Bhadrawahi Bible
यहोशू 19
यहूदा सेइं साथी शिमोनेरे कुलेरो हिस्सो
होरी चिट्ठी शिमोनेरे नंव्वे पुड़, मतलब शिमोनी लोकां केरे कुलां केरे मुताबिक तैन केरे गोट्लेरे नव्वें पुड़ निस्सी; ते तैन केरो हिस्सो यहूदी लोकां केरे मझ़ाटे राव; तैन केरे हिस्से मां इना नगरन, बेर्शेबा, शेबा, मोलादा, हसर्शूआल, बाला, एसेम, एलतोलद, बतूल, होर्मा, सिकलग, बेत्मर्काबोत, हसर्शूसा, बेतलबाओत, ते शारूहेन; इना 13 नगर ते तैन केरां ड्लाव्वां तैन्न मैल्हां। फिरी ऐन, रिम्मोन, एतेर, ते आशान, इना 4 नगर ड्लाव्वन सने; ते बालत्बेर1 ज़ैस जो दक्षिण मुल्खेरो रामाह भी ज़ोतन, तैड़ी तगर इन्ना नगरां केरे च़ेवरे पासां केरां सारां ड्लाव्वां भी तैन मैल्हां। शिमोनी लोकां केरे गोट्लां केरो हिस्सो तैन केरे कुलां केरे मुताबिक ऐह भोव। शिमोनी लोकां केरो हिस्सो त यहूदी लोकां केरे हिस्से मरां दित्तो जेव; किजोकि यहूदी लोकां केरो हिस्सो तैन केरे लेई बड़ो थियो, एस्से वजाई सेइं शिमोनी लोकां केरो हिस्सो तैन केरे हिस्सेरे मझ़ाटे राव।
ट्लेइयोवं चिट्ठी जबूलूनी लोकां केरे कुलां केरे मुताबिक तैन केरे नंव्वे पुड़ निस्सी। ते तैन केरे हिस्सेरी हद सारीद नगरे तगर पुज़्ज़ी; ते तैन केरि हद पश्चिमेरे पासे मरलार नगरेरे पासे च़ेढ़तां दब्बेशेत नगरे तगर पुज़्ज़ी; ते योकनाम नगरेरे सामनेबाले नाले तगर पुज़्ज़ी जेई; फिरी सारीदा करां तै पूर्वेरे पासे फिरतां किसलोत्ताबोरेरी सरहद्दी तगर पुज़्ज़ी, ते तैट्ठां च़लते-च़लते दाबराते मां निस्सी, ते यापी नव्वेंरी जगाई पुड़ निस्सी; तैट्ठां तै पूर्वेरे पासे अग्रोवं गेइतां गथेपेर ते इत्कासीने तगर जेई, ते तैस रिम्मोने मां निस्सी ज़ैन नेआ तगर फैलेरूए; तैट्ठां तै हद तैसेरे उत्तरेरे पासे मुड़तां हन्नातोने पुड़ पुज़्ज़ी, ते यिप्तहेलेरी वैदी मां गेइतां निस्सी; कत्तात, नहलाल, शिम्रोन, यिदला, ते बैतलहम; इना 12 नगर तैन केरे ड्लाव्वन समेत तैन केरो हिस्सो भोव। जबूलूनी लोकां केरो हिस्सो तैन केरे कुलां केरे मुताबिक ईए राव; ते तैसेरे अपने-अपने ड्लाव्वन समेत इना नगरन।
च़ेवरोवं चिट्ठी इस्साकारी लोकां केरे कुलां केरे मुताबिक तैन केरे नंव्वे पुड़ निस्सी। ते तैन केरि हद यिज्रेल, कसुल्लोत, शूनेम, हपारैम, शीओन, अनाहरत, रब्बीत, किश्योन, एबेस, रेमेत, एनगन्नीम, एनहद्दा, ते बेत्पस्सेस तगर पुज़्ज़ी। फिरी तै हद ताबोर पहाड़, शहसूमा, ते बेतशेमेश नगरन तगर पुज़्ज़ी, ते तैन केरि हद यरदन दरियाए पुड़ निस्सी; एन्च़रां सेइं तैन 16 नगर अपने-अपने ड्लाव्वन समेत मैल्हे। कुलां केरे मुताबिक इस्साकारी लोकां केरे गोट्लां केरो हिस्सो नगरन ते ड्लाव्वन समेत ऐह राव।
