Bhadrawahi Bible
अय्यूब 18
शूह नगरेरे बिल्ददेरी गल्लां
तैखन शूह नगरेरे बिल्ददे ज़ोवं,
“तुस किताली तगर फंदे लेई लेइतां गल्लां ट्लाते राले?
ध्यान देथ, तैखन अस ज़ोमेले।
अस लोक तुश्शी नज़री मां किजो जानबरेरे ज़ेरे समझ़े गातम,
ते बेवकूफ बनोरेम।
हे अपने आपे सरकी मां छ़िन्दने बाला
कुन तेरे वजाई सेइं धरती उज़ड़ी गाली,
ते चट्टान अपने ठारी करां दूर भोइ गाली?
फिरी भी दुष्टां केरो दीयो हिश्शी गालो,
ते तैसेरी अग्गरी लौ न चमकेली।
तैसेरे डेरेरी लौ आंधरी भोइ गाली,
ते तैस पुड़ेरो दीयो हिश्शी गालो।
तैसेरे बड्डे-बड्डे कदम निक्के भोइ गाले
ते तै अपनि योजनाई सेइं बिछ़ड़ेलो।
तै अपनो पव जाले मां फसालो,
तै फंदन पुड़ च़लते।
तैसेरी थूड़ी फंदे मां फेसी गाली,
ते तै जाले मां ट्लाव गालो।
फंदेरी रेस्सी तैसेरेलेइ ज़मीनी मां,
ते जाल बत्ती मां छ़ुपाव जेवरूए।
च़ेवरे पासना डरानेबैली चीज़ां तैस डरैली
ते तैस पत्ती पेइतां तैस निशानेली।
तैसेरी ताकत1 दुखे सेइं घेटी गाली,
ते मुसीबत तैस कां तियार राली।
तै तैसेरो अंग खाली,
बल्के जाना मारनेबालो रोग तैसेरे अंग खालो।
अपने ज़ैस डेरेरो तै भरोसो केरते,
तैस करां तै थसोड़ो गालो;
ते तै मौतरे राज़े कां पुज़व गालो।
ज़ै तैसेरे तैट्ठेरो नईं तै तैसेरे डेरे मां बास केरेलो,
ते तैसेरे घरे पुड़ गन्धक खिलारी गाली।
तैसेरू ज़ील त शुक्की गालू,
ते डैलड़ी केट्टी गैली।
धेरती पुड़ां तैसेरी याद मिटाई गाली,
ते बज़ारे मां तैसेरू नवं कधी न शुनोलू।
तैस लौई मरां आंधरे मां ड्लैक दित्ती गाली,
ते दुनियाई मरां भी कढो गालो।
तैसेरे कुटमे मरां तैसेरू कोई खानदान न रालू,
ते ज़ैड़ी तै रहतो थियो, तैड़ी कोई बच़ोरो न रालो।
तैसेरे दिहाड़े हेरतां पश्चिमेरे लोक डरेले,
ते पूर्वेरे रानेबालन शिलकंटे च़ेढ़ी गाले।
इस मां कोई शक नईं बुरे लोकां केरे डेरे एरे भोइ गातन,
ते ज़ैस परमेशरेरू ज्ञान न राए,
तैसेरी ठार एरी ही भोइ गातीए।”
Source notes (1)
- Footnote ताकत धन
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.