ़तां तैसेरेलेइ ज़ै अपनि अशुद्धता मरां शुद्ध भोनेबालो भोए प्रायश्चित केरे; ते तैसेरे बाद होमबेलरे जानबरेरू बलिदान केरतां, अन्नेरी बेलि सने वेदी पुड़ च़ाढ़े: ते याजक तैसेरे लेई प्रायश्चित केरे, ते तै शुद्ध ठहरे।
“पन अगर कोई गरीब भोए ते एत्रे आन्नेरे लेई तैस कां रकम न भोए, त तै अपने प्रायश्चित करावानेरे लेई, हिलानेरे लेई गबड़ू दोषबेलरे लेई, ते तेले सेइं2 सन्नोरो एपारो दशोवं हिस्सो अंश मैदो अन्नेरी बलि केरतां, ते लोज भेरतां तेल आने; ते दूई घुग्गू, या कबूतरेरे दूई बच्चे आने, ज़ै तै ऐनी सके; ते इन मरां अक त पापबेलरे लेई ते होरू होमबेलरे लेई भोए। ते शुद्ध भोनेरे रसमरे अठोवं दिहाड़े तै इन सेब्भन अपने शुद्ध ठहरानेरे लेई मिलापे बाले तेम्बेरे दारे पुड़, यहोवारे सामने, याजके कां आने; तैखन याजक तैस लोज भेरतां तेल ते दोषेरे बेलरे गबड़े नेइतां हिलानेरी च़ढ़तलरे लेई यहोवारे सामने हिलाए। फिरी दोषबेलरे गबड़े बलिदान केरे; ते याजक तैसेरे खूने मरां किछ नेइतां शुद्ध भोने बालेरे देइने कन्नेरे बेइयें पासे, ते तैसेरे देइने हथ्थे ते देइने पव्वेरे नोठन पुड़ लाए। फिरी याजक तैस तेले मरां किछ अपने बांए हथ्थेरे तेई पुड़ छ़ेडतां, अपने देइने हथ्थेरी एंगलोई मरां अपनि बाईं तेई पुड़ेरे तेले मरां किछ यहोवारे सामने सत फेरेईं छ़िड़के; फिरी याजक अपनि तेई पुड़ेरे तेले मरां किछ शुद्ध भोने बालेरे देइने कन्नेरे बेइयें पासे, ते तैसेरे देइने हथ्थे ते देइने पव्वेरे नोठन पुड़ दोषबेलरे खूनेरे ठारी पुड़ लाए। ते ज़ै तेल याजकेरे तेई पुड़ रेही गाए तैस तै शुद्ध भोने बालेरे लेई यहोवारे सामने प्रायश्चित केरनेरे लेई तैसेरे दोग्गे पुड़ छ़डे। तैखन तै घुग्गू या कबूतरेरे बच्चन मरां ज़ैना तै एन्हीं सके एक्की च़ाढ़े, मतलब ज़ैन च़ुड़ोलोवं तै ऐनी सकतो भोए, तैन मरां तै एक्की पापबेलरे लेई ते अन्नेरी बेलि सने होरि होमबेलरे लेई च़ाढ़े; इस तरीके सेइं याजक शुद्ध भोने बालेरे लेई यहोवारे सामने प्रायश्चित केरे। ज़ैस कोढ़ेरो रोग लग्गोरो भोए, ते तैस कां एत्री रकम न भोए कि तै शुद्ध भोनेरे लेई सामने ऐनी सके, त तैसेरेलेइ ईए कानूने।”
घरे मां लगोरीए फफूंदरे लेई कानून
फिरी यहोवाए मूसे ते हारूने सेइं ज़ोवं, “ज़ैखन तुस लोक कनान मुल्खे मां पुज़थ, ज़ैस अवं तुसन अपनि ज़मीन भोनेरे लेई तुसन देताईं, तैस वक्ते अगर अवं कोढ़ेरो रोग तुश्शे अधिकारेरे कोन्ची घरे मां हेरेईं, त ज़ेसेरू तैन घर भोए तै एइतां याजके ज़ोए कि मीं एरू लेइहोते कि घरे मां एरहो ज़ेरो कोई रोग आहे। तैखन याजक हुक्म दे कि तैस घरे मां रोग हेरनेरे लेई मेरे गाने करां पेइले तैस खाली केरा, कोन्च एरू न भोए कि ज़ैन किछ घरे मां भोए तैन सब अशुद्ध ठहरे; ते इसेरे बाद