Bhadrawahi Bible
न्यायी 11
यिप्तह
तैस वक्ते यिप्तह नंव्वेरो गिलादी मैन्हु बड़ो बहादर थियो, ते तैन वेश्यारू मट्ठू थियूं; ते तैसेरो बाजी गिलादी थियो। गिलादेरी कौन्शरां भी होरां काई मट्ठां भोआं; ते ज़ैखन तैना बड्डां भोआं तैखन यिप्तह एन ज़ोइतां कढो कि, “तू त वेश्यारू मट्ठू आस; एस वजाई सेइं तीं इश्शे बाजी केरे घरानो मरां कोई हिस्सो न मैल्हेलो।” तैखन यिप्तह अपने ढ्लान करां नेशतां तोब प्रदेशे मां राने लगो; ते यिप्तह कां गुन्डे अकोट्ठे भोइ जे; ते तैना तैस सेइं साथी छापो मारने लगे।
ते किछ दिहाड़ां केरे बाद अम्मोनी लोक इस्राएली लोकन सेइं लड़ने लगे। ज़ैखन अम्मोनी लोक इस्राएली लोकन सेइं लड़ते थिये, तैखन गिलादेरे बुज़ुर्ग लोक यिप्तहे तोब मुल्खे मरां आन्ने जो जे; ते यिप्तह सेइं ज़ोवं, “एई इश्शो सेनापति बन, कि अस अम्मोनी लोकन सेइं लेड़ी सखम।” यिप्तहे गिलादेरे बुज़ुर्ग लोकन सेइं ज़ोवं, “कुन तुसेईं मीं सेइं बैर केरतां मेरे बाजी केरे घरे मरां अवं कढोरो न थियो? फिरी हुनी मुसीबती मां पेइतां मीं कां किजो एवरेथ?” गिलादेरे बुज़ुर्ग लोकेईं यिप्तह सेइं ज़ोवं, “एस वजाई सेइं अस हुनी तेरे पासे एवरेम, कि तू असन सेइं साथी च़ेलतां अम्मोनी लोकन सेइं लड़स; तैखन तू इश्शी तरफां गिलादेरे सारे रानेबालां केरो प्रधान भोल्हो।” यिप्तहे गिलादेरे बुज़ुर्ग लोकन पुछ़ू, “अगर तुस मीं अम्मोनी लोकन सेइं लड़नेरे लेई ज़ोतथ त फिरी मीं मेरे घरे नेथ, ते यहोवा तैन मेरे हथ्थे केरि दे, त कुन अवं तुश्शो प्रधान बनेलो?” गिलादेरे बुज़ुर्ग लोकेईं यिप्तह सेइं ज़ोवं, “अस ज़रूर तेरी एस गल्लरे मुताबिक केरमेले; यहोवा इश्शे ते तेरे दरमियाने मां एन गल्लन शुन्ने बालोए।” तैखन यिप्तह गिलाद प्रदेशेरे बुज़ुर्ग लोकन सेइं साथी च़लो, ते लोकेईं तै अपनो मुखिया ते प्रधान बनाव; ते यिप्तह एपनी सैरी गल्लां मिस्पा नगरे मां यहोवारे सामने शुनाई।
तैखन यिप्तह अम्मोनी लोकां केरे राज़े कां दूत इन ज़ोने भेज़े, “तीं मीं सेइं कुन कम्मे, कि तू मेरे मुल्खे मां लड़ने एवरोस?” अम्मोनी लोकां केरे राज़े यिप्तहेरे दूतन सेइं ज़ोवं, “वजा ई आहे, कि ज़ैखन इस्राएली लोक मिस्र मुल्खे मरां आए, तैखन अर्नोन दरियाए करां यब्बोक दरियाए ते यरदन दरियाए तगर ज़ै मेरो मुल्ख थियो तै तैनेईं थसोड़ो; एल्हेरेलेइ हुनी तैन लड़ाई केरने बगैर वापस भेज़।” तैखन यिप्तह फिरी अम्मोनी लोकां केरे राज़े कां एन ज़ोने जो दूत भेज़े, “यिप्तह तींजो ई बिस्तार भेज़ोरोए, कि इस्राएले न त मोआबेरो मुल्ख नियोरोए ते न अम्मोनी लोकां केरो मुल्ख नियोरोए, बल्के ज़ैखन तैना मिस्र मुल्खे मरां निस्से, ते