Bhadrawahi Bible
न्यायी 12
यिप्तह ते एप्रैम गोट्लेरी लड़ाई
एप्रैम गोट्लेरे लोक अकोट्ठे भोइतां सापोन नगरे मां गेइतां यिप्तह सेइं ज़ोने लगे, “ज़ैखन तू अम्मोनी लोकन सेइं लड़ने जो जेव तैखन तीं अस साथी च़लने जो किजो न कुजाए? एल्हेरेलेइ अस तीं घरे समेत फुकमेले।” यिप्तह तैन सेइं ज़ोवं, “मेरी ते मेरे लोकां केरि अम्मोनी लोकन सेइं बड़ी लड़ाई भोवरी थी; ते ज़ैखन मीं तुसन करां मद्दत मग्गी, तैखन तुसेईं अवं तैन केरे हथ्थे करां न बच़ाव। तैखन एन हेरतां कि तुस मीं न बच़ाथ अवं अपने आपे खतरे मां रेखतां अम्मोनी लोकां केरे खलाफ च़लो, ते यहोवाए तैना मेरे हथ्थे मां किये; फिरी तुस हुनी मीं सेइं लड़ने जो किजो एवरेथ?” तैखन यिप्तह गिलाद प्रदेशेरे सारे सिपाही अकोट्ठे केरतां एप्रैम गोट्लेरे सिपेहिन सेइं लड़ो, एप्रैम ज़ै ज़ोतो थियो, “हे गिलादी लोकव, तुस त एप्रैम ते मनश्शेरे मझ़ाटे रानेबाले एप्रैमी केरे नश्शोरे लोक थिये,” ते गिलादी लोकेईं तैना मारे। ते गिलादी लोकेईं यरदन दरियारू घाट तैन करां पेइलू अपने कब्ज़े मां कियूं। ते ज़ैखन कोई एप्रैमी नश्शोरो मैन्हु ज़ोतो थियो, “मीं पार गाने देथ,” तैखन गिलादेरे लोक तैस पुछ़ते थिये, “कुन तू एप्रैमी आस?” ते अगर तै ज़ोतो थियो, “नईं,” त तैना तैस सेइं ज़ोते थिये, “ठीके, शिब्बोलेत ज़ो,” ते तै ज़ोतो थियो, “सिब्बोलेत,” किजोकि तैस करां तैन रोड़ेच़ारे न थियूं ज़ोवं गातू; तैखन तैना तैस ट्लेइतां यरदनेरे घाटे पुड़ मैरी छ़डते थिये। एन्च़रां सेइं तैस मौके 42000 एप्रैमी मारे जे। यिप्तह शा सालन तगर इस्राएलेरो न्याय केरतो राव। तैखन यिप्तह गिलादी मेरि जेव, ते तै गिलादेरे कोन्ची एक्की नगरे मां दब्बो जेव। यिप्तहेरे मरनेरां बाद बैतलहम नगरेरो रानेबालो इबसान इस्राएलेरो न्याय केरने लगो। ते तैसेरां 30 मट्ठां ते 30 कुइयां भोइ; ते तैनी अपनि 30 कुइयां होरि गोट्लां केरे लोकन जो ड्लेई दित्ती, ते होरि गोट्लां केरे लोकां केरे कुइयन सेइं अपने मट्ठां केरो ड्लाह बनाव। ते तै इस्राएलेरो न्याय सत सालन तगर केरतो राव। तैखन इबसान मेरि जेव, ते तै बैतलहम नगरे मां दब्बो जेव।
इबसानेरे मरनेरां बाद जबूलूनी एलोन इस्राएलेरो न्याय केरने लगो; ते तै इस्राएलेरो न्याय 10 सालन तगर केरतो राव। तैखन एलोन जबूलूनी मेरि जेव, ते तै जबूलूनेरे प्रदेश अय्यालोन नगरे मां दब्बो जेव। एलोनेरे मरनेरां बाद पिरातोन नगरेरो रानेबालो हिल्लेलेरू मट्ठू अब्दोन इस्राएलेरो न्याय केरने लगो। अब्दोने 40 मट्ठां ते 30 पोट्लड़ां भोआं, तैन कां सुवारी केरनेरे लेई 70 गधे थिये। तै अठ सालन तगर इस्राएलेरो न्याय केरतो राव। तैखन पिरातोनी हिल्लेलेरू मट्ठू अब्दोन मेरि जेवं, ते तै एप्रैमेरे पिरातोन नगरे मां दब्बो जेव, ज़ै अमालेकी लोकां केरे पहाड़ी प्रदेशे मांए।
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.