पंच़ोंव चिट्ठी आशेरी लोकां केरे गोट्लेरे कुलां केरे मुताबिक तैन केरे नंव्वे पुड़ निस्सी। तैन केरि सरहद्दी मां हेल्कात, हली, बेतेन, अक्षाप, अलाम्मेल्लेक, अमाद, ते मिशाल नगर थिये; ते तै पश्चिमी पासे कर्मेल पहाड़े तगर ते शीहोर्लिब्नात दरियाए तगर पुज़्ज़ी; फिरी तै पूर्वेरे पासे मुड़तां बेतदागोने जो जेई, ते जबूलून गोट्लेरे हिस्से तगर, ते यिप्तहेलेरी वैदी मां उत्तरी पासे भोइतां बेतेमेक ते नीएल तगर पुज़्ज़ी ते उत्तरी पासे गेइतां काबूल नगरे पुड़ निस्सी, ते तै एब्रोन, रहोब, हम्मोन, ते काना मरां भोइतां बड्डे सीदोने इलाके मां पुज़्ज़ी; तैट्ठां तै हद मुड़तां रामाह मांमेइं भोइतां सोर नंव्वेरे क़िले बाले नगरे तगर च़ेलि जेई; फिरी हद होसारे पासे मुड़तां ते अकजीब मुल्खे मांमेइं भोइतां भूमध्य-सागरे पुड़ निस्सी, उम्मा, अपेक, ते रहोब भी तैन केरे हिस्से मां भोवं; एन्च़रां सेइं 22 नगर अपने-अपने ड्लाव्वन समेत तैन्न मैल्हे। कुलां केरे मुताबिक आशेरी केरे गोट्लां केरो हिस्सो नगरन ते ड्लाव्वन समेत ऐह राव।
शेइयोवं चिट्ठी नप्ताली लोकां केरे कुलां केरे मुताबिक तैन केरे नंव्वे पुड़ निस्सी। ते तैन केरि हद हेलेपे करां ते सानन्नीमेरे बंज़ेरे बुट्टे करां, अदामीनेकेब ते यब्नेले मेइं भोइतां, ते लक्कूमे मां गेइतां यरदन दरियाए पुड़ निस्सी; तैट्ठां तै हद पश्चिमेरे पासे मुड़तां अजनोत्ताबोर नगरे जो जेई, ते तैट्ठां तै हुक्कोक नगरे जो जेई, ते दक्षिण, ते जबूलूनेरे हिस्से तगर, ते पश्चिमेरे पासे आशेरेरे हिस्से तगर, ते पूरबेरे पासे यहूदारे हिस्से यरदन दरियाए पुड़ पुज़्ज़ी। ते तैन केरे क़िले बाले नगर इना आन, सिद्दीम, सेर, हम्मत, रक्कत, किन्नेरेत, अदामा, रामाह, हासोर, केदेश, एद्रेई, एन्हासोर, यिरोन, मिगदलेल, होरेम, बेतनात, ते बेतशेमेश; इना 19 नगर ड्लाव्वन सने तैन्न मैल्हे। कुलां केरे मुताबिक नप्ताली लोकां केरे गोट्लां केरो हिस्सो नगरन ते तैन केरे ड्लाव्वन सने ऐह राव।
सत्तोवं चिट्ठी कुलां केरे मुताबिक दानेरे गोट्लेरे नंव्वे पुड़ निस्सी। ते तैन केरे हिस्सेरी सरहद्दी मां सोरा नगर, एश्ताओल नगर, ईरशेमेश नगर, शालब्बीन, अय्यालोन, यितला, एलोन, तिम्नाह, एक्रोन, एलतके, गिब्बतोन, बालात, यहूद, बनेबराक, गत्रिम्मोन, मेयक्रोन, ते रक्कोन भोवं, ते याफारे सामनेरी हद भी तैन केरि थी। ते दानी लोकां केरो हिस्सो एस करां जादे भोइ जेव, मतलब दानी लेशेम2 नगरे पुड़ हमलो केरतां तैस सेइं लड़े, ते तैट्ठेरे लोक तलवारी सेइं मारे, ते तैस अपने कब्ज़े मां केरतां तैस मां बेस्सी जे, ते अपने सियानेरे नंव्वे पुड़ लेशेमेरू नवं दान रख्खू। कुलां केरे मुताबिक दानेरे गोट्लेरो हिस्सो नगरन ते ड्लाव्वन समेत ऐह राव।
ज़ैखन मुल्खेरू बन्टू गानू हद्दरे मुताबिक पूरू भोइ जेवं, तैखन इस्राएली लोकेईं नूनेरे मट्ठे यहोशूए भी अपने दरमियान अक हिस्सो दित्तो। यहोवारे ज़ोनेरे मुताबिक तैनेईं तैस जो नगर दित्तू ज़ैन तैनी मग्गु, तैन एप्रैमेरे पहाड़ी मुल्खे मां तिम्नत्सेरह आहे; ते तैना तैस नगरे बसेइतां तैस मां राने लगे।
ज़ै-ज़ै हिस्सो एलीआजर याजक, ते नूनेरे मट्ठे यहोशू, ते इस्राएली लोकां केरे गोट्लां केरे घराना केरे सियाना केरे बड्डे-बड्डे खास मैन्हेइं शीलो मां, मिलापे बाले तेम्बेरे दारे पुड़, यहोवारे सामने चिट्ठी छ़ेडी-छ़ेडी बेंटतां दित्तो तै ईए। एन्च़रां सेइं तैनेईं मुल्ख बंटनेरू कम पूरू कियूं।
Source notes (2)
- Footnote बालत्बेर इस नगरे जो रामाह भी ज़ोतन।
- Footnote लेशेम इस नगरे जो लैश भी ज़ोतन।
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.