Bhadrawahi Bible
न्यायी 20
इस्राएली लोकां केरे ज़िरिये जंगरी तियारी
तैखन दान नगरे करां लेइतां बेर्शेबा नगरे तगर सारे इस्राएली ते गिलाद प्रदेशेरे लोक भी निस्से, ते तैन केरि मण्डली अक भोइतां मिस्पा नगरे मां यहोवा कां अकोट्ठी भोइ। ते इस्राएली लोकां केरे प्रधान, बल्के सारे इस्राएली गोट्लां केरे लोक ज़ैना च़ेवर लख तलवार च़लनेबाले सिपाही थिये, परमेशरेरे लोकां केरे सामने हाज़र भोए। (बिन्यामीनी लोकेईं त शुनू कि इस्राएली मिस्पा नगरे जो एवरेन।) ते इस्राएली लोक पुछ़ने लगे, “असन सेइं ज़ोथ, ई बुराई केन्च़रे भोइ?” तैस मैरोरी कौन्शरे लेवी मुन्शे जुवाब दित्तो, “अवं अपनि रखैली सेइं साथी बिन्यामीनेरे गिबा नगरे मां रानेरे लेई जेवरो थियो। तैखन गिबा नगरेरे मड़देइं मीं पुड़ हमलो कियो, ते रातरे मौके घर घेरतां मीं सेइं कुकर्म केरतां मीं मारने चाते थिये; पन मेरी रखैली सेइं एत्रो कुकर्म कियो कि तै मेरि जेई। मीं अपनि रखैल घरे नेइतां तैसारे टुक्ड़े-टुक्ड़े किये, ते इस्राएली लोकां केरे हिस्से केरे सारे मुल्खे मां भेज़े, तैनेईं त इस्राएले मां महापाप ते बेवकूफरू कम कियोरूए। हुनी शुना, हे इस्राएली लोकव, सारे शुना, ते इड़ी अपनि राई देथ।”
तैखन सारे लोक अक मन भोइतां, उठतां ज़ोने लगे, “न त असन मरां कोई अपने डेरे जो गालो, ते न कोई अपने घरेरे पासे मुड़ेलो। पन हुनी अस गिबा नगरेरे लोकन सेइं एरू केरमेले कि चिट्ठी छ़ेडी-छ़ेडी तैस नगरेरे लोकन पुड़ हमलो केरमेले, ते अस सारे इस्राएली गोट्लन मरां शौव मड़दन मरां दश, ते हज़ार मड़दन मरां अक शौव, ते दश हज़ारन मरां अक हज़ार मड़द रखम, कि तैना सेनारे खानेरी लेई चीज़ां पुज़ान; एल्हेरेलेइ कि अस बिन्यामीनेरे गेबा नगरे मां पुज़तां तैस, तैस बेवकूफेरो पूरो फल भुगतेई सकम ज़ै तैनेईं इस्राएले मां कियोरीए।” तैखन सारे इस्राएली मड़द तैस नगरेरे खलाफ अक भोइतां अकोट्ठे भोए।
ते इस्राएली गोट्लेरे लोकेईं बिन्यामीनेरे सारे गोट्लेरे लोकन मरां किछ मैन्हु एन पुछ़ने भेज़े, “ई कुन बुराई आहे ज़ै तुसन लोकन मां कियोरीए? हुनी तैना गिबारे रानेबाले लुच्चन इश्शे हथ्थे मां केरा, कि अस तैन जाना मैरतां इस्राएले मरां बुराई मुकाम।” पन बिन्यामीनी लोकेईं अपने ढ्ला इस्राएली लोकां केरि मन्ने करां इन्कार कियो। ते बिन्यामीनी अपने-अपने नगरे मरां एइतां गिबा नगरे मां एल्हेरेलेइ अकोट्ठे भोए, कि इस्राएली लोकन सेइं लड़नेरे लेई निस्से। ते तैस्से दिहाड़े गिबा नगरेरे रानेबाले मड़दां केरे अलावा, ज़ैन केरि गिनती 700 च़ुनोरे सिपाही भोइ, ते नगरन मरां एवरे तलवार च़लनेबाले बिन्यामीनी लोकां केरि गिनती शेब्बी हज़ार सिपाही भोइ। इन सब सिपेहिन मरां 700 बांए हथ्थेबाले च़ुनोरे सिपाही थिये, ज़ैना सारे एरे थिये कि छ़िंगलोटे सेइं घोड़ेरो निशानो लाने मां माहिर थिये। ते बिन्यामीनी लोकां केरे अलावा इस्राएली