Bhadrawahi Bible
अय्यूब 16
अय्यूबेरो जुवाब
तैखन अय्यूबे ज़ोवं,
“एरी बेड़ि गल्लां मीं शुनोरिन,
तुस सभेरे सब निकम्मे तसल्ली देनेबाले आथ।
कुन बेकार गल्लां केरो अन्त कधी भोल्हो?
तू कोस ज़ेरि गल्ली सेइं झ़िड़कतां एरहो जुवाब देतस?
अगर तुश्शी हालत मेरी ज़ेरि भोथी,
त अवं भी तुश्शी ज़ेरि गल्लां केरि सकेथो;
अवं भी तुश्शे खलाफ गल्लां जोड़ी सकेथो,
ते तुश्शे खलाफ क्रोड़ी हिलेइ सकेथो।
बल्के अवं अपने गल्लन सेइं तुसन हिम्मत देथो,
ते गल्लन सेइं तसल्ली देइतां तुश्शे दुखे घटाथो।
चाहे अवं ज़ोईं फिरी भी मेरी तकलीफ न घटेली,
चाहे अवं च़ुप रेईं, फिरी भी मेरो दुख किछ घट न भोल्हो।
पन हुनी परमेशरे अवं थकावरोईं;
तैने मेरू सारू टब्बर उज़ाड़ु।
ते परमेशरे ज़ै मेरी जान कमज़ोर कियोरीए, तै मेरे खलाफ गवाह बनोरोए,
ते मेरू पतलू भोनू मेरे खलाफ खड़ू भोइतां
मेरे सामने गवाही देते।
तैने सेरकोइतां अवं छ़िन्दो ते मीं पत्ती पेव;
तै मेरे खलाफ दंत च़ापते;
ते मेरो दुश्मन मीं एछ़्छ़ी हिराते।
हुनी लोक मेरो मज़ाक बनानेरे लेई अपनु आशी खोलतन,
ते मीं बदनाम केरतां मेरे खैखोड़ी पुड़ थप्पड़ बातन,
ते मेरे खलाफ भीड़ लातन।
परमेशरे अवं बुरे लोकां केरे कैबू मां कियो,
ते दुष्ट लोकां केरे हथ्थे मां शारो।
अवं सुखे सेइं रहतो थियो, ते तैने अवं चूर-चूर केरि छ़डो;
तैने मेरो मेट्टू ट्लेइतां मेरे टुक्ड़े-टुक्ड़े किये;
फिरी तैने अवं अपनो निशानो बनेइतां खड़ो कियोरोईं।
तैसेरे तीर मेरे च़ेवरे पासन उडरने लगोरेन,
तै ज़ालम भोइतां मेरे गुर्दन कोशते,
ते मेरो पित्तो ज़मीनी पुड़ बगाते।
तै जंग लड़ने बालेरो ज़ेरो मीं पुड़ हमलो केरतां
मीं ज़खमे पुड़ ज़खम पुज़ेइतां ज़खमी केरते।
मीं एपनी चेमड़ी पुड़ टाट सीयोरूए,
ते अपनि ताकत मित्ती मां मिलेवरीए।
लेरां देते-देते मेरू तुत्तर लाल भोइ जेवं,
ते मेरी एछ़्छ़न पुड़ बड़ू आंधरू पेवरूए;
फिरी भी मीं करां कोई ज़ुलम नईं भोवरो,
ते मेरी प्राथना पवित्रे।
हे धरती, तू मेरे खूने1 न छ़ुपेइयां,
ते मेरी बिनती कोन्ची न रोकां।
हुन्ना भी सुर्गे मां मेरो गवाह आहे,
ते मेरो गवाह बह आहे।
मेरे दोस्त मीं सेइं नफरत केरतन,
पन अवं परमेशरेरे सामने ऐंखरू बगाताईं,
कि कोई परमेशरेरे सामने दोस्तेरो,
ते मैन्हेरो मुकदमो तैसेरे पड़ोसेरे खलाफ लड़े।
किजोकि थोड़े ज़ेरे साल बीतने पुड़ अवं तैस बत्तां च़लेइलो,
ज़ैस मरां अवं फिरी वापस न एज्जी बटेलो।”
Source notes (1)
- Footnote खूने जुर्म
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.