यहोशू 1

यहोशू जो यहोवारो हुक्म

1यहोवारे दास मूसा नेबेरी मौतरे बाद यहोवाए अपने दास यहोशू जो ज़ोवं, ज़ैन नूनेरू मट्ठू थियूं, 2“मेरो दास मूसो मेरि जेवरोए; ते हुनी तू उठ, ते मझ़ बन्द, ते इन सैरी इस्राएली लोकन सेइं साथी यरदन दरियाएरे पार गेइतां तैस मुल्खे मां गा, ज़ै मुल्ख अवं इस्राएली लोकन देताईं। 3तैस वाधेरे मुताबिक ज़ै मीं मूसे सेइं कियोरो थियो, मतलब ज़ैस-ज़ैस ठारी तुस पव रखेले, तै सब ठार अवं तुसन देताईं।1 4सुनसान ठारी ते लबानोनेरे पहैड़न तगर, ते बड्डे दरिया फराते करां लेइतां पश्चिमेरे पासे भूमध्य-सागरे तगर, हित्ती कौमरो सारो इलाको तुश्शी मलकीत भोल्ही। 5तेरी ज़िन्दगी भर कोई मैन्हु तेरे सामने खड़ो न भोइ बटेलो, ज़ेन्च़रे अवं मूसे सेइं साथी राव, तेन्च़रे अवं तीं सेइं साथी भी रालो; ते न अवं तीं धोखो देइलो, ते न अवं तीं शारेलो। 6एल्हेरेलेइ तू हिम्मत रख ते मज़बूत भो; किजोकि ज़ै मुल्ख देनेरी मीं इस्राएली लोकां केरे दादे-पड़दादन सेइं कसम खेवरी थी, तूए तैन तैस मुल्खेरो मालिक बनालो। 7बस हिम्मत केर ते बड़ो मज़बूत भोइतां ज़ै कानून मेरे दास मूसे तीं दित्तोरोए तैसेरे मुताबिक च़लने मां एहतियात केरां; न तू तैस करां देइने मुड़ां, ते न बांए मुड़ां, ताके ज़ैड़ी कोन्च तू गालो, तैड़ी तेरां कम्मां कामयाब भोल्हां।2 8इस कानूनेरे किताबी मां लिखोरी गल्‍लन हमेशा याद रेखां, रात दिहैड़ी तैन्ने पुड़ ध्यान देंतो रेइयां, ताके ज़ैन किछ तैस मां लिखेरूए तैस पुड़ एहतियात केरतां अमल केरां, एन केरने सेइं तेरां सब कम्मां कामयाब भोल्हां ते तेरी बड़ी तरक्‍की भोल्ही। 9कुन मीं तीं हुक्म नईं दित्तोरो? हिम्मत केर ते मज़बूत भो, डेरां न, हिम्मत न हैरां; किजोकि ज़ैड़ी-ज़ैड़ी तू गालो, तैड़ी-तैड़ी तेरो परमेशर यहोवा तीं सेइं साथी रालो।”

इस्राएलेरे सारे गोट्ल हुक्म मनतन

10तैखन यहोशूए इस्राएली लोकां केरे प्रधान्न ई हुक्म दित्तो, 11“डेरन मां गेइतां च़ेवरे पासन लोकन ऐह हुक्म देथ, कि अपने-अपने लेई रोट्टी बनेइतां तियार केरतां रखा, किजोकि ट्लेइ दिहाड़ां केरे अन्तर तुसेईं ई यरदन दरिया पार केरतां तै मुल्ख अपने कब्ज़े मां केरनेरे लेई गानूए, ज़ै मुल्ख तुश्शो परमेशर यहोवा तुश्शे कब्ज़े मां देनेबालोए।”

12फिरी यहोशूए रूबेनी, गादी, ते मनश्शेरे गोट्लेरे अध्धे लोकन सेइं ज़ोवं, 13“ज़ै हुक्म यहोवारे दास मूसे तुसन दित्तोरो थियो, तैस याद रखा। तैनी ज़ोवरू थियूं; कि तुश्शो परमेशर यहोवा तुसन आरामेरी ठार देइ राहोरोए, ते ऐह मुल्ख तुसन देइलो। 14तुश्शी कौन्शां ते तुश्शे बच्‍चे, ते जानबर इस मुल्खे मां राले, ज़ै मूसे तुसन यरदन दरियारे इस पासे दित्तोरोए, पन तुस ज़ैना सिपाही आथ तियार भोइतां अपने ढ्लान करां अग्री-अग्री पार गाथ, ते तैन केरि मद्दत केरा; 15ते ज़ैखन यहोवा तैन एरहो आराम देलो ज़ेन्च़रे तैनी तुसन दित्तोरोए, ते तैना भी तुश्शे परमेशर यहोवारे दित्तोरे मुल्खेरे मालिक भोइ गाले; तैखन तुस अपने अधिकारेरे मुल्खे मां, ज़ै यहोवारे दास मूसे यरदन दरियारे पूर्वेरे पासे तुसन दित्तोरोए, वापस इसेरे मालिक भोल्हे।” 16तैखन रूबेन, गाद ते मनश्शेरे गोट्लेरे अध्धे लोकेईं यहोशू जुवाब दित्तो, “ज़ैन किछ केरनेरो हुक्म तीं असन दित्तोरोए, तैन अस केरमेले, ते ज़ैड़ी कोन्च तू असन भेज़ेलो अस तैड़ी गामेले। 17ज़ेन्च़रे असां मूसेरी सैरी गल्‍लां मन्ते थिये, तेन्च़रे असां तेरी भी मनमेले, पन एत्रू लोड़ते कि ज़ेन्च़रे परमेशर यहोवा मूसे सेइं साथी रहतो थियो, तेन्च़रे तीं सेइं साथी भी राए। 18अगर कोई मैन्हु तेरे हुक्मेरे खलाफ बगावत केरे, या ज़ै भी तू हुक्म देलो, तैस न मन्नेलो, तैस अस जाना मारमेले। पन तू मज़बूत भो ते हिम्मत रख।”