Bhadrawahi Bible
यहोशू 21
लेवी लोकन नगरां दित्तां गानां
तैखन लेवी लोकां केरे बुज़ुर्गां केरे घराना केरे प्रधान्न एलीआजर याजक, ते नूनेरू मट्ठू यहोशू, ते इस्राएलेरे गोट्लां केरे बुज़ुर्गां केरे घराना केरे प्रधान्न कां नेड़े एइतां, कनान मुल्खेरे शीलो नगरे मां ज़ोने लगे, “यहोवाए मूसेरे ज़िरिये असन बस्सनेरे लेई नगर, ते इश्शे जानबरां केरे लेई तैनी नगरां केरि चरागां भी देनेरो हुक्म दित्तोरो थियो।”1 तैखन इस्राएली लोकेईं यहोवारे ज़ोनेरे मुताबिक अपने-अपने हिस्सन मरां लेवी लोकन चरागान समेत किछ नगर दित्ते।
तैखन कहाती लोकां केरे कुलां केरे नंव्वे पुड़ चिट्ठी निस्सी। एल्हेरेलेइ लेवी लोकन मरां हारून याजकेरे खानदाने मरां यहूदा, शिमोन, ते बिन्यामीनेरे गोट्लां केरे हिस्से मरां 13 नगर मैल्हे।
होरे कहाती लोकन एप्रैमेरे गोट्लेरे कुलन, ते दानेरे गोट्ले, ते मनश्शेरे अध्धे गोट्लेरे हिस्सन मां चिट्ठी छ़ेडी-छ़ेडी 10 नगर दित्ते जे।
ते गेर्शोनी लोकन इस्साकारेरे गोट्लेरे कुलन मरां, ते आशेर, ते नप्ताली लोकां केरे गोट्लेरे हिस्सन मरां, ते मनश्शेरे अध्धे गोट्लेरे हिस्सन मरां भी ज़ै बाशान प्रदेशे मां थियो चिट्ठी छ़ेडी-छ़ेडी 13 नगर दित्ते जे। कुलां केरे मुताबिक मरारी लोकन रूबेन, ते गाद, ते जबूलूनेरे गोट्लां केरे हिस्से मरां 12 नगर दित्ते जे।
ज़ै हुक्म यहोवा मूसेरे ज़िरिये दित्तोरो थियो, तैसेरे मुताबिक इस्राएली लोकेईं लेवी लोकन चरागान समेत इना नगर चिट्ठी छ़ेडी-छ़ेडी दित्ते जे। तैनेईं यहूदी लोकां केरे ते शिमोनी लोकां केरे गोट्लां केरे हिस्से मरां इना नगर ज़ैन केरू नवं लिखेरूए दित्ते; इना नगर लेवी गोट्लेरे कहाती कुले मरां हारूनेरी औलादरे लेई थिये; किजोकि पेइली चिट्ठी तैन केरे नंव्वे पुड़ निसोरी थी। मतलब तैनेईं तैन जो यहूदारे पहाड़ी प्रदेशे मां च़ेवरे पासन चरागान समेत किर्यतअर्बा नगर दित्तोरो थियो, ज़ैन अनाकेरे बाजी अर्बारे नंव्वे सेइं ज़ोतन ते हेब्रोन भी ज़ोतन। पन तैस नगरेरे ऊडारां ते तैसेरे ड्लाव्वां तैनेईं यपुन्नेरे मट्ठे कालेबे तैसेरी अपनि ज़मीन केरतां दित्ती।
तैखन तैनेईं हारून याजकेरे खानदाने चरागान समेत खूनी केरे छ़पनेरे नगर हेब्रोन, ते अपने-अपने चरागान समेत लिब्ना, यत्तीर, एश्तमो, होलोन, दबीर, ऐन, युत्ता ते बेतशेमेश दित्ते; एन्च़रां सेइं तैनेईं दूईये गोट्लां केरो हिस्से मरां 9 नगर तैन दित्ते। ते बिन्यामीनेरे गोट्लां केरे हिस्से मरां अपने-अपने चरागान समेत इना 4 नगर दित्ते, मतलब गिबोन, गेबा, अनातोत ते अल्मोन। तैनेईं इना च़ेवर नगर ते च़ेवरे पासां केरां ऊडारां तैन दित्तां। एन्च़रां सेइं हारूनेरे खानदानेरे याजक लोकन 13 नगर ते तैन केरि चरागां मैल्ही।