मड़द च़ेल्ही हज़ार तलवार च़लनेबाले थिये; इना सारे लड़नेबाले थिये। सारे इस्राएली उठतां बेतेल नगरे जो जे, ते एन ज़ोइतां परमेशर करां सलाह नी, ते इस्राएली लोकेईं पुछ़ू, “असन मरां कौ गोट्ल बिन्यामीनी लोकन सेइं लड़नेरे लेई पेइलो हमलो केरेलो?” यहोवा ज़ोवं, “यहूदा पेइलो हमलो केरे।” तैखन इस्राएली लोकेईं होरसां झ़ेझ़ां उठतां गिबा नगरेरे सामने डेरे लाए। ते इस्राएली सिपाही बिन्यामीनी सिपेहिन सेइं लड़ने जो निस्से; ते लड़नेरे लेई गिबा नगरेरे खलाफ मोरच़ो लाव। पन बिन्यामीनी सिपैहेईं गिबा नगरे मरां निस्तां तैस दिहाड़े बाई हज़ार इस्राएली सिपाही मैरतां मित्ती मां मिलेई छ़डे। फिरी भी इस्राएली मड़देई हिम्मत रेखतां तैस्से ठारी मां ज़ैड़ी तैनेईं पेइले दिहाड़े मोरच़ो लेवरो थियो, फिरी मोरच़ो लाव ते इस्राएली लोक गेइतां ड्लोझां तगर यहोवारे सामने लेरां देते राए; ते एन ज़ोइतां यहोवा करां पुछ़ू, “कुन अस अपने ढ्ला बिन्यामीनी लोकन सेइं लड़ने जो फिरी नेड़े गाम?” यहोवा जुवाब दित्तो, “हाँ, तैन पुड़ हमलो केरा!”
फिरी होरसां इस्राएली लोक बिन्यामीनी लोकां केरे नेड़े पुज़्ज़े। तैखन बिन्यामीनी लोकेईं तैस दिहाड़े तैन केरो सामनो केरने जो गिबा नगरे मरां निस्तां फिरी अठारे हज़ार इस्राएली सिपाही मैरतां छ़ड्डे, ज़ैना सारे तलवार च़लनेबालो थिये, मित्ती मां मिलेई दित्ते। ज़ैना इस्राएली सिपाही बच़ोरे थिये तैना बेतेल नगरे जो जे; ते लेरां देंते यहोवारे सामने बिश्शी जे, ते तैस दिहाड़े ड्लोझां तगर बरत रख्खू, ते यहोवा जो होमबलि ते मेलबलि च़ाढ़ी। ते इस्राएली लोकेईं यहोवा करां सलाह नी (तैस मौके परमेशरेरे करारेरो सन्दूख बेतेल नगरे मां थियो, ते पीनहास, ज़ैन हारूनेरू पोट्लड़ू, ते एलीआजरेरू मट्ठू थियूं तैन दिहाड़न मां तैसेरे सामने हाज़र रहतो थियो।) तैनेईं पुछ़ू, “कुन अस एक्की बार फिरी अपने ढ्लान बिन्यामीनी लोकन सेइं लड़ने जो निस्सम, या तैन छ़ेडी देम?” यहोवा ज़ोवं, “हमलो केर; किजोकि कालां अवं तैन तेरे हथ्थे मां केरि देइलो।” तैखन इस्राएली लोकेईं गिबारे च़ेवरे पासे लोक छ़ेपतां बिशाले।
ट्लेइयोवं फेरे इस्राएली सिपैहेईं बिन्यामीनी लोकन पुड़ हमलो कियो, ते पेइलेरे ज़ेरे गिबारे खलाफ मोरच़ो लाव। तैखन बिन्यामीनी तैन लोकां केरो मुकाबलो केरने जो नगरे मरां निस्से, ते इस्राएली तैन्न नगरे करां दूर घिन्नी जे; ते ज़ैना दूई सड़कां, अक बेतेल नगरे जो ते होरि गिबा नगरे जो गातीए, तैन मां लोक पेइलेरे ज़ेरे मारने लगे, ते मैइदाने मां कोई 30 इस्राएली मारे जे। बिन्यामीनी एक्की होरि सेइं ज़ोने लगे, “तैना पेइलेरे ज़ेरे असन करां मारे गातन।” पन इस्राएली लोकेईं ज़ोवं, “अस नेशतां तैन नगरे मरां सड़कन मां खिचतां आनम।” तैखन सारे इस्राएली सिपैहेईं अपने ठारी पुड़ेरां उठतां बालतामार नगरे मां मोरच़ो लेइतां; ते छ़ेपतां बिश्शोरे इस्राएली