याजक घर हेरनेरे लेई नेड़े गाए। तैखन तै तैस रोगे हेरे; ते अगर तै रोग घरेरे दिवारन पुड़ नीलो-नीलो या लाल-लाल घेड़ोरि लकीरां केरि ज़ेरि शक्ली मां भोए, ते इना लकीरां दिवारी मां डुग्घी लेइहोन, त याजक घरे मरां बेइर दारे पुड़ गेइतां घरे सत दिहाड़न तगर बन्द केरतां रख्खे। ते सत्तोवं दिहाड़े याजक एइतां हेरे; ते अगर तै रोग घरेरे दिवारन पुड़ फैलोरो भोए, त याजक हुक्म दे कि ज़ैन घोड़न रोगे तैन केढतां नगरे करां बेइर कोन्ची अशुद्ध ठारी मां शारन; ते तै अन्तरे अन्तर च़ेवरे पासे घेड़तां, ते तैस कंथरी मित्ती नगरे करां बेइर कोन्ची अशुद्ध ठारी मां छ़डी गाए; ते तैन घोड़ां केरे ठारी मां ते होरे घोड़न नेइतां लान ते याजक नंव्वो गारो नेइतां घरेरे दिवारन लाए।
“अगर घोड़ां केरे कढने ते घरेरे कंथां केरि मित्ती कढे ते गारो लानेरां बाद तै रोग घरे मां निस्से, त याजक एइतां हेरे; ते अगर तै रोग घरे मां फैलोरो भोए, त तै समझ़े कि घरे मां गालने बालू कोढ़े; तैन अशुद्धे। ते तै सब गारे सने घोड़, लकड़ी ते घरे घड़ेइतां डोलहे; ते तैन सेब्भी चीज़न सलहेइतां नगरे करां बेइर कोन्ची अशुद्ध ठारी पुड़ शाराए। ते ज़ांतगर तैन घर बन्द राए तांतगर कोई तैस मां गाए त तै ड्लवझ़ी तगर अशुद्ध रालो; ते ज़ै कोई तैस घरे मां झ़ुल्ले तै अपने लिगड़न धोए; ते ज़ै कोई तैस घरे मां रोट्टी खाए तै भी अपने लिगड़न धोए।
“पन अगर याजक एइतां हेरे कि ज़ैखन करां घरेरो गारो लेवरोए तैखन करां तैस मां रोग नईं फैलोरो, त इन ज़ैनतां कि तै रोग दूर भोइ जेवरोए, घर शुद्ध भोइ जेवरूए। ते तैस घरे पवित्र केरनेरे लेई दूई च़ुड़ोलू, गैइड़ेरी लकड़ी, लाल रंगेरो कपड़ो ते जूफा आने, ते अक च़ुड़ोलोवं बगते पैनी पुड़ मित्तरे भांडे मां बलि केरतां, तैखन तै गैइड़ेरी लकड़ी, लाल रंगेरे लिगड़े ते जूफा ते ज़ींतां च़ुड़ोलू इन सेब्भन नेइतां बलि कियोरे च़ुड़ोलोवेरे खूने मां ते बगते पैनी मां डोबे, ते तैस घरे पुड़ सत फेरेईं छ़िड़के। एन्च़रां तै च़ुड़ोलवेरो खून, ते बगते पैनी, ते ज़ींतां च़ुड़ोलू, ते गैइड़ेरी लकड़ी, ते जूफा ते लाल रंगेरां लिगड़ां केरे ज़िरिये पवित्र केरे; तैखन तै ज़ींते च़ुड़ोलोवें नगरे करां बेइर मैइदाने मां शारे; एन्च़रे सेइं तै घरेरे लेई प्रायश्चित केरे, तैखन तैन शुद्ध भोल्हु।”
सब किसमेरे कोढ़ेरे रोग, ते दाग, ते लिगड़ां, ते घरेरू कोढ़, ते शोजश, ते पपड़ी, ते दागेरे बारे मां, शुद्ध ते अशुद्ध भोनेरी शिक्षा देनेरो कानून इना आन। हर किसमेरे कोढ़ेरे रोगेरो कानून ईए आहे।
Source notes (2)
- Footnote 334 ग्राम ज़ैतूनेरो तेल ते 3 किल्लो अट्टू
- Footnote 334 ग्राम ज़ैतूनेरो तेल ते 3 किल्लो अट्टू
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.