इस्राएली सुनसान ठैरी मांमेइं भोते लाल समुन्दर तगर च़ले, ते कादेश नगरे जो आए, तैखन इस्राएली लोकेईं एदोम प्रदेशेरे राज़े कां दूतां केरे ज़िरिये बिस्तार भेज़ो, ‘असन तेरे मुल्खे मांमेइं भोइतां गाने दे;’ ते एदोमेरे राज़े तैन केरि न मन्नी। एन्च़रां सेइं तैनी मोआबेरे राज़े जो भी बिस्तार भेज़ो, ते तैनी भी तैन केरि बिनती न शुनी। एल्हेरेलेइ इस्राएली लोक कादेश1 नगरे मां रेइजे। तैखन तैनेईं सुनसान ठैरी मां च़लते-च़लते एदोम ते मोआब दूईये मुल्खां केरे बेइर-बेइर गेइतां मोआब मुल्खेरे पूर्वेरे पासेरां एइतां अर्नोन दरियारे इस पासे अपने डेरे लाए; ते मोआबेरे बन्नेरे नेड़े न जे, किजोकि मोआबेरी हद अर्नोन थी। फिरी इस्राएली लोकेईं हेशबोन नगरे मां एमोरी लोकां केरे राज़े सीहोने कां दूतां केरे ज़िरिये बिस्तार भेज़ो, ‘असन अपने मुल्खे मांमेइं भोइतां इश्शी ठारी पुड़ जो गाने दे।’ पन सीहोने इस्राएली लोकन पुड़ एत्रो विश्वास न कियो कि तैन्न अपने मुल्खे मांमेइं भोइतां गाने दे; बल्के अपने सारे सिपाही अकोट्ठे केरतां अपने डेरे यहस नगरे मां खड़े केरतां इस्राएली लोकन सेइं लड़ने लगो। ते इस्राएलेरे परमेशर यहोवाए सीहोन राज़ो सारे सेनाई समेत इस्राएलेरे हथ्थे मां केरि दित्तो, ते तैनेईं तैना मैरी छ़डे; एल्हेरेलेइ इस्राएल तैस मुल्खेरे रानेबाले एमोरी लोकां केरे सारे मुल्खेरो बारस भोइ जेव। एन्च़रे सेइं इस्राएली लोक अर्नोन दरियाए करां यब्बोक दरिया तगर ते सुनसान ठैरी करां लेइतां यरदन दरियाए तगर एमोरी लोकां केरे सारे मुल्खेरे बारस भोइ जे। एल्हेरेलेइ हुनी इस्राएलेरे परमेशर यहोवाए अपने इस्राएली केरे सामने एमोरी लोक तैन केरे मुल्खे मरां कढोरेन; फिरी कुन तू तैसेरो मालिक भोल्हो? ज़ै ज़मीन तुश्शो देबतो कमोश तुसन देते, कुन तैसेरो अधिकार तैस ज़मीनी पुड़ नईं? एन्च़रां सेइं ज़ैन लोकन इश्शो परमेशर यहोवा इश्शे सामनेरां कढे, तैन केरे मुल्खेरे मालिक अस भोल्हे। फिरी कुन तू मोआबेरे राज़े सिप्पोरेरे मट्ठे बालाके करां किछ रोड़ोस? तैनी कधी इस्राएली लोकन सेइं लड़ाई केरनेरी हिम्मत न की! कुन तै इस्राएली लोकन सेइं कधी लड़ो? एल्हेरेलेइ इस्राएली लोक हेशबोन ते तैसेरे ड्लाव्वन मां, ते अरोएर ते तैसेरे ड्लाव्वन मां, ते अर्नोनेरे बन्ने सारे नगरन मां 300 सालां केरे देंते बस्सोरेन, ते एत्रे दिहाड़न मां तुसेईं लोकेईं तै किजो न छुटाव? असेईं तेरे खलाफ पाप नईं कियोरो; तूए मीं सेइं जंग लेड़तां बुरो बर्ताव केरतस; एल्हेरेलेइ यहोवा ज़ै न्याय केरनेबालोए, तै इस्राएली ते अम्मोनी लोकां केरे दरमियान अज़ न्याय केरे।” फिरी भी अम्मोनी लोकां केरे राज़े यिप्तहेरी एना गल्लां न मेन्नी ज़ैना तैनी बिस्तार देइतां भेज़ोरी थी।