सिपाही अपनि ठारी पुड़ेरां, मतलब मारेगेवा मरां अचानक निस्से। तैखन सारे इस्राएली लोकन मरां तैलतां दश हज़ार मड़द गिबा नगरेरे सामने आहे, ते बड़ी लड़ाई भोने लगी; पन बिन्यामीनी लोक न थिये ज़ानते कि असन पुड़ मुसीबत हुन्ना एज्जी जेवरीए। तैखन यहोवाए बिन्यामीनी लोक इस्राएले करां हाराए, ते तैस दिहाड़े इस्राएली लोकेईं पंज्ही हज़ार अक शौव बिन्यामीनी मड़द मारे, ज़ैना सारे तलवार च़लनेबाले थिये। तैखन बिन्यामीनी लोकेईं हेरू कि अस हैरी जेवरेम। ते इस्राएली सिपाही तैन मारने बालां केरो भरोसो केरतां ज़ैना तैनेईं गिबारे नेड़े बिशालोरे थिये बिन्यामीनी लोकां केरे सामनेरां च़ले जे। पन ज़ैना इस्राएली सिपाही छ़ेपतां बिश्शोरे थिये तैनेईं गिबा नगरे पुड़ हमलो कियो; ते तैनेईं नगरेरे सारे लोक तलवारी सेइं मारे। इस्राएली सिपैहेईं ते ज़ैना छ़ेपतां बिश्शोरे थिये तैन केरे मझ़ाटे त ई निशान रख्खो जेवरो थियो, कि तैना नगरे मरां बड़ो बड्डो तूँ एरो खम्भो खड़ो केरम। इस्राएली सिपाही त लड़ैई मरां नशने लगे, ते बिन्यामीनी लोकेईं एन ज़ोइतां कि पक्के तैना पेइली लड़ैई अरे ज़ेरे असन करां हैरी गातन, इस्राएली सिपेहिन मारने लगे, ते 30 सिपाही मैरी छ़डे। पन ज़ैखन तै तूँ एरो खम्भो नगरे मरां खड़ो भोने लगो, तैखन बिन्यामीनी लोकेईं अपने पत्रोवं तक्कू ते कुन हेरू, कि सारू नगर फुकोने लगोरूए। तैखन इस्राएली सिपाही बिन्यामीनी सिपेहिन पुड़ हमलो केरनेरे लेई मुड़े, ते बिन्यामीनी सिपाही एन हेरतां घेमरोई जे, कि असन पुड़ आफत अई। एल्हेरेलेइ तैनेईं इस्राएली सिपेहिन पिठ हिरेइतां सुनसान ठैरारे पासे नशने लगे; पन लड़ाई तैन सेइं भोती राई, ते ज़ैना बाकी नगरन मरां एवरे थिये तैन्न इस्राएली लोक बत्तन मां मारते जे। फिरी तैनेईं बिन्यामीनी किछ सिपाही घेरी छ़डे, ते बाकी निशाने, तैना मनुहा मां बल्के गिबा नगरेरे पूर्वेरे पासे तगर तैन्न निशानते राए। ते बिन्यामीनी लोकन मरां अठारे हज़ार बहादर सिपाही मारे। तैखन बाकी बिन्यामीनी मुड़तां सुनसान ठैरी मां रिम्मोन नंव्वेरी चट्टानरे पासे नेश्शी जे; पन इस्राएली लोकेईं तैन मरां पंच़ हज़ार च़ुनी-च़ुनी सड़कन मां मैरी छ़डे; फिर गिदोम नगरे तगर तैन पत्ती खेत्तां तैन मरां दूई हज़ार सिपाही मैरी छ़डे। तैखन बिन्यामीनी सिपेहिन मां ज़ैना तैस दिहाड़े मारे जे तैना पंज्ही हज़ार तलवार च़लनेबाले सिपाही थिये, ते इना सब बहादर थिये। पन शा शौव बिन्यामीनी सिपाही घुमतां सुनसान ठैरारे पासे नश्शे, ते रिम्मोन नंव्वेरी चट्टानी मां पुज़्ज़ी जे, ते च़ेवर महीने तैड़ी राए। तैखन इस्राएली सिपैहेईं वापस एइतां बिन्यामीनी सिपेहिन पुड़ हमलो कियो ते नगरन मां कुन मैन्हु, कुन जानबर, ज़ैन किछ मैल्हू, सारे तलवारी सेइं मैरी छ़डे। ते तैस इलाकेरे सारे नगर अग लेइतां फुक्की छ़डे।
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.