फिरी होरे कहाती लेवी लोकां केरे कुलेरे हिस्सेरे नगर चिट्ठी छ़ेडी-छ़ेडी एप्रैमेरे गोट्लेरे हिस्से मरां दित्ते। मतलब तैन जो चरागान समेत एप्रैमेरे पहाड़ी मुल्खे मां खूनी केरे छ़पनेरे लेई शेकेम नगर दित्तो, फिरी अपने-अपने चरागान समेत गेजेर, किबसैम, ते बेथोरोन; इना 4 नगर दित्ते जे। ते दानेरे गोट्लां केरे हिस्से मरां अपने-अपने चरागान समेत, एलतके, गिब्बतोन, अय्यालोन, ते गत्रिम्मोन; इना 4 नगर दित्ते जे। ते मनश्शेरे अध्धे गोट्लां केरे हिस्से मरां अपने-अपने चरागान समेत तानाक ते गत्रिम्मोन; इना दूई नगर दित्ते जे। एन्च़रां सेइं होरे कहाती लोकां केरे कुलां केरे सारे नगर ते चरागान समेत 10 भोए।
फिरी लेवी लोकां केरे कुले मरां गेर्शोनी लोकन मनश्शेरे अध्धे गोट्लेरे हिस्से मरां अपने-अपने चरागान समेत खूनी केरे छ़पनेरे नगर बाशान प्रदेशेरे गोलन ते बेशतरा; इना दूई नगर दित्ते जे। ते इस्साकारेरे गोट्लेरे हिस्से मरां अपने-अपने चरागान समेत किश्योन, दाबरात, यर्मूत, ते एनगन्नीम; इना च़ेवर नगर दित्ते जे। ते आशेरेरे गोट्लेरे हिस्से मरां अपने-अपने चरागान समेत मिशाल, अब्दोन, हेल्कात, ते रहोब; इना च़ेवर नगर दित्ते जे। ते नप्ताली केरे गोट्लेरे हिस्से मरां अपने-अपने चरागान समेत खूनी केरू छ़पनेरे नगर गलील प्रदेशेरे केदेश, फिरी हम्मोतदोर, ते कर्तान; इना ट्लाई नगर दित्ते जे। गेर्शोनी लोकां केरे कुलां केरे मुताबिक तैन केरे सारे नगर ते अपने-अपने चरागान समेत 13 भोए।
फिरी होरे लेवी लोकेईं, मतलब मरारी लोकां केरे गोट्लेरे कुलन जो जबूलूनेरे गोट्लेरे हिस्से मरां अपना-अपना चरागान समेत योकनाम, कर्ता, दिम्ना, ते नहलाल; इना च़ेवर नगर दित्ते जे। ते रूबेनेरे गोट्लेरे हिस्से मरां अपने-अपने चरागान समेत बेसेर, यहस, कदेमोत, ते मेपात; इना च़ेवर नगर दित्ते जे। ते गादेरे गोट्लेरे हिस्से मरां अपने-अपने चरागान समेत खूनी केरू छ़पनेरू नगर गिलादेरो रामोत, फिरी महनैम, हेशबोन, ते याजेर, ज़ैना सारे मिलतां च़ेवर नगर आन दित्ते जे। लेवी लोकां केरे होरे बाकी कुल मतलब मरारी लोकां केरे कुलां केरे मुताबिक तैन केरे सारे नगर इना ठहरे, एन्च़रां सेइं तैन 12 नगर चिट्ठी छ़ेडतां दित्ते जे।
इस्राएली लोकां केरि एपनी ज़मीनरे मझ़ाटे लेवी लोकां केरे सारे नगर ते अपने-अपने चरागान समेत 48 भोए। इन सब नगर अपने-अपने च़ेवरे पासां केरे चरागान सेइं साथी राए; इना सब नगर इस्से हालती मां थिये।
एन्च़रां सेइं यहोवा इस्राएली लोकन तै सारो मुल्ख दित्तो, ज़ै तैनी तैन केरे बुज़ुर्गन सेइं कसम खेइतां देनेरे लेई ज़ोवरू थियूं; ते तैना तैसेरे बारस बेनतां तैस मां बेस्सी जे। ते यहोवा तैन सब गल्लां केरे मुताबिक, ज़ैना तैनी तैन केरे बुज़ुर्गन सेइं कसम खेइतां ज़ोवरी थी, तैन च़ेवरे पासना आराम दित्तो; ते तैन केरे दुश्मन्न मरां कोई भी तैन केरे सामने टिकी न सको; यहोवा तैना सब तैन केरे कब्ज़े मां किये। ज़ेत्री भलियैइयरी गल्लां यहोवा इस्राएली लोकां केरे खानदाने सेइं ज़ोवरी थी, तैन मरां कोई भी गल न राई; सब गल्लां पूरी भोइ।
Source notes (1)
- Cross-reference गिन. 35:1-8.
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.