तैखन यहोवारो आत्मा यिप्तह पुड़ अव, ते तै गिलाद ते मनश्शे गोट्लेरे लोकां केरे इलाके मांमेइं भोइतां गिलादेरे मिस्पे नगरे मां अव, ते गिलादेरे मिस्पे करां भोइतां अम्मोनी लोकां केरे पासे च़लो। ते तैड़ी यिप्तह एन ज़ोइतां यहोवारी मिन्नत मन्नी, “अगर तू पक्को अम्मोनी लोकन मेरे हथ्थे मां केरि देस, त ज़ैखन अवं ज़ींत्तां सुखे सेइं अम्मोनी लोकन करां वापस एज्जी तैखन ज़ै कोई मीं सेइं मिलने मेरे घरेरां दारां मरां निस्से तै यहोवारो भोल्हो, ते अवं तैस होमबलि केरतां च़ाढ़ेलो।” तैखन यिप्तह अपनि सेना घिन्तां अम्मोनी लोकन सेइं लड़ने जो तैन केरे पासे जेव; ते यहोवा तैना तैसेरे हथ्थे मां किये। ते तै अरोएर नगरे करां लेइतां मिन्नीत नगरे तगर, ज़ैना 20 नगरां आन, बल्के आबेलकरामीम नगरे तगर ज़ींत्ते-ज़ींत्ते तैन बड़े बेड्डी मारी सेइं मारे जे। ते अम्मोनी इस्राएली लोकन करां हैरी जे। ज़ैखन यिप्तह मिस्पा नगरे मां अपने घरे वापस अव, तैखन तैसेरी कुई डफली बज़ाती ते नच़ती-नच़ती तैस सेइं मिलने जो निस्सी आई; तै तैसेरी अक्के कुई थी; तैसेरे अलावा तैसेरू न त कोई मट्ठू थियूं ते न कोई कुई। ज़ेन्च़रे तैनी अपनि कुई लाही तैनी अपना लिगड़ां दुखेरे मारे छ़िन्दतां ज़ोवं, “ओ, मेरी कुई! तीं मेरू ट्लिग ट्लोड़ू, ते तू भी मेरे दुख देनेबालन मां भोइ जेई; किजोकि मीं यहोवा सेइं वाधो कियोरोए, ते तैस ट्लोड़ी न सेखी।” तैसां कुइयां ज़ोवं, “हे मेरे बाजी, तीं ज़ै वाधो यहोवा सेइं कियोरोए, त ज़ै गल तीं अपने ज़बाना ज़ोवरीए ते तैसेरे मुताबिक मीं सेइं बर्ताव केर, किजोकि यहोवाए तेरे अम्मोनी दुश्मन्न सेइं तेरो बदलो नियोरोए।” फिरी तैसां अपने बाजी सेइं इन भी ज़ोवं, “मेरे लेई एन कियूं गाए, कि दूई महीन्न तगर मीं मौको दे, कि अवं अपने सहेलन सेइं साथी गेइतां पहाड़न पुड़ फिरती अपने कुवारेपन पुड़ लेरां देंती रेईं।” तैसेरे बाजे ज़ोवं, “गा।” तैखन तैनी तैस दूई महीनां केरो वक्त दित्तो; एल्हेरेलेइ तै अपने सहेलन सेइं साथी च़ेलि जेई, ते पहाड़न पुड़ अपने कुवारेपने पुड़ लेरां देंती राई। दूई महीने केरे बीतने पुड़ तै अपने बाजी कां वापस आई, ते तैनी तैसेरे बारे मां अपनि मन्नोरी मिन्नत पूरी की। ते तैस कुइयां ड्लाह न थियो बनेवरो। एल्हेरेलेइ इस्राएली लोकन मां ऐह रीत च़ली, कि इस्राएली कौन्शां हर साल पहाड़न पुड़ यिप्तह गिलादेरे रानेबाले कुइयरे लेई मातम केरती थी।
Source notes (1)
- Footnote कादेश कदेशे जो कदेशबर्ने भी ज़ोतन।
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.